Mantein dame no halo kongregasaun moos nafatin

TINAN-TINAN ema rihun ba rihun kumpre Bíblia nia profesia hodi sai parte ba povu neʼebé halaʼo adorasaun moos. (Miq 4:1, 2) Ita kontente tanba ema sira-neʼe sai parte ba “Maromak nia kongregasaun”. (Após 20:28) Sira agradese tanba iha oportunidade atu serbí Jeová hamutuk ho ita. Sira kontente ho paraízu espirituál neʼebé moos no iha dame. Maromak nia espíritu santu no mós Bíblia nia konsellu sira bele ajuda ita hotu atu mantein dame no halo kongregasaun moos nafatin.​—Sal 119:105; Zac 4:6.

² Bainhira ita aplika prinsípiu sira husi Bíblia, neʼe ajuda ita atu hatudu “hahalok foun”. (Kol 3:10) Ita la diskute malu kona-ba problema kiʼik ka buat neʼebé la importante. Tanba ita iha hanoin hanesan Jeová nian, ita la husik influénsia aat husi mundu estraga ita-nia unidade, no ita serbisu hamutuk ho irmaun-irmán iha mundu tomak.​—Após 10:34, 35.

³ Maski nuneʼe, dala ruma mosu problema neʼebé bele halakon dame no unidade iha kongregasaun. Tanbasá? Dala barak, neʼe akontese tanba ema la aplika matadalan husi Bíblia. Ita presiza luta hasoru ita-nia fraku no sala sira. Ita hotu mak sala-naʼin. (1 João 1:10) Karik ema ida bele halo desizaun sala no neʼe bele hafoʼer kongregasaun iha dalan morál ka espirituál. Karik la ho neon, ita hakanek ema seluk nia laran ho ita-nia liafuan ka hahalok, ka ita rasik sente laran-kanek tanba buat neʼebé ema seluk hatete ka halo. (Rom 3:23) Se ida-neʼe akontese, saida mak ita bele halo atu rezolve problema neʼe?

⁴ Jeová hadomi no hanoin tebes ita hotu. Ninia Liafuan Bíblia fó konsellu kona-ba buat neʼebé ita presiza halo bainhira problema mosu. Katuas sira mak hanesan bibi-atan neʼebé hadomi ita no prontu atu ajuda. Se ita halo tuir sira-nia konsellu neʼebé bazeia ba Bíblia, neʼe bele ajuda ita atu hadame malu fali ho ema seluk no proteje ita-nia relasaun diʼak ho Jeová. Se katuas sira korrije ita ka fó dixiplina ba ita tanba ita halo sala ruma, neʼe hatudu katak ita-nia Aman iha lalehan hadomi ita.​—Prov 3:11, 12; Ebr 12:6.

REZOLVE PROBLEMA KIʼIK

⁵ Dala ruma problema kiʼik bele mosu entre irmaun-irmán sira iha kongregasaun. Importante atu hatudu domin ba malu hodi bele rezolve lalais ida-neʼe. (Éf 4:26; Flp 2:2-4; Kol 3:12-14) Dala barak, Ita bele rezolve lalais problema neʼebé mosu entre Ita ho ema seluk iha kongregasaun hodi aplika apóstolu Pedro nia konsellu atu “hadomi malu tebetebes, tanba ema neʼebé iha domin, sempre prontu atu fó perdua ba sala barak”. (1 Ped 4:8) Bíblia dehan: “Ita hotu halo sala dala barak.” (Tgo 3:2) Se ita aplika Jesus nia konsellu atu halo ba ema seluk buat neʼebé ita hakarak ema halo ba ita, neʼe sei ajuda ita atu fó perdua no haluha deʼit sala kiʼik neʼebé ema halo hasoru ita.​—Mt 6:14, 15; 7:12.

