Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • w12 15/9 p. 13-17
  • Eskola sira neʼebé hatudu Jeová nia domin

La iha video neʼebé bele loke.

Deskulpa, la bele loke vídeo.

  • Eskola sira neʼebé hatudu Jeová nia domin
  • Livru Haklaken fó sai Maromak Jeová nia Ukun—2012
  • Subtítulu
  • Informasaun seluk neʼebé hanesan
  • HETAN BUAT DIʼAK HUSI ESKOLA SIRA
  • Ita aproveita oportunidade hotu atu aprende husi Maromak Jeová ka lae?
    Ita-nia Serbisu Kristaun—2011
  • Oinsá mak Testemuña ba Jeová sira hetan treinu?
    Pergunta sira neʼebé baibain ema husu kona-ba Testemuña ba Jeová
  • Dalan oioin atu aumenta ita-nia serbisu haklaken
    Organizasaun neʼebé Halo Jeová nia Hakarak
  • Katuas sira neʼebé tau matan ba bibi-lubun
    Organizasaun neʼebé Halo Jeová nia Hakarak
Haree barak liután
Livru Haklaken fó sai Maromak Jeová nia Ukun—2012
w12 15/9 p. 13-17

Eskola sira neʼebé hatudu Jeová nia domin

JEOVÁ mak ita-nia Mestre Boot. (Isa 30:20) Nia domin book nia atu hanorin ninia kriatura sira no fó treinu ba sira. Porezemplu, tanba domin, Jeová hanorin Jesus kona-ba “buat hotu neʼebé Nia halo”. (Joao 5:20) Ninia domin ba ita nuʼudar ninia Testemuña mós book nia atu fó mai ita “nanál hanesan ema matenek nian” kuandu ita hakaʼas an atu hahiʼi nia no ajuda ema seluk.—Isa 50:4.

Hodi halo tuir Jeová nia ezemplu kona-ba domin, Grupu Administradór nia Komisaun Hanorin nian halaʼo eskola sanulu hodi fó treinu ba irmaun-irmán sira neʼebé iha hakarak no mós iha situasaun diʼak atu tuir eskola sira-neʼe. Ita haree eskola sira-neʼe nuʼudar arranju neʼebé hatudu Jeová nia domin ka lae?

Entaun, mai ita haree informasaun kona-ba eskola sira neʼebé halaʼo daudauk iha Maromak nia organizasaun no mós oinsá mak irmaun-irmán sira neʼebé tuir ona eskola sira-neʼe sente kona-ba treinu neʼebé sira simu. Depois, husu ba ita-nia an: ‘Oinsá mak haʼu bele hetan buat diʼak husi arranju hanorin nian neʼe?’

HETAN BUAT DIʼAK HUSI ESKOLA SIRA

Nuʼudar ‘Maromak domin nian’, Jeová fó treinu mai ita hodi prepara ita atu tahan hasoru susar oioin, ajuda ita atu iha moris neʼebé kontente, no ajuda mós ita atu haksolok iha serbisu haklaken. (2 Kor 13:11) Hanesan ho ema kristaun sira iha tempu uluk, ita mós hetan treinu atu ajuda ema seluk hodi “hanorin sira atu halo tuir buat hotu” neʼebé Jesus haruka.—Mt 28:20.

Maski ita la bele tuir eskola sira-neʼe hotu, maibé ita bele hetan buat diʼak hodi tuir eskola sira-neʼe ida ka balu. No ita bele halo tuir hanorin husi Bíblia neʼebé ita hetan iha eskola neʼe. Ita mós bele aumenta ita-nia matenek atu haklaken hodi serbisu hamutuk ho irmaun-irmán sira neʼebé hetan ona treinu husi eskola sira-neʼe.

Tan neʼe, husu ba ita-nia an: ‘Haʼu-nia situasaun husik haʼu atu tuir eskola sira-neʼe ida ka lae?’

Jeová nia atan sira sente katak atu hola parte no aprende husi eskola sira-neʼe mak oportunidade neʼebé espesiál tebes ba sira. Nuneʼe, ita hein katak treinu sira-neʼe sei ajuda ita atu hakbesik liután ba Jeová no kumpre responsabilidade sira neʼebé nia fó mai ita, liuliu serbisu atu haklaken lia-foun diʼak ba ema seluk.

