Ita aproveita oportunidade hotu atu aprende husi Maromak Jeová ka lae?

1. Maromak Jeová hanoin oinsá kona-ba hanorin?

¹ Maromak Jeová, ita-nia “Mestre Boot Liu Hotu” hakarak atu hanorin ita. (Isa 30:20) Nia komesa hanorin kuandu nia kria kriatura primeiru, ninia Oan-Mane. (Joao 8:28) Depois Adão kontra hasoru Jeová, Nia la para atu hanorin, maibé nia ho domin fó matadalan ba ema sala-naʼin sira.—Isa 48:17, 18; 2 Tim 3:14, 15.

2. Programa edukasaun saida mak halaʼo daudauk?

² Ohin loron, Maromak Jeová mak dirije programa edukasaun nian neʼebé halaʼo iha mundu tomak. Hanesan profeta Isaías fó-hatene nanis, ema rihun ba rihun iha mundu tomak laʼo nadodon ba “foho, uma Jeová nian”. (Isa 2:2) Tanbasá mak sira halo ida-neʼe? Atu Jeová hanorin sira kona-ba ninia dalan sira! (Isa 2:3) Durante tinan serbisu nian 2010, Testemuña ba Jeová uza oras 16.000.000.000 liu atu haklaken no hanorin ema lia-loos husi Bíblia. No mós, kada semana kongregasaun hamutuk 105.000 liu iha mundu tomak simu hanorin husi Bíblia. No grupu atan laran-metin no matenek halo ita-nia livru sira-neʼebé tradús ba língua 500 liu atu hanorin ema.

3. Oinsá mak Ita rasik hetan buat diʼak husi Maromak Jeová nia hanorin?

³ Hetan buat diʼak: Ita hetan buat diʼak duni husi Maromak nia hanorin! Ita aprende katak Maromak iha naran no nia hanoin ita. (Sal 83:18; 1 Ped 5:6, 7) Ita hatene ona resposta ba pergunta sira-neʼebé importante iha ema nia moris. Porezemplu: Tansá mak ema terus no mate? Oinsá mak ita bele hetan kontente neʼebé loos? Tanbasá mak ita moris? Maromak Jeová mós fó matadalan kona-ba morál neʼebé ajuda ita atu ‘halo ita-nia dalan sai susesu’.—Jos 1:8.

4. Ema kristaun sira iha oportunidade saida atu hetan hanorin husi Maromak? Tansá mak ita aproveita oportunidade hotu atu aprende husi Jeová?

⁴ Liután neʼe, Maromak Jeová arranja eskola estra oioin neʼebé ajuda ninia atan balu hetan treinu hodi aumenta liután sira-nia serbisu ba nia. Iha pájina 4-6 fó sai lista kona-ba programa sira-neʼe. Maski ita balu la bele tuir eskola sira-neʼe tanba ita-nia situasaun, maibé ita hakaʼas an atu hetan buat diʼak husi Maromak nia hanorin neʼebé ita simu agora daudauk, loos ka lae? Baibain mestre sira ka ema seluk hakaʼas ita-nia joven sira atu bá eskola boot. Maibé diʼak mai ita atu fó laran-manas ba joven sira-neʼe atu laʼo ba oin hodi simu edukasaun neʼebé diʼak liu husi Maromak, loos ka lae? Sin, hodi aproveita oportunidade hotu atu aprende husi Jeová sei ajuda ita atu iha moris neʼebé kontente agora no moris ba nafatin iha futuru.—Sal 119:105; Joao 17:3.

Oportunidade oioin atu simu hanorin husi Maromak Jeová

Eskola Aprende Lee no Hakerek

• Razaun: Atu hanorin ema oinsá atu lee no hakerek hodi sira rasik bele lee no estuda Bíblia no hanorin lia-loos ba ema seluk.

• Tempu hira: Depende ba ema hira no sira-nia presiza.