⁶ Se Ita hatene katak Ita hakanek ema nia laran tanba Ita-nia liafuan ka hahalok ruma, Ita labele demora atu hadame malu ho ema neʼe. Hanoin-hetan katak neʼe bele kona Ita-nia relasaun diʼak ho Jeová. Jesus fó konsellu ba ninia dixípulu sira: “Se ó lori daudaun ó-nia prezente ba altár no ó hanoin-hetan katak ó-nia maun-alin hirus ó, husik lai ó-nia prezente iha altár oin, no bá hasoru nia. Halo dame uluk ho ó-nia maun-alin. Tuirmai, kuandu ó fila fali, ó bele hasaʼe ó-nia prezente neʼe.” (Mt 5:23, 24) Dala ruma karik ita la komprende malu. Se nuneʼe, koʼalia nakloke ba malu. Se ema hotu iha kongregasaun hakaʼas an atu iha toman hodi koʼalia ba malu, neʼe bele ajuda sira atu komprende malu, no mós rezolve problema neʼebé mosu tanba ita hotu mak sala-naʼin.

FÓ KONSELLU NEʼEBÉ BAZEIA BA ESKRITURA

⁷ Dala ruma, katuas sira presiza fó konsellu atu hadiʼa ema nia hanoin. Dala barak neʼe la fasil. Apóstolu Paulo hakerek ba ema Kristaun iha Galásia: “Maun-alin sira, se ema ida komesa laʼo sala dalan no nia la hatene kona-ba neʼe, imi neʼebé kumpre Maromak nia kritéria tenke koko atu hadiʼa ema hanesan neʼe ho laran-maus.”​—Gal 6:1.

⁸ Bainhira katuas sira tau matan ba Maromak nia bibi sira, katuas sira sei proteje kongregasaun husi buat neʼebé bele estraga sira-nia relasaun diʼak ho Jeová no mós bele prevene problema sériu oioin. Katuas sira hakaʼas an atu kumpre buat neʼebé Jeová promete kona-ba sira liuhusi profeta Isaias: “Sira ida-idak sei sai hanesan subar-fatin husi anin, no fatin mahon husi udan boot, hanesan bee neʼebé suli iha rai-maran, hanesan mahon husi fatuk boot iha rai neʼebé maran-dekor.”​—Isa 32:2.

TAU MARKA BA EMA NEʼEBÉ LAKOHI HALO TUIR

⁹ Apóstolu Paulo fó avizu kona-ba ema balu neʼebé bele fó influénsia aat ba kongregasaun. Paulo dehan: “Ami fó mandamentu ba imi . . . atu imi hasees an husi maun-alin hotu neʼebé la laʼo tuir dalan neʼebé loos no la tuir hanorin neʼebé imi simu husi ami.” Nia esplika ninia liafuan sira-neʼe, hodi dehan: “Se ema ida lakohi halo tuir ami-nia liafuan liuhusi karta neʼe, tau marka ba ema neʼe, no keta ransu tan ho nia, atu nuneʼe nia sai moe. Maski nuneʼe, keta haree nia nuʼudar inimigu, maibé kontinua fó konsellu ba nia nuʼudar maun-alin ida.”​—2 Tes 3:6, 14, 15.

¹⁰ Dala ruma ema ida la halo sala sériu neʼebé presiza hasai husi kongregasaun, maibé nia hatudu sai ho momoos katak nia la respeitu Maromak nia ukun-fuan no morál sira ba ema Kristaun. Neʼe bele inklui iha toman nuʼudar ema baruk-teen loos, kritika beibeik, ka la moos iha dalan fíziku. Karik nia gosta “mete iha problema neʼebé laʼós [ninian]”. (2 Tes 3:11) Ka karik nia halo planu atu aproveita ema seluk, ka gosta atividade halimar neʼebé la diʼak ka la morál. Ema hanesan neʼe iha hahalok neʼebé bele hafoʼer duni kongregasaun nia naran no bele fó influénsia aat ba irmaun-irmán seluk.

¹¹ Katuas sira sei koko uluk atu ajuda ema neʼe liuhusi fó konsellu neʼebé bazeia ba Bíblia. Maibé se ema neʼe nafatin lakohi halo tuir Bíblia nia prinsípiu sira maski katuas sira fó konsellu beibeik ona, karik katuas sira sei deside atu hatoʼo diskursu hodi fó avizu ba kongregasaun. Katuas sira presiza uza matenek hodi tetu didiʼak kona-ba situasaun ruma atu haree se neʼe mak sériu no bele fó influénsia ba ema barak iha kongregasaun. Se situasaun mak sériu duni, sira presiza hatoʼo diskursu atu fó avizu ba kongregasaun. Kuandu hatoʼo diskursu neʼe, oradór sei fó konsellu neʼebé liga duni ho situasaun neʼe, maibé la presiza temi ema neʼe nia naran. Neʼe sei ajuda ema neʼebé hatene ona kona-ba situasaun neʼe atu la ransu ho ema hanesan neʼe, maibé sira bele kontinua halaʼo atividade espirituál hamutuk no “fó konsellu ba [ema neʼe] nuʼudar maun-alin ida”.

