Saida mak Grupu Administradór husi Testemuña ba Jeová?

Grupu Administradór mak grupu kiʼik ida neʼebé tau matan ba organizasaun Testemuña ba Jeová iha mundu tomak. Sira-nia knaar rua neʼebé importante mak:

• Sira prepara publikasaun, reuniaun no eskola sira husi Testemuña ba Jeová hodi bazeia ba Bíblia.​—Lucas 12:42.

• Sira tau matan ba atividade neʼebé Testemuña ba Jeová halo iha mundu tomak, hanesan dirije serbisu haklaken no toma konta kontribuisaun sira neʼebé ema fó.

Grupu Administradór hakaʼas an halo tuir ezemplu husi “apóstolu no katuas sira” iha tempu uluk, neʼebé halo desizaun importante oioin ba kongregasaun Kristaun. (Apóstolu 15:2) Hanesan ho apóstolu no katuas sira iha tempu uluk, la iha ema ida husi Grupu Administradór mak sai ulun-naʼin ba ami-nia organizasaun. Bainhira atu halo desizaun ruma, sira sempre buka uluk matadalan husi Bíblia, tanba sira rekoñese katak Jesus Kristu mak Ulun ba kongregasaun neʼebé Maromak hili ona.​—1 Korinto 11:3; Éfeso 5:23.

Sé deʼit mak membru husi Grupu Administradór?

Membru sira husi Grupu Administradór mak tuirmai neʼe: Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, no Jeffrey Winder. Sira hotu serbí iha Testemuña ba Jeová nia sede-jerál iha Warwick, Novaiorke, Estadus Unidus Amérika.

Oinsá mak Grupu Administradór organiza sira-nia serbisu?

Grupu Administradór forma komisaun neen atu tau matan ba serbisu oioin neʼebé Testemuña ba Jeová halaʼo iha mundu tomak, no membru ida ka rua mak tau matan ba komisaun ida-idak.

• Komisaun Koordenadór nian: Tau matan ba kazu legál sira no dezastre oioin. Ajuda Testemuña ba Jeová sira bainhira ema fó-terus tanba sira-nia fiar, no dezastre ka susar seluk neʼebé kona Testemuña ba Jeová.

• Komisaun Serbisu-naʼin nian: Tau matan ba ema neʼebé serbí iha ami-nia sede-jerál no sukursál sira, fatin sira-neʼe ami hanaran “Betel”.

• Komisaun Editora nian: Tau matan ba departamentu neʼebé prodús no haruka livru sira ba fatin oioin. Tau matan mós ba serbisu atu harii fatin adorasaun, eskritóriu tradusaun no sukursál sira.

• Komisaun Serbisu nian: Tau matan ba serbisu “haklaken liafuan diʼak kona-ba Maromak nia Ukun”.​—Mateus 24:14.

• Komisaun Hanorin nian: Tau matan ba programa edukasaun neʼebé halaʼo liuhusi reuniaun, eskola, gravasaun no vídeo sira.

• Komisaun Hakerek nian: Tau matan ba programa atu hanorin Bíblia liuhusi ami-nia livru no website, no tau matan mós ba serbisu tradusaun.

Kada semana, Grupu Administradór mós halibur hamutuk hodi koʼalia kona-ba organizasaun nia presiza. Iha enkontru neʼe, Grupu Administradór nia membru sira koʼalia kona-ba Eskritura sira, no sira husu Maromak nia espíritu santu atu dirije sira hodi bele foti desizaun ho laran ida deʼit.​—Apóstolu 15:25.

Sé mak Grupu Administradór nia ajuda-naʼin sira?

Sira mak ema Kristaun neʼebé fó apoiu ho laran-metin ba Grupu Administradór nia komisaun ida-idak. (1 Korinto 4:2) Sira iha esperiénsia barak kona-ba serbisu neʼebé sira simu, no sira mós asiste komisaun ida-idak nia enkontru neʼebé halaʼo semana-semana. Iha komisaun nia enkontru, ajuda-naʼin sira hatoʼo deʼit informasaun no sujestaun balu kona-ba sira-nia serbisu, no Grupu Administradór mak halo desizaun, tuirmai, ajuda-naʼin sira halo tuir Grupu Administradór nia desizaun sira-neʼe. Dala ruma sira mós simu knaar husi Grupu Administradór atu vizita maluk Testemuña ba Jeová iha mundu tomak ka hatoʼo diskursu iha reuniaun espesiál, hanesan reuniaun boot tinan nian ka graduasaun Eskola Gilead nian.