“Hanoin-hetan ema sira neʼebé dirije imi iha imi-nia leet”

APÓSTOLU PAULO nia liafuan sira-neʼe hakerek iha Ebreu 13:7. Husi loron Pentekostes tinan 33 EC, Naʼi Jesus Kristu nia apóstolu sira neʼebé laran-metin halaʼo knaar nuʼudar grupu administradór. Sira kaer didiʼak knaar atu fó matadalan ba kongregasaun Kristaun neʼebé foin harii. (Após 6:2-4) Maizumenus iha tinan 49 EC, membru sira ba grupu administradór laʼós deʼit Jesus nia apóstolu sira. Bainhira atu halo desizaun kona-ba sirkunsizaun, membru sira ba grupu neʼe inklui “apóstolu no katuas sira” iha Jeruzalein. (Após 15:1, 2) Sira-nia responsabilidade mak atu hanoin no foti desizaun kona-ba asuntu oioin neʼebé kona ema Kristaun hotu. Sira haruka karta no matadalan atu hametin kongregasaun sira no ajuda dixípulu hotu atu serbisu ho hanoin ida deʼit no unidade. Tanba kongregasaun sira halo tuir matadalan husi grupu administradór, rezultadu mak sira hetan bensaun husi Jeová no sira aumenta ba beibeik.​—Após 8:1, 14, 15; 15:22-31; 16:4, 5; Ebr 13:17.

² Depois apóstolu sira mate, ema barak iha kongregasaun laran komesa habelar hanorin falsu oioin. (2 Tes 2:3-12) Hanesan Jesus fó-hatene nanis iha ai-knanoik kona-ba trigu diʼak no duʼut aat, inimigu mai kari duʼut aat (katak ema Kristaun falsu) iha trigu nia leet (katak ema Kristaun neʼebé Maromak hili atu bá lalehan). Grupu rua neʼe moris hamutuk durante tinan atus ba atus toʼo tempu koʼa nian, katak “mundu neʼe nia rohan”. (Mt 13:24-30, 36-43) Durante tempu neʼe, Jesus kontinua apoia ema Kristaun loos neʼebé Maromak hili ona, maibé la iha grupu administradór. Jesus mós la uza ema ruma atu dirije ninia dixípulu sira. (Mt 28:20) Maski nuneʼe, Jesus fó-hatene nanis katak sei iha mudansa durante tempu koʼa nian.

³ Jesus husu pergunta: “Sé loos mak atan laran-metin no matenek?” Tuirmai nia konta ai-knanoik ida neʼebé sai parte ba “sinál” kona-ba “mundu neʼe nia rohan”. (Mt 24:3, 42-47) Jesus esplika katak atan laran-metin neʼe sei badinas atu fó ai-han espirituál ba Maromak nia povu “iha tempu loloos”. Iha apóstolu sira-nia tempu, Jesus uza grupu ida atu dirije ninia dixípulu sira. Nuneʼe mós durante loron ikus sira-neʼe, Jesus uza grupu ida atu sai nuʼudar atan laran-metin, laʼós mane ida deʼit.

BUKA-HATENE SÉ MAK “ATAN LARAN-METIN NO MATENEK”

⁴ Jesus hili sé atu fó ai-han espirituál ba ninia dixípulu sira? Nia uza ema Kristaun neʼebé iha esperansa atu bá lalehan. Bíblia hatete katak sira mak “amlulik neʼebé serbí nuʼudar liurai”, sira hetan knaar atu “‘haklaken kona-ba hahalok kmanek’ husi Ida neʼebé bolu [sira] atu sai husi nakukun hodi tama fali ba ninia naroman neʼebé furak”. (1 Ped 2:9; Mal 2:7; Apok 12:17) Neʼe katak ema Kristaun hotu neʼebé iha esperansa atu bá lalehan mak atan laran-metin neʼe ka lae? Lae, kuandu Jesus halo milagre hodi fó ai-han ba ema-lubun boot hamutuk mane naʼin-5.000 ho feto no labarik sira, nia fahe uluk ai-han ba ninia dixípulu sira, no dixípulu sira mak fahe tutan ai-han ba ema seluk. (Mt 14:19) Entaun, Jesus fó ai-han ba ema barak liuhusi ema uitoan deʼit. Ohin loron, Jesus mós fó ai-han espirituál iha dalan neʼebé hanesan.

⁵ Entaun, “atan neʼebé laran-metin no matenek” mak grupu kiʼik husi irmaun sira ho esperansa atu bá lalehan, neʼebé prepara no fahe ai-han espirituál durante tempu neʼebé Kristu toʼo ona mai. (Lc 12:42) Iha loron ikus sira-neʼe, sira serbí hamutuk nuʼudar “atan laran-metin no matenek” iha sede-jerál. Ohin loron, irmaun sira-neʼe serbí nuʼudar Grupu Administradór husi Testemuña ba Jeová.

