Ita Hakarak Hatene Lia-Loos ka lae?

LIA-LOOS kona-ba saida? Lia-loos kona-ba pergunta sira-neʼebé importante tebes iha ita-nia moris. Karik Ita mós husu ona pergunta tuirmai neʼe:

• Tuir loloos, Maromak hanoin ita ka lae?

• Loron ida ema bele moris iha mundu neʼebé la iha tan funu no terus ka lae?

• Saida mak akontese ba ita kuandu ita mate?

• Iha ka lae esperansa ba ema neʼebé mate ona?

• Orasaun hanesan saida mak Maromak simu?

• Oinsá mak haʼu bele sai kontente?

Iha neʼebé mak Ita bele hetan resposta ba pergunta sira-neʼe? Se Ita bá biblioteka ka loja neʼebé faʼan livru, Ita sei hetan livru barak tebes neʼebé fó resposta oioin deʼit. Problema mak livru ida fó resposta neʼebé lahanesan ho livru sira seluk. No mós, ema barak hanoin katak informasaun husi livru uluk nian la iha folin tan.

Maibé, ita iha livru ida-neʼebé fó resposta neʼebé loos. Livru ida-neʼe sempre fó sai lia-loos. Jesus Kristu hatete iha ninia orasaun ba Maromak: “Ita-nia liafuan mak lia-loos.” (Joao 17:17) Ohin loron, ita bolu Liafuan neʼe nuʼudar Bíblia. Iha pájina tuirmai neʼe, Ita sei haree oinsá mak Bíblia fó resposta neʼebé klaru ba pergunta sira iha leten.

Tuir loloos, Maromak hanoin ita ka lae?

TANSÁ MAK EMA HUSU PERGUNTA IDA-NEʼE: Ita moris iha mundu neʼebé nakonu ho susar no la iha justisa. Relijiaun barak hanorin katak susar neʼebé ita hasoru mak Maromak nia hakarak.

SAIDA MAK BÍBLIA HANORIN: Maromak nunka hamosu buat neʼebé aat. Jó 34:10 hatete: “Maromak nunka halo hahalok aat, no Maromak Forsa Boot Liu Hotu nunka halo hahalok laloos!” Tuir loloos, Maromak nia hakarak mak ita ema atu moris kontente. Tan neʼe mak Jesus hanorin ita atu halo orasaun hanesan neʼe: “Ami Aman iha lalehan, . . . Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.” (Mateus 6:9, 10) Maromak hanoin tebes ita toʼo saran ninia Oan-Mane atu kumpre ninia hakarak ba mundu no ema.—Joao 3:16.

Haree mós Gênesis 1:26-28; Tiago 1:13; no 1 Pedro 5:6, 7.

Loron ida ema bele moris iha mundu neʼebé la iha tan funu no terus ka lae?

TANSÁ MAK EMA HUSU PERGUNTA IDA-NEʼE: Tinan-tinan ema rihun ba rihun mate tanba funu. Iha mundu neʼe, ita hotu hasoru terus iha ita-nia moris.

SAIDA MAK BÍBLIA HANORIN: Maromak fó-hatene katak aban-bainrua nia sei lori dame ba ema hotu iha mundu tomak. Kuandu Maromak nia Ukun, katak Maromak nia governu iha lalehan, mak ukun mundu, ema sei la “aprende tan funu”. Ema sei “tuku sira-nia surik sai ai-suak”. (Isaías 2:4) Maromak sei halakon ema nia susar no terus hotu. Bíblia promete: “[Maromak] sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian [hanesan susar no injustisa neʼebé ema hasoru ohin loron] liu tiha ona.”—Apokalipse 21:3, 4.

Haree mós Salmo 37:10, 11; 46:9; Miquéias 4:1-4; no Mateus 5:5.

Saida mak akontese ba ita kuandu ita mate?

TANSÁ MAK EMA HUSU PERGUNTA IDA-NEʼE: Relijiaun barak hanorin katak ema neʼebé mate ona sei iha klamar neʼebé moris hela. Relijiaun balu hatete katak ema neʼebé mate ona bele halo aat ba ema neʼebé moris hela, no balu tan hatete katak Maromak sei fó kastigu ba ema neʼebé aat iha infernu.

SAIDA MAK BÍBLIA HANORIN: Kuandu ema ida mate, ema neʼe la iha ona. Eclesiastes 9:5 hatete: “Ema neʼebé mate ona, sira la hatene buat ida.” Se sira la hatene buat ida no la sente buat ida, sira la bele halo aat ka halo buat neʼebé diʼak ba ema neʼebé moris.—Salmo 146:3, 4.

Haree mós Gênesis 3:19; Eclesiastes 9:6, 10; no Joao 11:11-14.

Iha ka lae esperansa ba ema neʼebé mate ona?

TANSÁ MAK EMA HUSU PERGUNTA IDA-NEʼE: Ita hotu lakohi mate, maibé hakarak moris kontente hamutuk ho ema neʼebé ita hadomi. Ita hotu hanoin ita-nia família ka kolega neʼebé mate ona, no hakarak hasoru fali sira.