¹² Bainhira irmaun-irmán sira neʼebé laran-metin deside atu la ransu tan ho ema neʼebé hatudu hahalok la diʼak, karik neʼe sei book nia atu sente moe no hadiʼa ninia hahalok. Bainhira ema neʼe hatudu sai ho klaru katak nia husik ona ninia hahalok neʼebé la diʼak, ita la presiza tan atu haree nia nuʼudar ema neʼebé kongregasaun tau marka.

OINSÁ ATU REZOLVE SALA BALU NEʼEBÉ SÉRIU?

¹³ Bainhira ita haluha deʼit ka fó perdua ba ema nia sala, neʼe la dehan katak ita taka matan ba sira-nia sala ka apoia sira-nia sala. Maibé laʼós sala hotu akontese tanba ita mak sala-naʼin. Ita labele taka matan deʼit ba sala neʼebé sériu. (Lev 19:17; Sal 141:5) Tuir Moisés nia Ukun-Fuan, sala balu mak sériu liu fali sala seluk, no prinsípiu neʼe mós aplika ba kongregasaun Kristaun.​—1 João 5:16, 17.

¹⁴ Jesus esplika hakat sira atu rezolve problema sériu neʼebé bele mosu entre maluk Kristaun sira. Nia dehan: “Se ó-nia maun ka alin ida halo sala hasoru ó, [1] bá koʼalia ho nia mesamesak hodi hatudu sai ninia sala. Se nia rona ba ó, neʼe katak ó lori fali ona ó-nia maun ka alin neʼe ba dalan loos. Maibé se nia la rona ba ó, [2] lori tan ema ida ka rua, atu nuneʼe liuhusi sasin naʼin-rua ka tolu nia liafuan mak bele hametin kazu hotu. Se nia la rona sira, [3] bá fó-hatene kongregasaun. Se nia la rona mós ba kongregasaun, haree nia hanesan ó haree ema husi nasaun seluk no kobradór impostu sira.”​—Mt 18:15-17.

¹⁵ Tuir Jesus nia ai-knanoik iha Mateus 18:23-35, ita bele komprende katak karik problema neʼebé temi iha Mateus 18:15-17 mak problema kona-ba osan ka rai, hanesan la selu fali debe ka hamatak ema seluk. Ka karik koʼalia aat ema hodi hafoʼer ema nia naran.

¹⁶ Se Ita iha evidénsia katak ema ida iha kongregasaun halo sala sériu hanesan neʼe hasoru Ita, keta ansi atu husu katuas sira envolve an iha Ita-nia problema. Halo tuir Jesus nia konsellu hodi bá koʼalia uluk ho ema neʼebé halo sala hasoru Ita. Koko atu rezolve problema neʼe entre imi naʼin-rua deʼit, no lalika envolve ema seluk. Hanoin-hetan katak Jesus la dehan: ‘Bá koʼalia ho ema dala ida deʼit kona-ba sira-nia sala.’ Tan neʼe, se ema neʼe lakohi rekoñese ninia sala no la husu perdua, karik diʼak atu buka dalan atu koʼalia fali ho nia iha tempu seluk. Se Ita bele rezolve problema iha dalan hanesan neʼe, ema neʼe sei agradese tanba Ita la konta ba ema seluk kona-ba ninia sala ka hafoʼer ninia naran iha kongregasaun. Hodi halo nuneʼe, Ita ‘lori fali ona Ita-nia maun ka alin ba dalan loos’.

¹⁷ Kuandu ema neʼe rekoñese ninia sala, husu perdua no halo buat ruma atu hadiʼa situasaun, entaun Ita la presiza halo hakat seluk tan neʼebé Jesus fó sai. Maski sala neʼe mak sériu, maibé ema neʼebé envolve an iha problema neʼe bele rezolve rasik sala hanesan neʼe.