• Fatin: Iha kongregasaun nia Reuniaun Fatin.

• Sé mak bele tuir: Haklaken-naʼin hotu no sira neʼebé estuda Bíblia.

• Oinsá atu tama: Katuas sira arranja eskola sira tuir kongregasaun nia presiza, no fó laran-manas ba sira neʼebé la hatene lee no hakerek atu tuir eskola neʼe.

Eskola Serbisu Kristaun

• Razaun: Atu treinu haklaken-naʼin sira hodi bele haklaken no hanorin ho didiʼak ba ema seluk kona-ba lia-foun diʼak.

• Tempu hira: Nafatin.

• Fatin: Iha kongregasaun nia Reuniaun Fatin.

• Sé mak bele tuir: Haklaken-naʼin hotu. No mós, sira neʼebé tuir reuniaun beibeik, no simu Bíblia nia hanorin, no moris tuir Bíblia nia matadalan.

• Oinsá atu tama: Fó-hatene ba irmaun neʼebé tau matan ba Eskola Serbisu Kristaun.

Eskola atu Aprende Língua Seluk

• Razaun: Atu treinu haklaken-naʼin sira oinsá atu haklaken lia-foun diʼak iha língua seluk.

• Tempu hira: Fulan haat ka lima. Eskola neʼe baibain halaʼo iha sábadu dadeer ba oras ida ka rua.

• Fatin: Baibain iha Reuniaun-Fatin.

• Sé mak bele tuir: Haklaken-naʼin sira neʼebé iha naran diʼak iha kongregasaun no hakarak atu haklaken ba ema sira-neʼebé koʼalia língua seluk.

• Oinsá atu tama: Sukursál mak arranja eskola neʼe tuir presiza iha haklaken-fatin.

Serbisu atu Harii Reuniaun-Fatin

• Razaun: Atu harii no hadiʼa fali Reuniaun-Fatin sira. Maski ida-neʼe la’ós eskola ida, maibé arranju neʼe ajuda voluntáriu sira atu hetan treinu no matenek oioin hodi sira bele ajuda iha projetu ruma.

• Tempu hira: Tuir voluntáriu sira-nia situasaun.

• Fatin: Iha fatin sira-neʼebé Grupu atu Arranja Harii Reuniaun-Fatin mak tau matan. Karik voluntáriu balu hetan konvite atu ajuda halo serbisu iha fatin dook neʼebé kona dezastre.

• Kritériu: Irmaun no irmán sira-neʼebé hetan ona batizmu no hetan ona lisensa husi grupu katuas sira iha kongregasaun. Sira neʼebé badain ka la’ós badain.

• Oinsá atu tama: Prenxe formuláriu Kingdom Hall Volunteer Worker Questionnaire (S-82) neʼebé bele hetan husi katuas sira.

Eskola Serbisu Pioneiru

• Razaun: Atu ajuda pioneiru sira atu ‘kaer didiʼak sira-nia knaar’ serbisu haklaken.—2 Tim 4:5.

• Tempu hira: Semana rua.

• Fatin: Sukursál mak sei hili fatin; baibain iha Reuniaun-Fatin.

• Kritériu: Irmaun no irmán sira-neʼebé serbí nuʼudar pioneiru regulár ba tinan ida ka liu.

• Oinsá atu tama: Katuas área mak fó-hatene pioneiru sira-neʼebé kumpre kritériu.

Eskola ba Ema Betel Foun

• Razaun: Eskola neʼe atu ajuda sira-neʼebé komesa serbí iha Betel.

• Tempu hira: Oras ida kada semana toʼo semana 16.

• Fatin: Betel.

• Kritériu: Sira neʼebé foin sai família Betel ka voluntáriu sira-neʼebé ajuda ba tempu kleur (tinan ida ka liu).

• Oinsá atu tama: Betel sei konvida sira-neʼebé serbisu ona iha Betel no kumpre kritériu.