ESKOLA SIRA IHA JEOVÁ NIA ORGANIZASAUN

Eskola Serbisu Kristaun

Objetivu: Atu ajuda pioneiru sira atu ‘kaer didiʼak sira-nia knaar’.—2 Tim 4:5.

Tempu hira: Semana rua.

Fatin: Sukursál mak hili; baibain iha Reuniaun-Fatin.

Sé mak bele tuir: Irmaun-irmán sira neʼebé serbí nuʼudar pioneiru regulár ba tinan ida ka liu.a

Oinsá atu tama: Katuas área nian mak fó-hatene ba pioneiru sira neʼebé kumpre kritériu.

Irmán Lily (liman-loos) hatete: “Eskola neʼe ajuda haʼu atu hasoru susar oioin iha serbisu haklaken no haʼu-nia moris. Eskola neʼe mós treinu haʼu atu hadiʼa dalan neʼebé haʼu estuda, hanorin, no uza Bíblia. Agora, haʼu bele ajuda ema seluk iha dalan neʼebé diʼak liután, apoia katuas sira, no ajuda kongregasaun atu laʼo ba oin.”

Irmán Brenda, neʼebé tuir eskola neʼe dala rua ona, hatete: “Eskola neʼe fó oportunidade mai haʼu atu fó haʼu-nia atensaun tomak atu serbí Jeová, no mós treinu haʼu atu iha hanoin neʼebé tuir Jeová nia hanoin no atu ajuda ema seluk. Jeová mak Maromak neʼebé laran-luak duni!”

a Se iha pioneiru foun uitoan deʼit atu forma klase ida, pioneiru sira seluk neʼebé la tuir eskola neʼe ba tinan lima nia laran mós dala ruma hetan konvite atu tuir fali.

Eskola ba Katuas Kongregasaun nian

Objetivu: Atu ajuda katuas sira halaʼo sira-nia responsabilidade sira iha kongregasaun no atu hametin sira rasik nia relasaun ho Jeová.

Tempu hira: Loron lima.

Fatin: Sukursál mak hili; baibain iha Reuniaun-Fatin ka iha Reuniaun-Fatin ba Reuniaun Boot.

Sé mak bele tuir: Irmaun sira neʼebé serbí nuʼudar katuas.

Oinsá atu tama: Sukursál mak fó konvite ba katuas sira.

Haree toʼok komentáriu balu husi irmaun sira neʼebé tuir klase 92 iha Estadu Unidus: “Eskola neʼe ajuda tebes haʼu atu hanoin didiʼak kona-ba haʼu-nia hahalok no oinsá haʼu bele tau matan ba Jeová nia bibi.”

“Eskola neʼe ajuda haʼu atu fó laran-manas ba irmaun-irmán sira iha dalan neʼebé diʼak liután hodi uza Bíblia.”

“Haʼu sei halo tuir ba nafatin treinu neʼebé haʼu foin hetan.”

Eskola ba Katuas Área no Katuas Vizitante ho Sira-nia Feen

Objetivu: Atu ajuda katuas área nian no katuas vizitante atu serbí kongregasaun sira iha dalan neʼebé diʼak liután nuʼudar sira “badinas atu haklaken no atu hanorin”.—1 Tim 5:17; 1 Ped 5:2, 3.

Tempu hira: Fulan rua.

Fatin: Sukursál mak hili.

Sé mak bele tuir: Katuas área nian no katuas vizitante ho sira-nia feen.

Oinsá atu tama: Sukursál mak fó konvite ba katuas área nian no katuas vizitante ho sira-nia feen.

“Eskola neʼe halo ami hafolin liután oinsá mak Jesus dirije ita-nia organizasaun. Ami haree katak ami presiza fó laran-manas ba irmaun-irmán sira no hametin unidade iha kongregasaun ida-idak. Kursu neʼe hametin ami-nia laran katak, maski dala ruma ami presiza fó konsellu ka hadiʼa situasaun ruma, maibé buat neʼebé importante liu mak atu ajuda irmaun-irmán sira atu fiar katak Jeová hadomi sira.” —Irmaun Joel, husi klase primeiru, 1999.

