Adora Maromak Jeová hamutuk ho família

Hanesan Ita aprende ona iha livru neʼe, Bíblia iha matadalan barak neʼebé bele ajuda Ita no Ita-nia família. Maromak Jeová hakarak Ita-nia família atu moris kontente. Nia promete katak se ita tau uluk ita-nia adorasaun ba nia, ‘buat sira seluk nia sei fó mós ba ita’. (Mateus 6:33) Nia hakarak tebes ita atu sai ninia belun. Tan neʼe, uza oportunidade hotu atu haburas ita-nia relasaun ho Maromak. Atu sai belun ho Maromak mak buat neʼebé folin-boot liu hotu neʼebé ita ema bele hetan.​—Mateus 22:37, 38.

1 HAMETIN ITA-NIA RELASAUN HO MAROMAK JEOVÁ

BUAT NEʼEBÉ BÍBLIA HANORIN: Jeová dehan: “Haʼu sei sai aman ba imi, no imi sei sai oan-mane no oan-feto ba haʼu.” (2 Korinto 6:18) Maromak hakarak ita atu sai ninia belun diʼak. Dalan ida atu halo ida-neʼe mak liuhusi orasaun. Jeová konvida ita atu “halo orasaun beibeik”. (1 Tesalónika 5:17) Nia hakarak tebes atu rona ita fakar ita-nia hanoin no sentimentu hotu. (Filipe 4:6) Kuandu Ita halo orasaun hamutuk ho família, sira sei haree katak Ita fiar metin ba Maromak.

Importante tebes atu koʼalia ba Maromak liuhusi orasaun, maibé ita mós presiza rona ba nia hodi estuda Ninia Liafuan no livru sira seluk kona-ba Bíblia. (Salmo [Mazmur] 1:1, 2) Hanoin kleʼan kona-ba buat neʼebé ita aprende. (Salmo [Mazmur] 77:11, 12) Atu rona ba Maromak, ita mós presiza tuir reuniaun kristaun beibeik.​—Salmo (Mazmur) 122:1-4.

Haklaken ba ema kona-ba Maromak Jeová mak dalan ida tan atu hametin ita-nia relasaun ho Jeová. Se ita koʼalia beibeik kona-ba Maromak, ita sei hakbesik liután ba nia.—Mateus 28:19, 20.

BUAT NEʼEBÉ ITA BELE HALO:

• Loron-loron, fahe tempu atu lee Bíblia no halo orasaun

• Ema hotu iha família presiza haree atividade atu adora Maromak mak importante liu fali halimar nian

2 HAKSOLOK HODI HALAʼO ADORASAUN FAMÍLIA NIAN

BUAT NEʼEBÉ BÍBLIA HANORIN: “Hakbesik ba Maromak, no nia sei hakbesik ba imi.” (Tiago 4:8) Ita presiza halo programa atu halaʼo adorasaun família nian beibeik no halo tuir ida-neʼe. (Gênesis [Kejadian] 18:19) Maibé presiza halo buat seluk tan. Ita mós tenke hanoin Maromak iha buat hotu neʼebé ita halo iha ita-nia moris loroloron nian. Hametin família nia relasaun ho Maromak hodi koʼalia kona-ba nia “kuandu imi tuur iha imi-nia uma no kuandu imi laʼo iha dalan no kuandu imi atu toba no kuandu imi hadeer”. (Deuteronômio [Ulangan] 6:6, 7) Hakaʼas an atu banati-tuir Josué. Nia dehan: “Ba haʼu no haʼu-nia umakain, ami sei serbí Jeová.”—Josué (Yosua) 24:15.

BUAT NEʼEBÉ ITA BELE HALO:

• Halo programa atu hanorin beibeik Ita-nia família. Ita tenke hanorin sira tuir sira ida-idak nia presiza