Oinsá Maromak organiza no dirije kongregasaun?

IHA apóstolu Paulo nia karta primeiru ba ema Kristaun iha Korinto, nia esplika lia-loos importante ida kona-ba Maromak, hodi dehan: “Maromak laʼós Maromak runguranga nian, maibé Maromak dame nian.” Tuirmai, nia esplika liután kona-ba kongregasaun nia reuniaun sira, hodi dehan: “Halo buat hotu iha dalan neʼebé loloos no tuir arranju.”​—1 Kor 14:33, 40.

² Iha apóstolu Paulo nia karta neʼe, nia mós fó konsellu ba ema balu neʼebé diskute malu iha kongregasaun Korinto. Paulo husu sira atu “sai laran ida deʼit iha [sira-nia] koʼalia” no mós atu “sai ida deʼit iha [sira-nia] neon no iha hanoin neʼebé hanesan”. (1 Kor 1:10, 11) Depois neʼe, nia fó konsellu ba sira kona-ba buat oioin neʼebé bele halakon unidade iha kongregasaun. Nia kompara kongregasaun hanesan isin-lolon ida no esplika katak sira presiza serbisu hamutuk no haburas unidade. Maski sira halo serbisu neʼebé la hanesan, Paulo anima sira hotu atu hatudu domin no hanoin malu. (1 Kor 12:12-26) Bainhira kongregasaun serbisu hamutuk ho dame, neʼe hatudu katak kongregasaun organiza ho didiʼak.

³ Maibé kongregasaun Kristaun tenke organiza iha dalan oinsá? Sé mak organiza kongregasaun? Kongregasaun Kristaun nia estrutura mak hanesan saida? Sé mak sei simu knaar atu tau matan ba kongregasaun? Mai ita uza Bíblia atu buka resposta ba pergunta sira-neʼe.​—1 Kor 4:6.

ORGANIZA IHA DALAN TEOKRÁTIKU

⁴ Maromak harii kongregasaun Kristaun iha loron Pentekostes, tinan 33 EC. Saida mak ita bele aprende kona-ba kongregasaun iha tempu neʼebá? Maromak organiza no dirije kongregasaun iha dalan teokrátiku ka “Maromak mak ukun”. Liafuan teokrátiku mai husi liafuan Gregu theós katak Maromak no liafuan krátos katak ukun. Liafuan rua neʼe uza iha testu orijinál iha 1 Pedro 5:10, 11. Bíblia esplika kona-ba saida mak akontese iha Jeruzalein besik tinan 2.000 liubá. Akontesimentu neʼe hatudu ho klaru katak Maromak mak harii kongregasaun Kristaun. No sira neʼebé iha kongregasaun neʼe iha esperansa atu bá lalehan. (Após 2:1-47) Kongregasaun neʼe mak uma neʼebé Maromak harii, ka ninia umakain. (1 Kor 3:9; Éf 2:19) Dalan neʼebé Maromak dirije no organiza kongregasaun iha tempu uluk mak ezemplu ba kongregasaun Kristaun ohin loron.

⁵ Kongregasaun primeiru komesa ho dixípulu maizumenus naʼin-120. Maromak fakar ninia espíritu santu ba ema sira-neʼe hodi kumpre liafuan iha Joel 2:28, 29. (Após 2:16-18) Maibé iha loron neʼe, maizumenus ema naʼin-3.000 tan hetan batizmu iha bee laran no sai parte ba kongregasaun Kristaun. Ema sira-neʼe simu no tau fiar ba lia-loos kona-ba Kristu no “ho laran-manas kontinua aprende husi apóstolu sira”. Depois neʼe, “Jeová kontinua aumenta ema barak tan neʼebé sei hetan salvasaun hodi hamutuk ho sira”.​—Após 2:41, 42, 47.