Eskola ba Katuas no Atan ba Kongregasaun

• Razaun: Atu treinu katuas no atan ba kongregasaun atu halaʼo sira-nia knaar atu tau matan kongregasaun no knaar seluk iha organizasaun. (Apos 20:28) Grupu Administradór mak sei deside bainhira atu halaʼo eskola neʼe.

• Tempu hira: Ba tinan balu liubá, eskola neʼe laʼo ba loron ida ho balu ba katuas sira no loron ida ba atan ba kongregasaun.

• Fatin: Baibain iha Reuniaun-Fatin.

• Kritériu: Tenkesér serbí nuʼudar katuas ka atan ba kongregasaun.

• Oinsá atu tama: Katuas área nian sei konvida katuas ka atan ba kongregasaun neʼebé kumpre kritériu.

Eskola ba Katuas Kongregasaun niana

• Razaun: Atu ajuda katuas sira atu tau matan ba sira-nia knaar iha kongregasaun.

• Tempu hira: Loron lima.

• Fatin: Sukursál mak deside fatin atu halaʼo eskola neʼe; baibain halaʼo iha Reuniaun-Fatin.

• Kritériu: Tenkesér serbí nuʼudar katuas.

• Oinsá atu tama: Sukursál sei fó konvite ba katuas neʼebé kumpre kritériu.

Eskola ba Katuas Área no Katuas Vizitante no sira-nia Feenb

• Razaun: Atu ajuda katuas área no katuas vizitante atu halaʼo sira-nia knaar diʼak liután hodi serbí kongregasaun sira no “badinas atu haklaken no atu hanorin”, no mós atu halo serbisu nuʼudar bibi-atan ba kongregasaun sira.—1 Tim 5:17; 1 Ped 5:2, 3.

• Tempu hira: Fulan rua.

• Fatin: Sukursál mak deside fatin atu halaʼo eskola neʼe.

• Kritériu: Tenkesér serbí nuʼudar katuas área no katuas vizitante.

• Oinsá atu tama: Sukursál sei fó konvite ba katuas área no katuas vizitante no sira-nia feen neʼebé kumpre kritériu.

Eskola Bíblia nian ba Irmaun sira-neʼebé Laiha Kabenc

• Razaun: Atu ajuda katuas no atan ba kongregasaun neʼebé kaben laiha atu halo knaar ruma. Sira barak neʼebé ramata eskola neʼe sei hetan knaar atu serbí iha fatin neʼebé presiza iha sira rasik nia rai. Balu sei hetan knaar atu serbí iha rai seluk se sira hakarak atu halo nuneʼe.

• Tempu hira: Fulan rua.

• Fatin: Sukursál mak deside fatin atu halaʼo eskola neʼe; baibain halaʼo iha Reuniaun-Fatin.

• Kritériu: Irmaun sira-neʼebé laiha kaben ho tinan 23 toʼo 62 no iha saúde diʼak, no hakarak atu serbí irmaun sira no hakarak atu serbí iha fatin neʼebé presiza haklaken-naʼin liután. (Mc 10:29, 30) Tenke serbí nuʼudar katuas no atan ba kongregasaun ba tinan rua ka liu.

• Oinsá atu tama: Se ita-nia sukursál halaʼo eskola neʼe, reuniaun ba sira neʼebé iha interese atu tuir eskola sei halaʼo iha reuniaun boot ba loron rua. Informasaun liután sei hatoʼo iha reuniaun neʼe.

Eskola Bíblia ba Kaben-Naʼin Kristaund

• Razaun: Atu fó treinu liután ba kaben-naʼin atu sira bele halaʼo diʼak liután sira-nia serbisu ba Maromak Jeová no nia organizasaun. Sira neʼebé ramata eskola neʼe sei hetan knaar atu serbí iha fatin neʼebé presiza iha sira rasik nia rai. Balu sei hetan knaar atu serbí iha rai seluk se sira hakarak atu halo nuneʼe.

