Konsellu neʼebé book ema nia laran

KATUAS kristaun sira presiza “book ema nia laran liuhusi hanorin neʼebé diʼak”. (Tito 1:9) Dala ruma, sira presiza halo ida-neʼe iha situasaun neʼebé susar. Importante atu fó konsellu hodi tuir Bíblia nia matadalan. Tan neʼe, katuas sira presiza halo tuir konsellu neʼebé dehan: “Kontinua hakaʼas an iha ó-nia knaar atu . . . fó laran-manas.” (1 Timóteo 4:13) Maski lisaun neʼe liuliu ba katuas kongregasaun sira, no mós ba irmaun sira neʼebé hakarak hetan knaar neʼe, maibé dala ruma, inan-aman sira mós presiza fó konsellu ba sira-nia oan. Ita mós dala ruma presiza fó konsellu ba ita-nia estudante Bíblia. Iha situasaun hanesan neʼe, ita mós bele uza matadalan iha lisaun neʼe.

Iha situasaun saida mak ita presiza fó konsellu? Atu hatene ida-neʼe, diʼak atu hanoin kona-ba ezemplu balu iha Bíblia kona-ba fó konsellu ba ema seluk. Apóstolu Pedro fó laran-manas ba katuas kongregasaun atu kaer didiʼak sira-nia knaar atu tau matan ba Maromak nia bibi sira. (1 Pedro 5:1, 2) Apóstolu Paulo dehan ba Tito atu fó laran-manas ba mane joven atu “iha hanoin neʼebé loos”. (Tito 2:6) Nia mós fó konsellu ba maluk kristaun sira atu ‘sai laran ida deʼit iha sira-nia koʼalia’ no atu kuidadu ba ema neʼebé hamosu haketak malu. (1 Korinto 1:10; Roma 16:17; Filipe 4:2) Apóstolu Paulo gaba ema kristaun iha Tesalónika tanba sira-nia hahalok diʼak, no nia mós fó laran-manas ba sira atu halo tuir didiʼak konsellu neʼebé sira simu. (1 Tesalónika 4:1, 10) Pedro fó konsellu ba ninia maluk sira atu “kontinua hasees an husi hakarak isin nian”. (1 Pedro 2:11) Judas fó laran-manas ba ninia maluk sira atu “luta makaʼas hodi defende fiar” tanba ema aat sira neʼebé halo hahalok neʼebé la iha moe. (Judas 3, 4) Ema kristaun sira mós hetan konsellu atu fó laran-manas ba malu atu sira-nia laran la sai toos tanba sala nia kbiit atu lohi. (Ebreu 3:13) Pedro fó laran-manas ba ema judeu sira neʼebé seidauk tau fiar ba Jesus hodi dehan: “Salva imi-nia an bá husi jerasaun aat neʼe.”—Apóstolu 2:40.

Hahalok saida mak ita presiza atubele fó konsellu iha situasaun sira hanesan neʼe? No oinsá mak ita bele fó konsellu ho laran-manas no iha tempu hanesan la obriga ka siʼak ema?

Fó konsellu ‘tan domin’. Se ita fó konsellu la ho domin, karik ema sei hanoin katak ita siʼak sira. (Filemon 9) Tuir loloos, dala ruma ita presiza fó konsellu neʼebé importante tebes, no ita tenke hatudu neʼe liuhusi ita-nia lian. No se ita koʼalia ho lian neineik liu, karik ema sei hanoin katak ita la fiar no moe. Maibé, ita presiza fó konsellu neʼe husi laran no hanoin ema nia sentimentu. Kuandu ita fó konsellu ho domin, neʼe bele kona duni ema nia laran. Apóstolu Paulo koʼalia kona-ba ninia an no ninia maluk sira bainhira nia hatete ba ema Tesalónika: “Imi hatene ho didiʼak katak ami kontinua fó laran-manas . . . ba imi ida-idak, hanesan aman ida halo ba ninia oan.” (1 Tesalónika 2:11) Katuas kristaun sira-neʼe fó konsellu ba kongregasaun ho domin. Kuandu ita fó konsellu, ita mós presiza halo ida-neʼe hodi hanoin ema.

Kuandu ita fó konsellu, ita presiza kuidadu atu la halo ida-neʼe iha dalan neʼebé halo ema hirus ka la simu. Maibé ita hakarak hatoʼo ba rona-naʼin “Maromak nia hakarak hotu”. (Apóstolu 20:27) Sira neʼebé hafolin Maromak nia konsellu sei la sente laran-kanek tanba ita fó laran-manas ba sira atu halo buat neʼebé loos.—Salmo (Mazmur) 141:5.