Eskola Bíblia nian ba Irmaun sira neʼebé Laiha Kaben

Objetivu: Atu ajuda katuas no atan ba kongregasaun neʼebé kaben la iha atu bele kaer responsabilidade liután iha Jeová nia organizasaun. Sira barak neʼebé ramata eskola neʼe hetan knaar atu serbí iha sira rasik nia rai. Balu seluk hetan knaar atu serbí iha rai seluk se sira hakarak atu halo nuneʼe. Balu hetan knaar atu serbí durante tempu balu nuʼudar pioneiru tempu-tomak hodi haluan serbisu haklaken iha fatin neʼebé dook husi kongregasaun.

Tempu hira: Fulan rua.

Fatin: Sukursál mak hili; baibain iha Reuniaun-Fatin ka iha Reuniaun-Boot ba Reuniaun Boot.

Sé mak bele tuir: Irmaun sira neʼebé laiha kaben ho tinan 23 toʼo 62 no iha saúde diʼak, neʼebé hakarak atu serbí iha fatin neʼebé deʼit neʼebé presiza ajuda. (Mc 10:29, 30) Sira tenke serbí ona nuʼudar pioneiru regulár ba tinan rua ka liu, no serbí ona nuʼudar katuas ka atan ba kongregasaun durante tinan rua ka liu.

Oinsá atu tama: Irmaun sira neʼebé hakarak tama iha eskola neʼe bele hetan informasaun iha enkontru ida neʼebé halaʼo iha reuniaun boot ba loron rua.

Irmaun Rick, neʼebé tuir klase 23 iha rai-Estadus Unidus, hatete: “Kursu neʼe ajuda haʼu atu husik Jeová nia espíritu santu atu halo mudansa iha haʼu-nia laran. Kuandu Jeová fó knaar ruma ba ita, nia mós ajuda ita atu halaʼo knaar neʼe. Haʼu aprende katak se haʼu halo tuir Maromak nia hakarak ho laran hodi la hanoin haʼu-nia an rasik, nia sei fó forsa mai haʼu.”

Irmaun Andreas, neʼebé serbí iha rai-Alemaña, hatete: “Eskola neʼe ajuda haʼu atu hafolin Maromak nia organizasaun nuʼudar milagre ida iha tempu modernu. Treinu neʼe prepara haʼu atu halo serbisu neʼebé haʼu sei simu. Liután neʼe, ezemplu barak husi Bíblia fó fiar mai haʼu katak serbí irmaun-irmán sira no Jeová mak lori haksolok neʼebé loos.”

Eskola Bíblia nian ba Kaben-Naʼin Kristaun

Objetivu: Atu treinu kaben-naʼin sira atu bele halaʼo diʼak liután sira-nia serbisu ba Jeová no ninia organizasaun. Sira barak neʼebé ramata eskola neʼe hetan knaar atu serbí iha fatin neʼebé presiza ajuda iha sira rasik nia rai. Balu seluk hetan knaar atu serbí iha rai seluk se sira hakarak atu halo nuneʼe. Balu hetan knaar atu serbí durante tempu balu nuʼudar pioneiru tempu-tomak hodi haluan serbisu haklaken iha fatin neʼebé dook husi kongregasaun.

Tempu hira: Fulan rua.

Fatin: Eskola neʼe halaʼo iha Estadus Unidus, maibé komesa iha Setembru 2012, sukursál balu seluk mós sei halaʼo eskola neʼe, baibain iha Reuniaun-Fatin ka iha Reuniaun-Fatin ba Reuniaun Boot.

Sé mak bele tuir: Kaben-naʼin ho tinan 25 toʼo 50 no iha saúde diʼak, neʼebé bele serbí iha fatin naran deʼit neʼebé presiza ajuda ho laran-prontu hanesan: “Haʼu mak neʼe! Haruka haʼu bá.” (Isa 6:8) Atu tuir eskola neʼe, sira presiza kaben ona ba tinan rua ka liu, no serbí ona nuʼudar pioneiru regulár ka halo serbisu tempu-tomak seluk iha Jeová nia organizasaun durante tinan rua ka liu. Laʼen tenke serbí ona nuʼudar katuas ka atan ba kongregasaun durante tinan rua ka liu.

