Hatudu laran-manas

LARAN-MANAS bele halo diskursu sai moris liután. Maski importante atu hatoʼo informasaun neʼebé diʼak, maibé hodi hatoʼo ho laran-manas, ida-neʼe sei book rona-naʼin atu tau atensaun. Ita bele duni atu koʼalia ho laran-manas, no ida-neʼe la depende ba ita-nia kultura ka toman.

Koʼalia ho sentimentu. Kuandu koʼalia ba feto Samaria ida, Jesus dehan katak ema tenke adora Jeová “ho espíritu no lia-loos”. (João 4:24) Sin, ema adora Maromak tanba hafolin nia husi laran no halo tuir lia-loos neʼebé hetan iha Bíblia. Kuandu ema hafolin Maromak husi laran, ida-neʼe sei hatudu sai liuhusi dalan neʼebé nia koʼalia. Nia sei hatudu laran-manas kuandu koʼalia ba ema seluk kona-ba buat neʼebé Jeová fó ona ba ema ho domin. Ninia oin no lian sei hatudu katak nia sente duni nuneʼe.

Entaun, tanbasá mak diskursu-naʼin neʼebé hadomi Jeová no fiar buat neʼebé nia hatete mós dala ruma la koʼalia ho laran-manas? Tuir loloos, la toʼo atu prepara deʼit saida mak nia sei koʼalia. Diskursu-naʼin tenke hafolin informasaun neʼe, no koʼalia ho sentimentu. Hanoin toʼok se nia simu knaar atu koʼalia kona-ba Jesus Kristu nia sakrifísiu. Kuandu nia hatoʼo diskursu, nia laʼós deʼit halo nakonu ninia neon ho informasaun hotu, maibé mós tenke hafolin tansá Jesus nia sakrifísiu importante ba nia no ba rona-naʼin. Nia tenke hanoin oinsá mak nia rasik sente kona-ba Jeová no Jesus Kristu tanba buat furak neʼe. Nia presiza hanoin kona-ba moris diʼak iha futuru neʼebé ema bele hetan, katak moris kontente ho saúde diʼak iha paraízu ba nafatin. Tan neʼe, diskursu-naʼin tenke koʼalia husi laran.

Kona-ba eskriba ida naran Esdras, mestre ida iha Izraél, Bíblia dehan katak nia “prepara ninia laran hodi lee Jeová nia Ukun-Fuan no halo tuir ida-neʼe, no atu hanorin ninia mandamentu sira no ninia tesi-lia iha Izraél”. (Esdras [Ezra] 7:10) Se ita halo nuneʼe, katak ita prepara informasaun no mós prepara ita-nia laran, ita-nia diskursu sei sai husi laran. Hodi koʼalia husi laran kona-ba lia-loos, neʼe bele ajuda rona-naʼin atu haburas domin ba lia-loos.

Hanoin kona-ba ita-nia rona-naʼin. Buat importante ida tan neʼebé ajuda ita atu koʼalia ho laran-manas mak iha fiar katak ita-nia rona-naʼin presiza rona buat neʼebé ita atu fó sai. Neʼe katak kuandu ita prepara diskursu, ita laʼós deʼit halibur informasaun diʼak, maibé mós halo orasaun ba Jeová atu husu ninia ajuda atu bele uza informasaun neʼe hodi fó buat diʼak ba rona-naʼin. (Salmo [Mazmur] 32:8; Mateus 7:7, 8) Hanoin didiʼak kona-ba tansá mak rona-naʼin presiza informasaun neʼe, oinsá ida-neʼe lori buat diʼak ba sira, no oinsá mak ita bele hatoʼo ida-neʼe iha dalan neʼebé ema bele hafolin informasaun neʼe.

Prepara ita-nia informasaun toʼo ita rasik sente katak ita gosta loos. Maski informasaun neʼe laʼós foun, maibé ita bele esplika informasaun neʼe iha dalan neʼebé foun. Se ita prepara buat ruma neʼebé bele ajuda rona-naʼin atu hametin sira-nia relasaun ho Jeová, atu hafolin buat neʼebé Maromak fó, atu tahan hasoru problema iha mundu aat neʼe, ka halo serbisu haklaken diʼak liután, se nuneʼe ita iha duni razaun atu hatoʼo diskursu neʼe ho laran-manas.