Dala barak, antes atu fó konsellu ba ema ruma, diʼak atu gaba uluk sira. Hanoin kona-ba buat diʼak neʼebé irmaun-irmán sira halo daudaun, hodi halo Jeová kontente. Karik ita bele gaba sira tanba sira hatudu fiar liuhusi hahalok. Ka ita mós bele gaba sira tanba sira-nia domin neʼebé book sira atu hakaʼas an, ka ita bele gaba sira tanba sira tahan situasaun neʼebé susar. (1 Tesalónika 1:2-8; 2 Tesalónika 1:3-5) Se ita halo ida-neʼe, ita-nia irmaun-irmán sira sei hatene katak ita hafolin no komprende sira, no bele halo fasil liu ba sira atu simu konsellu neʼebé ita sei fó.

Fó konsellu ho “pasiénsia”. Kuandu ita fó konsellu, diʼak atu halo ida-neʼe ho “pasiénsia”. (2 Timóteo 4:2) Neʼe katak sá loos? Ita hatudu pasiénsia kuandu tahan hasoru situasaun susar ka kuandu ema halo aat ba ita. Ema neʼebé hatudu pasiénsia iha fiar metin katak ninia rona-naʼin sei halo tuir ninia konsellu. Se ita la iha pasiénsia kuandu fó konsellu, rona-naʼin sei sente katak ita hanoin aat sira. Maibé se ita hatudu katak ita fiar duni irmaun-irmán sira hakarak serbí Jeová ho laran tomak, neʼe sei book sira atu halo buat neʼebé loos.—Ebreu 6:9.

Fó konsellu “liuhusi hanorin neʼebé diʼak”. Oinsá mak katuas kristaun ida bele “book ema nia laran liuhusi hanorin neʼebé diʼak”? Nia bele halo ida-neʼe hodi “kaer metin ba liafuan neʼebé loos iha dalan neʼebé nia hanorin”. (Tito 1:9) Duké koʼalia tuir deʼit ita-nia hanoin rasik, ita presiza uza Maromak nia Liafuan nuʼudar hun ba ita-nia hanorin. No konsellu neʼebé ita fó tenke tuir Bíblia nia matadalan. Hatudu tansá mak diʼak atu halo tuir Bíblia. Esplika mós kona-ba rezultadu aat neʼebé bele mosu agora ka iha futuru se ita la halo tuir Bíblia nia matadalan. Uza razaun sira-neʼe atu book rona-naʼin nia laran hodi halo tuir konsellu neʼebé ita fó.

Hakaʼas an atu esplika ho klaru kona-ba saida mak sira presiza halo no oinsá mak atu halo ida-neʼe. Ita mós tenke hatudu ho klaru katak ita-nia konsellu mai husi Bíblia. Se eskritura sira fó lisensa ba ema atu halo desizaun rasik, diʼak atu ita esplika ho klaru kona-ba neʼe. Tuirmai, kuandu ita ramata, hakaʼas an atu book rona-naʼin nia laran hodi sira hakarak atu halo buat neʼebé loos.

Fó konsellu hodi hatudu ezemplu. Atu bele fó konsellu neʼebé book ema nia laran, ita tenke sente “livre atu koʼalia kona-ba fiar”. (1 Timóteo 3:13) Entaun saida mak bele ajuda ita atu koʼalia ho livre? Buat ida mak ita-nia “ezemplu kona-ba halo hahalok diʼak” presiza tuir duni buat neʼebé ita dehan ba ema atu halo. (Tito 2:6, 7; 1 Pedro 5:3) Se ita halo ida-neʼe, ema neʼebé simu konsellu sei haree katak ita la haruka sira atu halo buat neʼebé ita rasik la halo. Sira sei haree katak sira bele banati-tuir ita-nia fiar nuʼudar ita banati-tuir Kristu.—1 Korinto 11:1; Filipe 3:17.

Se ita fó konsellu ka fó laran-manas ba ema hodi uza Maromak nia Liafuan no hatoʼo ho domin, ida-neʼe bele lori buat diʼak. Sira neʼebé iha knaar atu fó konsellu tenke hakaʼas an atu halo ida-neʼe ho didiʼak.—Roma 12:8.