• Tempu hira: Fulan rua.

• Fatin: Klase balu halaʼo daudauk iha Watchtower Educational Center iha Patterson, Novaiorke, rai-Estadus Unidus. Liutiha neʼe, eskola neʼe sei halaʼo iha fatin neʼebé sukursál hili, baibain iha Reuniaun-Fatin.

• Kritériu: Kaben-naʼin ho idade 25 toʼo 50 neʼebé iha saúde diʼak no bele serbí iha fatin naran deʼit neʼebé presiza no hatudu hahalok hanesan profeta Isaías neʼebé dehan: “Haʼu mak neʼe! Haruka haʼu bá.” (Isa 6:8) No mós, sira tenke kaben ba tinan rua ka liu no agora daudauk serbí Maromak ba tempu-tomak durante tinan rua ka liu.

• Oinsá atu tama: Se ita-nia sukursál halaʼo eskola neʼe, reuniaun ba sira neʼebé iha interese atu tuir eskola sei halaʼo iha reuniaun boot ba loron ida. Informasaun liután sei hatoʼo iha reuniaun neʼe.

Watchtower Bible School of Gilead (Eskola misionáriu nian)

• Razaun: Atu fó treinu ba pioneiru sira no atan tempu-tomak atu serbí nuʼudar misionáriu.

• Tempu hira: Fulan lima.

• Fatin: Watchtower Educational Center, Patterson, Novaiorke, rai-Estadus Unidus.

• Kritériu: Kaben-naʼin neʼebé hetan ona batizmu ba tinan tolu ka liu, ho tinan 21 toʼo 38 kuandu hatama formuláriu ba dala primeiru. Tenkesér koʼalia Inglés no kaben ba tinan rua ka liu no agora daudauk serbí Maromak ba tempu-tomak durante tinan rua. Tenke iha saúde diʼak. Pioneiru sira-neʼebé serbí iha rai seluk (inklui sira-neʼebé hetan knaar nuʼudar misionáriu); katuas área no katuas vizitante; sira-neʼebé serbí iha Betel, tuir tiha Eskola Treinu Atan Kristaun, Eskola Bíblia nian ba Irmaun sira-neʼebé Laiha Kaben no Eskola Bíblia ba Kaben-Naʼin Kristaun bele prenxe formuláriu se sira kumpre kritériu.

• Oinsá atu tama: Sukursál balu sei halaʼo reuniaun ba sira-neʼebé interese atu tuir eskola neʼe. Reuniaun neʼe sei halaʼo iha reuniaun boot ba loron tolu. Informasaun liután sei hatoʼo iha reuniaun neʼe. Se reuniaun neʼe la halaʼo iha ita-nia reuniaun boot ba loron tolu, maibé ita hakarak atu tuir eskola neʼe, ita bele hakerek ba sukursál atu hetan informasaun liután.

Eskola ba Grupu Koordenadór ba Sukursál no Sira-nia Feen

• Razaun: Atu ajuda sira-neʼebé serbí iha Grupu Koordenadór ba Sukursál atu halo didiʼak knaar atu tau matan serbisu neʼebé halaʼo iha Betel, inklui tradusaun, halo livru sira, haruka livru no departamentu sira seluk; no mós fó atensaun ba serbisu haklaken neʼebé kongregasaun sira halaʼo, no tau matan ba katuas área no katuas vizitante nia serbisu.—Lc 12:48b.

• Tempu hira: Fulan rua.

• Fatin: Watchtower Educational Center, Patterson, Novaiorke, rai-Estadus Unidus.

• Kritériu: Serbí iha Grupu Koordenadór ba Sukursál ka Grupu Koordenadór ba Rai ida, ka hetan ona knaar neʼe.

• Oinsá atu tama: Grupu Administradór sei fó konvite ba irmaun sira-neʼe no sira-nia feen se kumpre kritériu.

[Nota-rodapé]