SAIDA MAK BÍBLIA HANORIN: Ema barak neʼebé mate ona sei moris hiʼas. Jesus promete katak “sira hotu neʼebé iha rate laran sei . . . saʼe ba moris-hiʼas”. (Joao 5:28, 29) Ema neʼebé moris hiʼas sei iha oportunidade atu moris haksolok iha mundu neʼebé moos no furak, tanba moris hanesan neʼe mak Maromak nia hakarak husi tempu uluk kedas. Maromak promete katak ema neʼebé halo tuir nia sei moris ba nafatin ho isin neʼebé perfeitu. Porezemplu, Bíblia hatete: “Ema loos rasik sei simu rai, no sira sei moris ba nafatin iha neʼebá.”—Salmo 37:29.

Haree mós Jó 14:14, 15; Lucas 7:11-17; no Apostolu 24:15.

Orasaun hanesan saida mak Maromak simu?

TANSÁ MAK EMA HUSU PERGUNTA IDA-NEʼE: Relijiaun barak hanorin ema atu halo orasaun. Maski nuneʼe, ema barak sente katak Maromak la hatán ba sira-nia orasaun.

SAIDA MAK BÍBLIA HANORIN: Kuandu Jesus hanorin ita kona-ba orasaun, nia haruka ita atu labele “koʼalia barak” hanesan ema seluk neʼebé uza “liafuan barabarak”. (Mateus 6:7) Ida-neʼe katak ita labele dekór ka repete beibeik liafuan sira iha ita-nia orasaun. Se ita hakarak Maromak see tilun ba ita-nia orasaun, ita tenke halo orasaun iha dalan neʼebé tuir Maromak nia hakarak. Atu halo nuneʼe, ita presiza aprende kona-ba Maromak nia hakarak, no depois halo orasaun hodi tuir buat neʼebé ita aprende ona. Iha 1 Joao 5:14, Bíblia hatete: “Wainhira ita husu buat ruma tuir [Maromak] nia hakarak, Nia rona ita.”

Haree mós Salmo 65:2; Joao 14:6; 16:23, 24; 1 Joao 3:22.

Oinsá mak haʼu bele sai kontente?

TANSÁ MAK EMA HUSU PERGUNTA IDA-NEʼE: Ema barak hanoin katak osan barak, naran-boot, ka sai bonitu ka bonita, sei halo sira-nia moris kontente. Tan neʼe, sira hakaʼas an atu buka buat sira-neʼe. Maibé bainhira hetan tiha, sira nafatin la kontente.

SAIDA MAK BÍBLIA HANORIN: Jesus koʼalia kona-ba buat neʼebé importante atu moris kontente, hodi hatete: “Ksolok ba ema sira neʼebé kiak iha laran.” (Mateus 5:3) Ema neʼebé “kiak iha laran” sente katak nia kuran buat ida iha laran. Entaun, se ita sente katak ita presiza rona lia-loos kona-ba Maromak no ninia hakarak, no hakaʼas an atu buka lia-loos neʼe, ita bele sai kontente. Lia-loos neʼe bele hetan iha Bíblia laran deʼit. Hodi hatene lia-loos neʼe, ita bele hatene buat neʼebé importante duni no mós buat neʼebé ladún importante. Se ita husik lia-loos iha Bíblia laran mak hatudu dalan mai ita, ita bele halo desizaun neʼebé diʼak no halo ita-nia moris sai kontente.—Lucas 11:28.

Haree mós Provérbios 3:5, 6, 13-18 no 1 Timoteo 6:9, 10.

Toʼo iha neʼe, Ita hetan ona resposta simples husi Bíblia ba pergunta neen. Ita hakarak aprende liután ka lae? Se Ita hanesan ema neʼebé “kiʼak iha laran”, Ita sei hakarak duni. Karik Ita iha pergunta seluk tan, hanesan: ‘Se Maromak hanoin ita, tansá mak nia husik ema hetan susar no terus? Oinsá mak haʼu bele halo haʼu-nia moris família nian sai kontente?’ Bíblia fó resposta kapás ba pergunta sira-neʼe no mós ba pergunta seluk tan.

Maibé, ema barak sente laran-rua kona-ba estuda Bíblia. Sira hanoin katak Bíblia mak livru neʼebé mahar no susar atu komprende. Ita hakarak ka lae, atu simu ajuda hodi hetan resposta husi Bíblia ba Ita-nia pergunta sira? Testemuña ba Jeová hakarak ajuda Ita atu hatene liután kona-ba Bíblia liuhusi buat rua tuirmai neʼe.

Primeiru, livru Tuir Loloos, Saida mak Bíblia Hanorin? bele ajuda ema neʼebé ladún iha tempu atu hetan resposta neʼebé klaru ba pergunta sira neʼebé importante tebes. Segundu mak programa estudu Bíblia neʼebé gratis. Ema Testemuña ba Jeová, neʼebé hela besik Ita, bele koʼalia ho Ita kona-ba Bíblia semana ida dala ida iha Ita-nia uma ka iha fatin seluk neʼebé diʼak, no hanorin Bíblia ba Ita. Ita lalika selu ba estudu Bíblia ida-neʼe. Programa ida-neʼe halaʼo daudauk iha mundu tomak no ajuda ona ema barak tebetebes. Sira barak hatete: “Haʼu hetan ona lia-loos!”

Lia-loos hanesan rikusoin neʼebé folin-boot tebes. Lia-loos husi Bíblia sei halo ita livre husi ema nia hanorin neʼebé sala, no ajuda ita atu sente katak ita sai husi nakukun laran. Lia-loos neʼe fó esperansa no halo ita kontente. Jesus hatete: “Imi sei hatene lia-loos, no lia-loos sei halo imi la atan ona.”—Joao 8:32.