Rebeca feto neʼebé badinas no hamtaʼuk Maromak

IMAJINA toʼok, Ita hili feto ida nuʼudar feen ba Ita-nia oan. Ita sei hili feto hanesan saida? Nia tenke kumpre kritéria saida deʼit? Ita sei hili feto neʼebé bonita, matenek, laran-diʼak no badinas? Ka nia tenke kumpre kritéria seluk?

Neʼe mak situasaun neʼebé Abraão hasoru. Jeová promete atu haraik bensaun ba Abraão nia bei-oan sira liuhusi ninia oan-mane Isaac. Abraão katuas ona, maibé Isaac seidauk iha feen. (Génesis 12:1-3, 7; 17:19; 22:17, 18; 24:1) Tanba Isaac sei hetan bensaun hamutuk ho ninia feen no sira-nia oan, entaun Abraão halo arranju atu buka feen neʼebé diʼak ba Isaac. Importante liu hotu mak feto neʼe tenke adora Jeová. Tanba la iha feto hanesan neʼe iha rai-Kanaan, fatin neʼebé Abraão hela daudaun, nia tenke buka iha fatin seluk. Ikusmai, feto neʼebé sai Isaac nia feen mak Rebeca. Oinsá mak Abraão bele hetan nia? Nia mak feto neʼebé adora Jeová ka lae? Saida mak ita bele aprende husi ninia ezemplu?

Buka feto neʼebé diʼak

Abraão haruka ninia atan ida neʼebé tinan boot liu, karik Eliezer, atu bá Abraão nia família iha Mezopotámia hodi buka feto ida neʼebé mós adora Jeová atu sai Isaac nia feen. Neʼe mak buat neʼebé sériu toʼo Eliezer tenke jura katak nia sei la buka feto Kanaan. Abraão nia laran-metin kona-ba neʼe mak furak tebes.​—Génesis 24:2-10.

Kuandu Eliezer toʼo iha sidade neʼebé Abraão nia família hela bá, nia lori ninia kuda-kamelu sanulu ba bee-posu. Imajina toʼok! Neʼe mak tempu rai-nakaras, no Eliezer halo orasaun: “Agora haʼu hamriik daudaun besik bee-matan, no feto joven sira husi sidade neʼe sei mai atu kuru bee. Haʼu husu buat tuirmai neʼe: Se haʼu koʼalia ba feto joven ida dehan: ‘Favór ida, hatún ó-nia sanan-rai hodi nuneʼe haʼu bele hemu’, no se nia hatán: ‘Hemu bá, no haʼu mós sei fó-hemu Ita-nia kuda-kamelu sira’, feto neʼe mak ida neʼebé Ita hili ba Ita-nia atan Isaac.”​—Génesis 24:11-14.

Feto hotu iha área neʼe hatene katak kuda-kamelu ida neʼebé hamrook bele hemu bee barak (toʼo litru 100). Entaun, feto neʼebé oferese atu fó-hemu ba kuda-kamelu tenkesér halo serbisu makaʼas. Se nia halo ida-neʼe mesak no la hetan ajuda husi ema seluk, neʼe katak nia iha enerjia, pasiénsia, haraik an, no laran-diʼak ba ema no mós animál.

Saida mak akontese? “Antes nia koʼalia hotu, Betuel nia oan-feto Rebeca, mai ho sanan-rai iha ninia kabaas. Betuel mak oan-mane husi Milca, Naor nia feen. Naor mak Abraão nia maun. Feto joven neʼe bonita loos, nia mak virjen ida, . . . nia laʼo tun atu kuru bee iha bee-matan no enxe nakonu ninia sanan-rai, depois laʼo saʼe fali mai. Iha tempu neʼe duni mak atan neʼe halai bá hasoru feto neʼe no dehan: ‘Favór ida, fó bee uitoan mai haʼu husi ó-nia sanan-rai atu haʼu bele hemu.’ Feto neʼe hatán: ‘Hemu bá, haʼu-nia naʼi.’ Tuirmai nia hatún kedas sanan-rai neʼebé iha ninia kabaas no fó bee ba atan neʼe atu hemu.”—Génesis 24:15-18.

