LISAUN 20
Ohin loron, oinsá mak Grupu Administradór halaʼo sira-nia serbisu?
Grupu administradór iha apóstolu sira-nia tempu
Lee karta husi grupu administradór
Iha apóstolu sira-nia tempu, iha grupu kiʼik ida iha Jeruzalein, katak “apóstolu no katuas sira” neʼebé serbí nuʼudar grupu administradór hodi halo desizaun importante neʼebé lori benefísiu ba kongregasaun Kristaun neʼebé iha esperansa atu bá lalehan. (Apóstolu 15:2) Atu foti desizaun ho laran ida deʼit, ulukliu sira koʼalia hamutuk kona-ba saida mak Eskritura hatete no halo tuir matadalan husi espíritu santu. (Apóstolu 15:25) Ohin loron, Grupu Administradór mós halo hanesan neʼe.
Grupu Administradór halaʼo Maromak nia hakarak. Ohin loron, irmaun sira neʼebé serbí nuʼudar Grupu Administradór iha duni interese ba Maromak nia Liafuan no iha esperiénsia barak kona-ba oinsá atu dirije Maromak nia serbisu. Semana-semana, sira halo reuniaun atu koʼalia kona-ba Maromak nia povu nia presiza iha mundu tomak. Hanesan grupu administradór iha apóstolu sira-nia tempu, sira mós fó matadalan husi Bíblia liuhusi karta ka liuhusi katuas sira neʼebé bá vizita kongregasaun. Ida-neʼe ajuda Maromak nia povu iha mundu tomak atu iha hahalok no hanoin neʼebé hanesan. (Apóstolu 16:4, 5) Grupu Administradór tau matan ba serbisu atu prepara ai-han espirituál, no sira anima ita hotu atu haklaken ho badinas. Sira mós tau matan ba serbisu atu fó knaar ba irmaun sira neʼebé kumpre kritéria husi Bíblia.
Grupu Administradór halo tuir matadalan husi espíritu santu. Grupu Administradór buka matadalan husi Maromak Jeová, Ukun-Naʼin Boot Liu, no husi Jesus, kongregasaun nia Ulun. (1 Korinto 11:3; Éfeso 5:23) Irmaun sira neʼebé serbí nuʼudar Grupu Administradór la haree sira-nia an nuʼudar ulun ba Maromak nia povu. Sira, hamutuk ho ema Kristaun hotu neʼebé iha esperansa atu bá lalehan, “laʼo tuir Bibi-Oan [Jesus] ba fatin naran deʼit neʼebé nia bá”. (Apokalipse 14:4) Grupu Administradór agradese tebes kuandu ita temi sira iha ita-nia orasaun.
Sé-sé deʼit mak serbí nuʼudar grupu administradór iha apóstolu sira-nia tempu?
Ohin loron, oinsá mak Grupu Administradór buka Maromak nia matadalan?