⁶ Kristu uza Grupu Administradór atu prepara informasaun neʼebé esplika oinsá Bíblia nia profesia sira kumpre daudaun, no mós fó matadalan oinsá atu aplika Bíblia nia prinsípiu sira iha ita-nia moris loroloron. Sira fahe ai-han espirituál neʼe liuhusi kongregasaun sira husi Testemuña ba Jeová. (Isa 43:10; Gal 6:16) Iha Bíblia nia tempu, atan ida neʼebé ninia naʼi tau fiar, sei hetan knaar atu serbí nuʼudar administradór ba ninia naʼi nia umakain. Nuneʼe mós ohin loron, atan laran-metin no matenek simu responsabilidade atu tau matan ba kongregasaun Kristaun. Neʼe inklui mós tau matan ba serbisu haklaken, programa ba asembleia no reuniaun boot sira, osan no sasán, hili irmaun sira atu halaʼo knaar oioin iha organizasaun, no halo publikasaun oioin neʼebé bazeia ba Bíblia. Buat sira-neʼe hotu lori benefísiu ba “naʼi nia atan sira”.​—Mt 24:45.

⁷ Entaun, sé mak “naʼi nia atan sira”? Neʼe mak ema hotu neʼebé simu ai-han. Foufoun, “naʼi nia atan sira” mak ema neʼebé iha esperansa atu bá lalehan. Maibé tuirmai, “naʼi nia atan sira” mós inklui ema-lubun boot husi “bibi-malae seluk”. (João 10:16) Entaun grupu rua neʼe han ai-han espirituál neʼebé atan laran-metin mak fahe.

⁸ Durante tempu terus boot, Jesus sei mai atu tesi-lia ba mundu aat neʼe, no nia sei fó knaar ba atan laran-metin “atu tau matan ba ninia rikusoin tomak”. (Mt 24:46, 47) Sira neʼebé serbí nuʼudar atan laran-metin sei simu sira-nia kolen atu bá lalehan. Sira mak parte husi ema naʼin-144.000. No sira hotu sei ukun hamutuk ho Kristu iha lalehan. Iha tempu neʼebá, maski atan laran-metin no matenek sei la hela tan iha rai, maibé Jeová no Jesus sei dirije povu neʼebé hakruʼuk ba Mesias nia Ukun liuhusi ema neʼebé sira sei hili atu sai nuʼudar “ulun-naʼin”.​—Sal 45:16.

TANBASÁ ITA PRESIZA ‘HANOIN-HETAN EMA NEʼEBÉ DIRIJE ITA’?

⁹ Iha razaun oioin atu ‘hanoin-hetan sira neʼebé dirije ita’, no tau fiar ba sira. Oinsá neʼe bele lori benefísiu mai ita? Apóstolu Paulo esplika: “Sira kontinua tau matan ba imi nuʼudar ema neʼebé sei hatán ba Maromak, atu nuneʼe sira bele tau matan ba imi ho haksolok laʼós ho halerik, tanba ida-neʼe sei lori buat aat ba imi.” (Ebr 13:17) Entaun, importante tebes atu halo tuir matadalan neʼebé ita simu husi ema sira neʼebé dirije ita, tanba sira tau matan no proteje ita iha dalan espirituál.

¹⁰ Iha 1 Korinto 16:14, Paulo hatete: “Halo buat hotu ho domin.” Kuandu irmaun sira halo desizaun ba Maromak nia povu, desizaun sira-neʼe bazeia ba hahalok neʼebé importante liu hotu, neʼe mak domin. Kona-ba domin, 1 Korinto 13:4-8 hatete: “Domin mak pasiénsia no laran-diʼak. Domin la laran-moras, la gaba an, la foti an. Domin la hatudu hahalok la respeitu, la buka diʼak ba ninia an rasik, la sai hirus lalais. Domin la hanoin fali buat aat neʼebé nia simu. Domin la haksolok ho hahalok la loos, maibé haksolok ho lia-loos. Domin lori todan hotu, fiar buat hotu, tau esperansa ba buat hotu, no tahan buat hotu. Domin nunka lakon.” Tanba desizaun hotu neʼebé irmaun sira halo ba Jeová nia povu mak bazeia ba domin, neʼe bele halo ita sente seguru atu halo tuir desizaun sira-neʼe. Desizaun sira-neʼe hatudu sai Jeová nia domin mai ita.