Rebeca kumpre kritéria ka lae?

Rebeca mak Abraão nia maun nia bei-oan, nia laʼós deʼit bonita maibé mós iha hahalok diʼak. Nia la dada an atu koʼalia ba ema oin-foun, no la koko atu besik liu. Nia hatudu laran-diʼak bainhira Eliezer husu bee. Neʼe normál tanba neʼe mak sira-nia toman. Maibé, Rebeca sei halo buat seluk tan neʼebé Eliezer husu iha orasaun ka lae?

Rebeca hatete: “Hemu bá, haʼu-nia naʼi.” Laʼós neʼe deʼit, nia hatutan: “Haʼu mós sei kuru bee ba Ita-nia kuda-kamelu sira toʼo sira hemu hotu.” Nia oferese buat neʼebé baibain ema la espera. Nia la dada tempu, “nia lalais fakar bee restu iha sanan-rai ba animál nia hemu-fatin no halai bá-mai dala barak hodi kuru bee iha bee-posu, atu fó-hemu ba kuda-kamelu hotu”. Rebeca serbisu ho badinas. Bíblia dehan: “Durante tempu hotu, atan-mane neʼe nonook deʼit hodi hateke ba nia ho hakfodak.”​—Génesis 24:19-21.

Depois hatene tiha katak feto joven neʼe mak Abraão nia família, Eliezer hakneʼak no hatoʼo agradese ba Jeová. Nia husu ba feto neʼe se iha fatin ruma ba nia no ninia ema atu toba kalan neʼe ka lae. Rebeca hatán sin, no nia halai fila ba uma atu fó-hatene kona-ba bainaka sira-neʼe.​—Génesis 24:22-28.

Tuirmai, Rebeca nia maun Labão no ninia aman Betuel rona ba Eliezer nia istória, no sira hatene katak Maromak mak dirije buat hotu neʼe. Entaun, klaru katak Rebeca mak ida neʼebé Jeová hili ba Isaac. Sira dehan: “Lori nia bá hodi nia sai feen ba Ita-nia naʼi nia oan-mane tuir buat neʼebé Jeová hatete ona.” Rebeca sente oinsá? Bainhira sira husu se nia prontu bá kedas ka lae, nia hatán ho liafuan Ebraiku ida neʼebé signifika: “Haʼu hakarak bá.” La iha ema ida mak obriga nia. Abraão hatete ona katak “se feto neʼe lakohi”, Eliezer livre husi ninia juramentu ba Abraão. Maibé Rebeca mós haree oinsá Jeová envolve iha arranju neʼe. Entaun nia la dada tempu, nia husik ninia família hodi bá kaben ho mane neʼebé nia nunka hasoru. Desizaun brani hanesan neʼe hatudu katak Rebeca iha fiar neʼebé boot. Nia mak feto neʼebé diʼak duni ba Isaac!​—Génesis 24:29-59.

Bainhira Rebeca hasoru Isaac, nia taka ninia ulun ho veu nuʼudar sinál atu hakruʼuk ba ninia laʼen. Isaac kaben ho Rebeca, no tanba Rebeca hatudu hahalok diʼak, Isaac laran-monu ba nia.​—Génesis 24:62-67.

Oan-kaduak

Rebeca la iha oan maizumenus ba tinan 19. Maibé ikusmai, nia isin-rua. Durante tempu isin-rua, Rebeca hetan susar tanba ninia oan-kaduak luta malu iha ninia knotak, tan neʼe nia harohan ba Jeová. Karik ita mós bele halo buat neʼebé hanesan bainhira iha susar laran. Jeová rona no fó kmaan ba Rebeca hodi fó-hatene nia katak nia sei sai inan ba nasaun rua, no “ida primeiru sei serbí ida segundu”.​—Génesis 25:20-26.