Oinsá atu tama: Kaben-naʼin sira neʼebé hakarak tama iha eskola neʼe bele hetan informasaun iha enkontru ida neʼebé halaʼo iha reuniaun boot ba loron tolu. Se ita-nia reuniaun boot la iha enkontru kona-ba neʼe, ita bele hakerek karta ba sukursál hodi husu informasaun.

“Semana ualu iha eskola neʼe troka ami-nia moris no fó oportunidade diʼak ba ami neʼebé hakarak halo buat barak liután iha Jeová nia serbisu! Eskola neʼe fó laran-manas mai ami atu uza didiʼak ami-nia tempu.”—Eric no Corina (iha kraik), husi klase primeiru, 2011.

Watchtower Bible School of Gilead (Eskola misionáriu nian)

Objetivu: Atu treinu estudante sira atu serbí nuʼudar misionáriu iha fatin neʼebé iha ema barak, atu serbí nuʼudar katuas área nian ka katuas vizitante, no atu serbí iha Betel, hodi nuneʼe sira sei hatudu ezemplu diʼak oinsá atu apoia arranju oioin iha serbisu haklaken no iha sukursál.

Tempu hira: Fulan lima.

Fatin: Watchtower Educational Center, Patterson, Novaiorke, Estadus Unidus.

Sé mak bele tuir: Kaben-naʼin neʼebé serbí nuʼudar misionáriu neʼebé seidauk tuir eskola neʼe, pioneiru tempu-tomak, katuas área nian ka katuas vizitante, ka serbí iha Betel. Sira tenke halaʼo ona serbisu hanesan neʼe nuʼudar feen-laʼen durante tinan tolu ka liu. Sira presiza hatene koʼalia, lee, no hakerek lia-inglés ho momoos.

Oinsá atu tama: Grupu Koordenadór ba Sukursál mak konvida kaben-naʼin atu prenxe aplikasaun ba eskola neʼe.

Irmaun Lade ho irmán Monique husi Estadus Unidus agora serbí iha Áfrika. Irmaun Lade hatete: “Eskola Gilead prepara ami atu sai prontu atu bá fatin neʼebé deʼit iha mundu tomak no serbisu hamutuk ho irmaun-irmán sira.”

Irmán Monique mós hatete: “Halo tuir buat neʼebé haʼu aprende husi Maromak nia Liafuan halo haʼu haksolok ho haʼu-nia knaar. Neʼe hatudu duni Jeová nia domin.”

Eskola ba Grupu Koordenadór ba Sukursál ho Sira-nia Feen

Objetivu: Atu ajuda irmaun sira neʼebé serbí iha Grupu Koordenadór ba Sukursál atu tau matan ba Betel, kongregasaun sira, no katuas área nian no katuas vizitante sira. Sira mós aprende kona-ba serbisu tradusaun, halo no haruka livru sira.

Tempu hira: Fulan rua.

Fatin: Watchtower Educational Center, Patterson, Novaiorke, Estadus Unidus.

Sé mak bele tuir: Irmaun sira neʼebé serbí iha Grupu Koordenadór ba Sukursál ka Grupu Koordenadór ba Rai ida ka sira neʼebé atu halaʼo knaar neʼe.

Oinsá atu tama: Grupu Administradór mak fó konvite ba irmaun sira-neʼe ho sira-nia feen.

Irmaun Lowell ho irmán Cara neʼebé tuir klase 25, sira serbí daudauk iha rai-Nijéria. Irmaun Lowell hatete: “Eskola neʼe fó-hanoin mai haʼu katak maski haʼu serbisu barak, maibé atu halo Jeová kontente, haʼu tenke halo buat hotu tuir ninia dalan. Kursu neʼe mós hanorin haʼu katak importante atu halo tuir Jeová nia domin ba ninia atan sira.”

Irmán Cara mós hatete: “Liafuan ida neʼebé kona loos haʼu-nia laran mak: Se haʼu la bele esplika buat ruma iha dalan neʼebé simples, haʼu presiza estuda liután kona-ba neʼe antes atu hanorin ema seluk.”

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe