Fó sai pontu importante ho klaru

SAIDA mak pontu importante sira husi diskursu? Pontu sira-neʼe laʼós pontu neʼebé ita temi lalais deʼit, maibé pontu neʼebé ita presiza esplika ho didiʼak. Ida-neʼe importante hodi hanorin ho klaru.

Atu bele fó sai ho klaru pontu importante sira, ita presiza hili no organiza didiʼak ita-nia informasaun. Baibain, kuandu ita buka informasaun kona-ba tópiku ida, ita hetan informasaun barak liu. Entaun, oinsá mak ita bele hili informasaun ida-neʼebé mak ita sei uza?

Primeiru, hanoin kona-ba ita-nia rona-naʼin. Sira barak hatene ona kona-ba tópiku neʼe ka lae? Sira simu buat neʼebé Bíblia hatete kona-ba tópiku neʼe ka lae? Susar saida deʼit mak sira hasoru nuʼudar sira hakaʼas an atu halo tuir buat neʼebé Bíblia hatete kona-ba neʼe? Segundu, kuandu ita hatoʼo tópiku neʼe ba rona-naʼin, ita presiza hatene saida mak ita-nia objetivu. Matadalan rua neʼe bele ajuda ita atu hatene kona-ba informasaun saida deʼit mak diʼak atu uza ka la uza iha ita-nia diskursu.

Se ita simu nota badak ba ita-nia diskursu no nota neʼe iha ona tema no pontu importante sira, ita presiza uza ida-neʼe. Maibé, se ita halo tuir matadalan rua iha leten kuandu prepara diskursu, ita bele hanorin pontu importante sira iha dalan diʼak liu. Se ita la simu nota badak ba ita-nia diskursu, ita rasik mak presiza hili pontu importante sira.

Bainhira ita hatene ho didiʼak pontu importante sira no organiza informasaun seluk neʼebé apoia pontu sira-neʼe, neʼe sei halo fasil ba ita atu hatoʼo diskursu. No mós, rona-naʼin sei hetan buat diʼak husi diskursu neʼe.

Oinsá atu organiza informasaun. Iha dalan oioin atu organiza ita-nia informasaun, no ita presiza hili dalan neʼebé apoia objetivu ba ita-nia diskursu.

Dalan ida mak organiza informasaun hodi fahe ita-nia diskursu tuir pontu importante sira. No pontu importante ida-idak mak ajuda ita atu kumpre objetivu husi diskursu neʼe. Dalan segundu mak organiza informasaun tuituir malu hodi tuir tempu ba akontesimentu ruma. Porezemplu, ulukliu ita bele koʼalia kona-ba buat neʼebé mosu antes Rai-Nabeen, tuirmai kona-ba akontesimentu sira antes Jeruzalein naksobu iha tinan 70, no ikusliu koʼalia kona-ba akontesimentu sira iha ita-nia tempu. No dalan tolu atu organiza ita-nia informasaun mak hodi esplika razaun no rezultadu. Porezemplu, ita bele konta uluk kona-ba situasaun ida, no neʼe mak hanesan razaun, no tuirmai ita bele konta kona-ba rezultadu husi situasaun neʼe. Dalan haat mak halo komparasaun. Porezemplu, ita bele kompara buat neʼebé diʼak ho buat neʼebé aat. Dala ruma, diskursu ida bele uza dalan ida ka liu husi dalan sira-neʼe.

Kuandu ema duun matak Estevão iha Sinédriu nia oin, nia hatoʼo diskursu hodi uza dalan segundu, neʼe mak konta akontesimentu tuituir malu. Nuʼudar ita lee ida-neʼe iha Apóstolu 7:2-53, haree toʼok oinsá Estevão hili pontu importante sira. Ulukliu, Estevão hatudu ho klaru katak nia konta istória neʼebé ninia rona-naʼin sira la bele nega. Tuirmai, nia hatete katak maski José nia maun sira la gosta nia, maibé Maromak uza nia atu fó salvasaun ba sira. Depois, Estevão hatudu oinsá ema judeu sira la halo tuir Moisés, ema neʼebé Maromak uza. No nia ramata hodi hatete ho klaru katak hahalok neʼebé ema judeu iha tempu uluk hatudu, hanesan deʼit ho ema judeu neʼebé oho Jesus Kristu.

Labele uza pontu barak liu. Ita presiza pontu importante balu deʼit atu esplika tema ida. Dala barak, neʼe la liu pontu lima. Ida-neʼe loos maski ita hatoʼo diskursu ba minutu 5, minutu 10, minutu 30, ka naruk liu. Labele uza pontu importante barak demais. Rona-naʼin bele hanoin-hetan deʼit ideia balu husi diskursu ida. Se ita hatoʼo diskursu neʼebé naruk, importante liu atu halo klaru ba rona-naʼin kona-ba pontu importante sira husi diskursu neʼe.

Ita presiza uza tempu neʼebé natoon atu esplika pontu importante ida-idak. Fó tempu ba rona-naʼin atu hanoin didiʼak pontu ida-idak hodi bele kuda iha sira-nia laran.

Maski ita hatoʼo informasaun barak ka uitoan deʼit, maibé importante atu halo ita-nia diskursu fasil atu komprende. Se tópiku ida iha pontu importante balu deʼit no uza tempu atu esplika didiʼak pontu sira-neʼe, ema sei komprende no la haluha ita-nia diskursu.

Halo klaru pontu importante sira. Se ita organiza didiʼak informasaun neʼebé ita sei hatoʼo, neʼe sei halo fasil ba ita atu fó sai ho klaru ita-nia pontu importante sira.

Dalan importante atu hatudu sai ho klaru pontu importante sira mak hodi fó evidénsia, lee eskritura, no uza buat seluk tan neʼebé apoia pontu sira-neʼe. No se ita uza pontu seluk tan, uza pontu sira-neʼe atu halo klaru, prova, ka apoia pontu importante. Labele aumenta informasaun neʼebé ladún importante tan deʼit ita gosta. Bainhira fó sai informasaun seluk, diʼak atu hatudu ho klaru oinsá ida-neʼe liga ho pontu importante. Labele husik ba rona-naʼin atu buka-hatene rasik oinsá informasaun neʼe liga ho pontu importante. Ita bele hatudu oinsá neʼe liga hodi repete fali liafuan balu husi pontu importante sira.

Diskursu-naʼin balu fó sai pontu importante sira hodi fó númeru ba pontu sira-neʼe. Maski ida-neʼe dalan diʼak ida atu fó sai pontu importante sira, maibé la haluha atu hili ho didiʼak pontu importante sira no hatoʼo ida-neʼe iha dalan neʼebé klaru.

Dala ruma, ita mós bele fó sai kedas pontu importante no depois mak fó evidénsia atu apoia ida-neʼe. Ida-neʼe sei ajuda rona-naʼin atu hakarak rona buat neʼebé ita sei hatete tuirmai, no sei halo klaru liután pontu importante neʼe. Esplika hotu tiha, ita bele ajuda rona-naʼin atu la haluha pontu importante neʼe hodi temi fali ho liafuan simples.

Iha serbisu haklaken. Matadalan neʼebé ita foin koʼalia bele duni ajuda ita kuandu ita hatoʼo diskursu. Maibé, ita mós bele halo tuir matadalan hirak-neʼe kuandu ita haklaken. Kuandu ita prepara liafuan atu koʼalia ba ema iha haklaken-fatin, diʼak atu buka-hatene kona-ba susar saida mak ema iha fatin neʼe hasoru daudaun. Depois, hili tópiku ida neʼebé diʼak atu hatudu oinsá ita-nia esperansa husi Bíblia sei hadiʼa susar neʼe. Karik hili pontu importante rua neʼebé ajuda ita esplika tópiku neʼe. Hili eskritura sira neʼebé ita bele uza atu apoia pontu sira-neʼe. Tuirmai, hanoin oinsá mak ita bele komesa koʼalia ho uma-naʼin. Ida-neʼe sei ajuda ita atu koʼalia tuir uma-naʼin nia presiza. Neʼe mós sei ajuda ita atu koʼalia buat neʼebé uma-naʼin sei nunka haluha.