⁶ Kongregasaun iha Jeruzalein sai boot liután toʼo ema Judeu nia amlulik boot sai hirus tanba dixípulu sira halo nakonu Jeruzalein ho sira-nia hanorin. Amlulik Judeu barak no mós ema seluk tan sai dixípulu no sira sai parte ba kongregasaun iha Jeruzalein.​—Após 5:27, 28; 6:7.

⁷ Jesus hatete: “Imi sei sai haʼu-nia testemuña iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu.” (Após 1:8) Neʼe akontese duni. Depois Estevão mate, ema fó-terus makaʼas ba dixípulu sira. Tan neʼe, sira halai namkari bá área Judeia no Samaria. Maibé iha fatin hotu neʼebé sira bá, sira kontinua haklaken liafuan diʼak no hanorin ema sai dixípulu. Sira mós hanorin ema Samaria balu atu sai dixípulu. (Após 8:1-13) Liutiha tempu balu, sira mós haklaken liafuan diʼak ba ema neʼebé seidauk hetan sirkunsizaun, katak ema neʼebé laʼós ema Judeu. (Após 10:1-48) Rezultadu mak ema barak sai dixípulu, no presiza forma tan kongregasaun sira iha área sira neʼebé dook husi Jeruzalein.​—Após 11:19-21; 14:21-23.

⁸ Entaun, Maromak halo arranju saida deʼit atu bele organiza no dirije kongregasaun foun sira-neʼe iha dalan teokrátiku? Maromak uza ninia espíritu santu atu hili mane sira neʼebé serbí nuʼudar bibi-atan hodi tau matan ba Maromak nia bibi. Kuandu Paulo no Barnabé halo viajen primeiru nuʼudar misionáriu, sira hili katuas sira iha kongregasaun ida-idak. (Após 14:23) Bíblia nia hakerek-naʼin ida naran Lucas esplika katak bainhira Paulo hasoru katuas sira husi kongregasaun Éfeso, nia dehan ba sira: “Tau matan didiʼak ba imi-nia an no ba bibi-lubun tomak, tanba espíritu santu hili ona imi nuʼudar katuas sira atu tau matan ba Maromak nia kongregasaun nuʼudar bibi-atan. Nia sosa ona kongregasaun neʼe ho ninia Oan-Mane rasik nia raan.” (Após 20:17, 28) Mane sira-neʼe bele serbí nuʼudar katuas tanba sira kumpre kritéria husi Maromak nia Liafuan. (1 Tim 3:1-7) Paulo nia maluk serbisu-naʼin Tito mós simu responsabilidade atu hili katuas sira iha kongregasaun oioin iha Kreta.​—Tito 1:5.

⁹ Bainhira kongregasaun sira aumenta iha fatin oioin, apóstolu no katuas sira iha Jeruzalein kontinua halaʼo knaar atu tau matan no dirije kongregasaun Kristaun hotu. Sira serbí nuʼudar grupu administradór.

¹⁰ Apóstolu Paulo hakerek ba kongregasaun Éfeso no esplika katak hodi respeitu Jesus Kristu nuʼudar Ulun, kongregasaun Kristaun halo tuir matadalan husi espíritu santu, no sira bele iha unidade nafatin. Apóstolu Paulo anima ema Kristaun sira-neʼe atu haburas hahalok haraik an no “kaer metin nafatin unidade neʼebé [sira] hetan ona liuhusi espíritu” atu bele moris iha dame ho maluk sira iha kongregasaun. (Éf 4:1-6) Tuirmai, nia temi liafuan husi Salmo 68:18 no aplika ida-neʼe ba Jeová nia arranju atu hili mane sira neʼebé kumpre kritéria husi Maromak nia Liafuan atu serbí iha kongregasaun. Sira serbí nuʼudar apóstolu, profeta, haklaken-naʼin, bibi-atan no mestre. Mane sira-neʼe mak hanesan prezente husi Jeová tanba sira hametin ema ida-idak iha kongregasaun atu sai maduru iha dalan espirituál no halo kontente Maromak.​—Éf 4:7-16.