¹¹ Iha apóstolu sira-nia tempu, Jeová uza mane sala-naʼin atu dirije ninia povu, ohin loron mós hanesan. Tuir loloos husi tempu uluk kedas, Jeová uza beibeik ema sala-naʼin atu kumpre ninia hakarak. Porezemplu, Noé halo ró no haklaken kona-ba Maromak nia loron tesi-lia. (Gén 6:13, 14, 22; 2 Ped 2:5) Moisés simu knaar atu lori Jeová nia povu sai husi rai-Ejitu. (Éx 3:10) Maromak haraik ninia espíritu santu ba mane sala-naʼin sira atu hakerek Bíblia. (2 Tim 3:16; 2 Ped 1:21) Ohin loron mós Jeová uza mane sala-naʼin sira atu dirije serbisu haklaken no hanorin, maski nuneʼe ita nafatin tau fiar ba Maromak nia organizasaun. Tuir loloos, neʼe hametin fali ita-nia fiar tanba ita hatene se Jeová la apoia ita, organizasaun neʼe labele kumpre serbisu hotu neʼebé presiza halo. Durante tempu susar no situasaun oioin, atan laran-metin hatudu ona katak Maromak nia espíritu mak dirije sira. Jeová nia organizasaun neʼebé ita haree ohin loron, simu ona bensaun barak. Tan neʼe, mai ita ho laran tomak apoia no tau fiar ba organizasaun neʼe.

OINSÁ ITA BELE HATUDU SAI ITA-NIA FIAR?

¹² Sira neʼebé simu responsabilidade iha kongregasaun hatudu katak sira tau fiar ba organizasaun kuandu sira halaʼo ho didiʼak sira-nia knaar. (Após 20:28) Nuʼudar haklaken-naʼin, ita ho badinas haklaken husi uma ba uma, halo vizita fali no halaʼo estudu Bíblia. (Mt 24:14; 28:19, 20) Atu bele simu benefísiu husi ai-han espirituál neʼebé atan laran-metin fahe, ita presiza prepara no tuir reuniaun Kristaun sira, inklui mós asembleia no reuniaun boot sira. Ita sei hetan benefísiu barak hodi anima malu kuandu halibur hamutuk ho ita-nia maluk sira iha reuniaun sira-neʼe.​—Ebr 10:24, 25.

¹³ Ita mós bele hatudu sai ita-nia fiar ba organizasaun liuhusi fó kontribuisaun. (Prov 3:9, 10) Bainhira ita haree maluk Kristaun ida neʼebé presiza buat ruma, ita prontu atu ajuda kedas. (Gal 6:10; 1 Tim 6:18) Ita halo nuneʼe tanba hadomi malu hanesan maun-alin, no ita sempre buka oportunidade atu hatudu ba Jeová no ninia organizasaun katak ita agradese ba buat diʼak hotu neʼebé ita simu.​—João 13:35.

¹⁴ Ita mós hatudu katak ita tau fiar ba Maromak nia organizasaun hodi apoia ninia desizaun sira. Neʼe katak ita ho haraik an halo tuir matadalan husi irmaun sira neʼebé simu knaar atu tau matan mai ita, hanesan katuas área no katuas kongregasaun. Irmaun sira-neʼe mak ‘dirije ita’, tan neʼe ita hakarak hakruʼuk no halo tuir sira. (Ebr 13:7, 17) Maski dala ruma ita la komprende ho loloos razaun husi desizaun hotu neʼebé Maromak nia organizasaun halo, maibé kuandu ita apoia desizaun sira-neʼe, ida-neʼe sei lori diʼak mai ita. Rezultadu mak Jeová sei haraik bensaun mai ita tanba halo tuir ninia Liafuan no ninia organizasaun. Hodi halo nuneʼe, ita hatudu katak ita hakruʼuk ba ita-nia Naʼi Jesus Kristu.

¹⁵ Neʼe duni, ita iha razaun barak atu tau fiar ba atan laran-metin no matenek. Satanás, nuʼudar maromak mundu neʼe nian, hakaʼas an tebes atu hafoʼer no koʼalia aat Jeová nia naran no ninia organizasaun. (2 Kor 4:4) Maibé, keta monu ba Satanás nia lasu sira! (2 Kor 2:11) Nia hatene katak “ninia tempu hela uitoan deʼit”, no lakleur tan nia sei tama ba rai-kuak neʼebé kleʼan tebes. Entaun, nia koko makaʼas atu haketak ita husi Maromak Jeová. (Apok 12:12) Tanba Satanás hakaʼas an liután, mai ita hotu hakbesik liután ba Jeová. Tau fiar ba Jeová no ba sira neʼebé Jeová uza atu dirije ninia povu ohin loron. Hodi halo nuneʼe, ita no maluk Kristaun hotu sei iha unidade.