Haklaken ho badinas!
1. Apóstolu Paulo fó laran-manas ba ita ohin loron atu halo saida?
1 “Haklaken liafuan neʼe, halo nuneʼe ho badinas.” (2 Tim 4:2, MF) Tansá mak apóstolu Paulo nia liafuan neʼe importante tebes ba ita ohin loron? Oinsá mak liafuan neʼe kona ita-nia moris no mós ema seluk?
2. Tansá mak ita hakarak buka ema neʼebé seidauk rona lia-foun diʼak?
2 Atubele hetan salvasaun: Ema rihun ba rihun iha mundu tomak seidauk rona lia-foun diʼak neʼebé bele lori sira ba salvasaun. (Rom 10:13-15; 1 Tim 4:16) Maski ita haklaken beibeik iha área ida, maibé ita sei hasoru ema barak neʼebé kontente atu simu ita-nia mensajen. Se ita haklaken iha loron ka oras neʼebé lahanesan baibain, karik ita bele hetan ema oioin. Kuandu ita badinas hodi halo nuneʼe, ita bele iha laran neʼebé moos, no ita sei la simu sala kona-ba ema nia raan.—Apos 20:26.
3. Oinsá mak ita bele uza didiʼak ita-nia tempu iha serbisu haklaken?
3 Ema kristaun iha apóstolu sira-nia tempu ‘hakonu Jeruzalein ho sira-nia hanorin’, maski ema barak kontra hasoru sira. (Apos 5:28) Ita mós laran-manas atu “fó sasin ho didiʼak” ka lae? (Apos 10:42, MF) Ita uza didiʼak ita-nia tempu iha serbisu haklaken ka lae? Porezemplu, kuandu ita hein maluk neʼebé halo vizita fali, ita buka oportunidade atu koʼalia ho ema iha dalan ka lae?
4. Oinsá mak haklaken ho badinas ajuda ita atu matan-moris nafatin?
4 Matan-moris nafatin: Tanba mundu aat neʼe besik ona atu ramata, ita tenke matan-moris nafatin. (1 Tes 5:1-6) Kuandu ita koʼalia beibeik kona-ba esperansa husi Maromak nia Reinu, ida-neʼe ajuda ita atu la hanoin demais kona-ba ita-nia moris iha mundu neʼe. (Lc 21:34-36) Maibé hodi “hein” ba Maromak Jeová nia loron atu mai, ida-neʼe book ita atu aumenta ita-nia serbisu haklaken neʼebé bele salva ema nia moris.—2 Ped 3:11, 12.
5. Oinsá mak ita bele hatudu katak ita hafolin ema nia moris?
5 Kuandu ita haklaken ho badinas, ita haleno Maromak Jeová nia haree kona-ba ema nia moris: “[Maromak] lakohi katak ema ida lakon, maibé atu ema hotu bele hakribi nia sala.” (2 Ped 3:9; Eze 33:11) Mai ita hakaʼas an atu koʼalia ba ema hotu iha ita-nia haklaken-fatin, atu fó glória ba Maromak Jeová!—Sal 109:30.