KONGREGASAUN SIRA HALO TUIR APÓSTOLU SIRA-NIA EZEMPLU

¹¹ Ohin loron, Testemuña ba Jeová nia kongregasaun hotu organiza an tuir ezemplu husi apóstolu sira-nia tempu. Kongregasaun sira-neʼe sai nuʼudar kongregasaun ida deʼit iha mundu tomak. No ema iha kongregasaun fó apoiu ba Kristu nia alin sira. (Zac 8:23) Neʼe bele akontese tanba Jesus Kristu nia ajuda. Jesus kumpre ninia promesa hodi kontinua hamutuk ho ninia alin sira “toʼo mundu neʼe nia rohan”. Ema neʼebé sai parte ba kongregasaun neʼe simu liafuan diʼak husi Maromak, dedika an ba Jeová, no hetan batizmu nuʼudar Jesus nia dixípulu. (Mt 28:19, 20; Mc 1:14; Após 2:41) Sira rekoñese “bibi-atan diʼak”, Jesus Kristu, nuʼudar Ulun ba bibi-lubun tomak. Ema neʼebé Maromak hili liuhusi espíritu santu no mós “bibi-malae seluk” sai parte ba bibi-lubun neʼe. (João 10:14, 16; Éf 1:22, 23) Bibi-lubun neʼe bele iha unidade tanba sira rekoñese Kristu nuʼudar sira-nia Ulun no hakruʼuk ba “atan laran-metin no matenek” neʼebé Kristu hili atu organiza buat hotu. Tan neʼe, mai ita hotu kontinua tau fiar tomak ba atan neʼe.​—Mt 24:45.

TANBASÁ PRESIZA ASOSIASAUN RELIJIOZU?

¹² Maromak nia organizasaun harii asosiasaun legál oioin atu bele fó ai-han espirituál iha tempu neʼebé loos no mós atu haklaken liafuan diʼak kona-ba Maromak nia Ukun antes mundu neʼe nia rohan. Asosiasaun legál sira-neʼe rejistu tuir lei sira iha rai oioin, no asosiasaun sira-neʼe apoia malu. Asosiasaun sira-neʼe mós apoia serbisu haklaken iha mundu tomak.

SUKURSÁL NIA ESTRUTURA

¹³ Bainhira forma sukursál foun ida, Grupu Administradór sei hili katuas naʼin-tolu ka liu atu sai membru ba Komisaun ba Sukursál. Irmaun sira-neʼe sei tau matan ba serbisu iha rai sira iha sukursál nia territóriu. Membru ida husi komisaun neʼe mak serbí nuʼudar koordenadór ba Komisaun Sukursál.

¹⁴ Sukursál ida tau matan ba kongregasaun sira hodi organiza kongregasaun sira ba área oioin. Área sira-neʼe dala ruma iha luan neʼebé la hanesan, depende ba rai ida-idak, língua neʼebé ema koʼalia, no mós kongregasaun hira mak iha sukursál neʼe nia territóriu. Irmaun ida neʼebé hetan knaar nuʼudar katuas área mak sei serbí kongregasaun sira iha área ida. Sukursál fó matadalan ba katuas área kona-ba oinsá atu halaʼo ninia knaar no responsabilidade oioin.

¹⁵ Kongregasaun sira simu arranju hotu neʼebé mai husi organizasaun, no arranju sira-neʼe lori benefísiu ba ita. Kongregasaun sira mós apoia katuas sira neʼebé simu knaar atu tau matan ba sukursál, katuas área, no katuas kongregasaun. Kongregasaun sira sadere ba atan laran-metin no matenek atu fó ai-han espirituál iha tempu neʼebé loos. Atan laran-metin mós halo tuir Kristu nuʼudar Ulun, kaer metin ba Bíblia nia prinsípiu sira, no mós prontu atu halo tuir matadalan husi espíritu santu. Bainhira ita hotu serbisu hamutuk ho unidade, ita hetan rezultadu neʼebé hanesan ho ema Kristaun iha apóstolu sira-nia tempu: “Kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik.”​—Após 16:5.