Oinsá se ita-nia knaar mak lee iha ema nia oin? Atu lee ho laran-manas, neʼe laʼós deʼit katak ita temi liafuan sira ho loloos no tau fraze sira hamutuk ho loloos. Estuda informasaun neʼebé ita simu. Se ita atu lee parte ruma husi Bíblia, halo riset kona-ba neʼe. Hakaʼas an atu komprende arti husi eskritura sira-neʼe. Hanoin kona-ba oinsá mak ida-neʼe diʼak ba ita no ba rona-naʼin, no lee ida-neʼe ho hakarak atu fó sai buat sira-neʼe ba rona-naʼin.

Ita prepara atu bá haklaken ka lae? Haree fali informasaun no eskritura neʼebé ita planu ona atu uza. Hanoin mós kona-ba saida mak ema hanoin hela. Porezemplu, saida mak foin fó sai iha notísias? Problema saida mak ema hasoru? Kuandu ita prontu ona atu hatudu ba ema katak Maromak nia Liafuan bele hadiʼa problema hotu neʼebé halo sira laran-susar, ita sei hakarak tebes atu koʼalia ba sira, no ita sei hatudu duni laran-manas.

Hatudu laran-manas kuandu koʼalia. Ita bele hatudu laran-manas hodi koʼalia iha dalan neʼebé moris. Ema tenke haree ida-neʼe liuhusi ita-nia oin. Ita-nia lian tenke hatudu katak ita fiar duni buat neʼebé ita koʼalia, maibé keta obriga ema.

Ita presiza tetu didiʼak. Ema balu laran-manas kona-ba buat hotu. Karik sira presiza ajuda atu hatene katak se ema ida koʼalia ho sentimentu demais liu, ninia rona-naʼin sei hanoin deʼit kona-ba nia laʼós kona-ba ninia informasaun. Iha parte seluk, ema neʼebé moedór presiza hetan ajuda atu koʼalia iha dalan neʼebé moris.

Laran-manas mak hanesan buat neʼebé bele daʼet. Se ita hateke ba rona-naʼin no hatoʼo diskursu ho laran-manas, ita-nia rona-naʼin mós sei sai laran-manas. Apolo halo nuneʼe duni, no Bíblia dehan katak nia mak ema neʼebé matenek atu koʼalia. Se ita laran-manas ho Maromak nia espíritu santu, ita-nia diskursu sei book ema atu halo tuir.—Apóstolu 18:24, 25; Roma 12:11.

Hatudu laran-manas tuir informasaun. Kuidadu atu la hatudu laran-manas iha ita-nia diskursu husi primeiru toʼo ikus tanba ida-neʼe bele halo rona-naʼin sai kole. Maski ita hakarak atu book ema atu halo tuir informasaun ruma, maibé karik sira sai baruk ona. Tan neʼe importante atu prepara informasaun hodi bele hatoʼo iha dalan oioin. Kuidadu atu la hatoʼo diskursu iha dalan neʼebé hatudu katak ita la iha interese. Se ita hili didiʼak informasaun, ita sei gosta tebes ida-neʼe. Maibé, iha informasaun balu neʼebé ita presiza hatoʼo ho laran-manas liu fali informasaun seluk, no ita tenke halo ida-neʼe durante ita-nia diskursu.

Ita tenke hatoʼo pontu importante husi ita-nia diskursu ho laran-manas. Baibain pontu sira-neʼe iha objetivu atu book ita-nia rona-naʼin atu halo buat ruma. Tanba ita halo ona ita-nia rona-naʼin fiar, agora ita presiza book sira-nia laran, no hatudu ba sira buat diʼak neʼebé sira bele hetan hodi halo tuir informasaun neʼe. Ita-nia laran-manas sei book ita-nia rona-naʼin nia laran. Diskursu neʼebé moris labele hanesan finje deʼit. Ita tenke iha razaun atu hatudu laran-manas, no ita-nia informasaun sei hatudu kona-ba neʼe.