Rebeka hakarak halo Jeová kontente

Rebeka mak feto ida neʼebé hadomi Jeová. No nia laʼen naran Isaac, nia mós hadomi Jeová. Oinsá mak Rebeka hasoru Isaac? Oinsá mak Rebeka hatudu katak nia hakarak halo Jeová kontente? Mai ita aprende tan kona-ba nia.

Isaac nia inan-aman mak Abraão ho Sara. Sira hela iha rai-Kanaán. Iha fatin neʼe ema la adora Jeová. Maibé Abraão hakarak nia oan-mane atu kaben ho feto ida neʼebé adora Jeová. Tan neʼe nia haruka ninia atan ida, karik Eliezer, atu bá no buka feen ida ba Isaac iha sidade neʼebé Abraão nia família balu hela. Sidade neʼe naran Haran.

Eliezer laʼo-rai hamutuk ho Abraão nia atan sira seluk. Sira laʼo dook tebes. Sira mós lori kuda-kamelu 10 neʼebé tula hahán no prezente sira. Oinsá mak Eliezer bele hatene feto ida-neʼebé mak atu sai Isaac nia feen? Kuandu Eliezer ho atan sira seluk toʼo Haran, sira para iha bee-posu tanba Eliezer hatene katak lakleur tan ema sei mai hodi kuru bee. Nia halo orasaun ba Jeová hodi dehan: ‘Feto neʼebé Ita-Boot hili mak ida neʼebé sei fó bee mai haʼu no mós ba haʼu-nia kuda-kamelu sira.’

Depois neʼe joven Rebeka mai bee-posu. Bíblia hatete katak nia bonita tebes. Eliezer husu Rebeka atu fó bee ba nia atu hemu no Rebeka hatán: ‘Bele. Haʼu sei kuru bee ba Ita no mós ba Ita-nia kuda-kamelu sira.’ Hanoin toʼok! Kuda-kamelu sira neʼebé hamrook hemu bee barak, tan neʼe Rebeka tenke halai bá-mai atu kuru bee. Ó bele haree Rebeka serbisu makaʼas iha dezeñu neʼe ka lae?— Eliezer hakfodak kona-ba dalan neʼebé Jeová hatán ba ninia orasaun.

Eliezer fó ba Rebeka prezente barak neʼebé furak. Rebeka konvida Eliezer no atan sira seluk ba ninia família nia uma. Eliezer esplika tanbasá mak Abraão haruka nia ba Haran no oinsá Jeová hatán ninia orasaun. Rebeka nia família kontente atu Rebeka kaben ho Isaac.

Maibé tuir ó-nia hanoin, Rebeka hakarak kaben ho Isaac ka lae?— Rebeka hatene katak Jeová mak haruka Eliezer mai Haran. Tan neʼe, kuandu Rebeka nia família husu se nia hakarak bá rai-Kanaán hodi kaben ho Isaac, nia hatán: ‘Sin, haʼu hakarak bá.’ Nia bá kedas ho Eliezer. Kuandu sira toʼo iha rai-Kanaán, nia kaben ho Isaac.

Tanba Rebeka halo tuir buat neʼebé Jeová hakarak nia atu halo, Jeová fó bensaun ba nia. Oinsá? Tinan barak liutiha neʼe, Jesus moris mai husi ninia família. Se ó halo kontente Jeová hanesan Rebeka, Jeová sei fó bensaun mós ba ó.