Karik liafuan neʼe mak halo Rebeca hadomi liu ninia oan segundu Jacob, no laʼós neʼe deʼit, labarik naʼin-rua neʼe mós iha diferensa. Jacob “moris ho hahalok loos”, maibé Esaú la interese ho buat espirituál. Esaú iha direitu nuʼudar oan-mane primeiru neʼebé sei simu liman-rohan husi Maromak nia promesa, maibé tan deʼit hahán bikan ida, nia faʼan tiha direitu neʼe ba Jacob. Esaú kaben ho feto Hetes naʼin-rua, neʼe hatudu katak nia la hafolin buat espirituál no neʼe halo ninia inan-aman triste tebes.​—Génesis 25:27-34; 26:34, 35.

Ajuda Jacob hetan bensaun

Bíblia la fó sai katak Isaac hatene ona Jeová nia hakarak atu Esaú tenke serbí Jacob. Maibé, Rebeca no Jacob hatene katak Jacob mak sei simu bensaun. Bainhira Rebeca rona katak Isaac sei haraik bensaun ba Esaú kuandu nia lori hahán husi animál neʼebé nia foin kasa, Rebeca halo kedas buat ruma. Rebeca mak ema neʼebé laran-manas no kaer metin ba ninia desizaun husi tempu joven kedas. Nia “haruka” Jacob atu lori bibi-timur oan rua hodi nia bele prepara hahán neʼebé ninia laʼen gosta. Tuirmai Jacob tenke finje sai hanesan Esaú atu bele hetan bensaun. Jacob taʼuk katak ninia aman sei hatene no fó-malisan ba nia! Maibé Rebeca obriga nia hodi dehan: “Lae, haʼu-nia oan, se ó-nia aman fó-malisan ba ó, haʼu mak sei lori ida-neʼe.” Tuirmai Rebeca teʼin, halo Jacob sai hanesan Esaú, no haruka nia bá hasoru Isaac.​—Génesis 27:1-17.

Ita la hatene tanbasá Rebeca halo nuneʼe. Ema barak la gosta Rebeca nia hahalok neʼe, maibé Bíblia lae. Isaac mós la hirus Rebeca bainhira nia hatene katak Jacob mak simu bensaun. Loloos, Isaac aumenta tan Jacob nia bensaun. (Génesis 27:29; 28:3, 4) Rebeca hatene buat neʼebé Jeová fó sai nanis ona kona-ba ninia oan sira. Entaun nia halo buat ruma hodi Jacob bele hetan bensaun neʼebé mak sai ona ninia direitu. Neʼe tuir duni Maromak nia hakarak.​—Roma 9:6-13.

Haruka Jacob halai ba Haran

Esaú halo planu aat ba Jacob, tan neʼe Rebeca haruka Jacob halai ba Haran toʼo Esaú la hirus tan. Rebeca mós husu lisensa ba Isaac atu konkorda ho ninia planu, maibé ho laran-diʼak nia la temi kona-ba Esaú nia hirus. Nia ho matenek hatete ba Isaac katak nia hanoin barak tanba nia lakohi Jacob kaben ho feto Kanaan. Neʼe book Isaac nia laran atu haruka Jacob bá Rebeca nia família hodi bele hetan feen neʼebé hamtaʼuk Maromak. Bíblia la koʼalia kona-ba Rebeca hasoru fali Jacob ka lae, maibé Rebeca nia hahalok neʼe lori bensaun barak ba nasaun Izraél iha futuru.​—Génesis 27:43–28:2.

Buat neʼebé ita hatene kona-ba Rebeca book ita atu admira nia. Nia bonita tebes, maibé buat neʼebé halo nia bonita liután mak tanba nia hamtaʼuk Maromak. Neʼe mak buat neʼebé Abraão buka husi ninia feto-foun. Rebeca nia hahalok diʼak sira seluk mak liu fali buat neʼebé Abraão espera. Nia fiar metin, brani atu halo tuir Maromak nia hakarak, laran-manas, haraik an no laran-luak, neʼe sai ezemplu diʼak ba feto Kristaun sira ohin loron. Neʼe mak hahalok sira neʼebé Jeová buka husi feto ida neʼebé sai nuʼudar ezemplu mai ita.