¹⁸ Se nia nafatin la rekoñese ninia sala, maski ita “koʼalia ho nia mesamesak”, entaun Ita bele halo tuir Jesus nia liafuan atu “lori tan ema ida ka rua” atu koʼalia fali ho nia. Ita tenke lori ema sira neʼebé hakarak atu ajuda nia. Diʼak liu se ema sira-neʼe mak sasin-naʼin ba hahalok sala neʼebé karik ema neʼe halo. Maibé se la iha sasin-naʼin ba sala neʼe, Ita bele husu ema ida ka rua atu sai sasin ba buat neʼebé Ita sei koʼalia. Karik ema neʼebé Ita lori iha ona esperiénsia kona-ba problema hanesan neʼe, no bele ajuda Ita komprende se ema neʼe nia hahalok sala duni ka lae. Se Ita lori katuas sira atu sai sasin-naʼin, sira la reprezenta kongregasaun, tanba grupu katuas la fó knaar ba sira atu halo nuneʼe.

¹⁹ Se ita labele rezolve problema neʼe maski Ita koko dala balu ona atu koʼalia ho ema neʼe mesamesak, no mós lori ema ida ka rua tan atu koʼalia ho nia, no Ita sente katak Ita labele haluha deʼit problema neʼe, entaun Ita presiza fó-hatene ba katuas sira iha kongregasaun. Hanoin-hetan, katuas sira-nia knaar mak atu mantein dame no halo kongregasaun moos nafatin. Bainhira Ita fó-hatene ona ba katuas sira, Ita presiza husik problema neʼe iha sira-nia liman, no tau fiar ba Jeová. Ita lakohi husik ema seluk nia hahalok halo Ita sidi ka halakon Ita-nia ksolok atu serbí Jeová.​—Sal 119:165.

²⁰ Katuas kongregasaun sira sei buka-hatene kona-ba problema neʼe. Se iha duni evidénsia neʼebé hatudu katak ema neʼe halo sala sériu hasoru Ita, no lakohi husu perdua husi Ita, no mós la hakaʼas an atu hadiʼa situasaun neʼe, karik katuas sira sei forma komisaun ida atu hasai ema neʼe husi kongregasaun tanba ninia sala. Hodi halo nuneʼe, sira proteje bibi sira seluk no halo kongregasaun moos nafatin.​—Mt 18:17.

TAU MATAN BA KAZU KONA-BA SALA SÉRIU

²¹ Kuandu ema ida halo sala neʼebé sériu, hanesan sala seksuál, adultériu, hahalok omoseksuál, koʼalia aat Maromak, hahalok apostazia, adora estátua, ka sala sériu seluk, la toʼo atu ema ida mak fó perdua ba nia. (1 Kor 6:9, 10; Gal 5:19-21) Importante atu fó-hatene ba katuas sira kona-ba sala sériu sira hanesan neʼe atu sira bele rezolve, tanba se la rezolve, neʼe bele hafoʼer kongregasaun iha dalan morál no espirituál. (1 Kor 5:6; Tgo 5:14, 15) Dala ruma ema hakbesik ba katuas sira atu fó sai sira-nia sala rasik, ka fó sai buat neʼebé sira hatene kona-ba ema seluk nia sala. (Lev 5:1; Tgo 5:16) Bainhira katuas sira rona katak ema ida neʼebé batizmu ona halo sala neʼebé sériu, katuas naʼin-rua sei halo uluk investigasaun. Se katuas sira haree katak buat neʼebé ema fó sai mak loos no iha duni evidénsia kona-ba sala neʼe, grupu katuas sei hili katuas naʼin-tolu ka liu atu serbí iha komisaun judisiál hodi tau matan ba kazu neʼe.

²² Katuas sira tau matan didiʼak ba bibi sira, no buka atu proteje bibi-lubun husi influénsia neʼebé bele estraga kongregasaun iha dalan espirituál. Sira mós hakaʼas an atu uza Maromak nia Liafuan ho matenek atu korrije ema neʼebé laʼo sala dalan, no hametin fali ema sira-neʼe nia relasaun diʼak ho Maromak. (Jud 21-23) Neʼe tuir matadalan neʼebé apóstolu Paulo fó ba Timóteo, hodi hakerek: “Iha Maromak no Kristu Jesus nia oin, Jesus neʼebé sei tesi-lia ba ema moris no ema mate, . . . haʼu haruka ó atu . . . korrije, fó avizu makaʼas no fó konsellu ho pasiénsia no ho matenek atu hanorin.” (2 Tim 4:1, 2) Katuas sira presiza tempu barak atu halo buat sira-neʼe, maibé neʼe mak sira-nia knaar. Kongregasaun sente agradese ba sira-nia hakaʼas an, no “hatudu respeitu neʼebé kleʼan liu” ba sira.​—1 Tim 5:17.

²³ Iha situasaun ida-idak, bainhira katuas sira hatene ona ho klaru katak ema ida halo duni sala, katuas sira-nia objetivu primeiru mak atu ajuda ema neʼe hadiʼa fali ninia relasaun diʼak ho Maromak. Se ema neʼebé halo ona sala arrepende an ho laran no prontu atu simu ajuda, katuas sira bele korrije nia mesamesak, ka dala ruma iha ema seluk nia oin, katak sasin-naʼin sira ba kazu neʼe. Korrije neʼe mak hanesan dixiplina ba nia no halo ema seluk taʼuk atu halo sala neʼebé hanesan. (2 Sam 12:13; 1 Tim 5:20) Ema neʼebé simu dixiplina husi komisaun judisiál sei lakon ninia priviléjiu sira. Ida-neʼe bele ajuda nia atu “kontinua halo loos” ninia dalan sira, katak hadiʼa ninia hahalok. (Ebr 12:13) Liutiha tempu balu, bainhira nia hatudu katak nia hadiʼa ona ninia relasaun diʼak ho Jeová, nia bele simu fali priviléjiu.

ANÚNSIU KONA-BA EMA NEʼEBÉ SIMU DIXIPLINA

²⁴ Kongregasaun sei halo anúnsiu badak durante Reuniaun Moris Kristaun no Haklaken se komisaun judisiál haree katak ema ida arrepende an, maibé karik komunidade ka kongregasaun sei rona kona-ba ninia sala neʼe, ka kongregasaun presiza hatene atu sira bele kuidadu kuandu ransu ho ema neʼe. Katuas sira presiza fó sai anúnsiu hanesan tuirmai: “[Ema nia naran] hetan ona dixiplina husi kongregasaun.”

SE DESIZAUN MAK ATU HASAI EMA HUSI KONGREGASAUN

²⁵ Dala ruma, ema sai toman atu halo sala toʼo ninia konxiénsia la fó-sala tan ba nia, no nia mós la arrepende an kuandu simu ajuda. Karik durante tempu neʼebé komisaun judisiál koʼalia hamutuk ho nia, sira seidauk haree ho klaru katak nia hatudu ona “hahalok neʼebé hatudu katak [nia] arrepende an”. (Após 26:20) Entaun, komisaun judisiál presiza halo saida? Iha situasaun hanesan neʼe, sira presiza hasai ema neʼe husi kongregasaun tanba nia la arrepende ninia sala. Nia labele ransu tan ho Jeová nia povu neʼebé hatudu hahalok moos. Hodi nuneʼe, nia labele tan fó influénsia aat ba kongregasaun. Ida-neʼe proteje kongregasaun atu moos nafatin iha dalan morál no espirituál, no proteje kongregasaun nia naran diʼak. (Deut 21:20, 21; 22:23, 24) Bainhira apóstolu Paulo rona tiha kona-ba ema ida nia hahalok aat iha kongregasaun Korinto, nia fó avizu ba katuas sira atu “entrega mane hanesan neʼe ba Satanás” hodi nuneʼe, “kongregasaun bele nafatin iha hanoin neʼebé loos”. (1 Kor 5:5, 11-13) Apóstolu Paulo mós fó sai kona-ba ema seluk neʼebé kongregasaun hasai tanba kontra lia-loos.​—1 Tim 1:20.

²⁶ Bainhira komisaun judisiál deside katak ema ida la arrepende an, no tenke hasai husi kongregasaun, sira presiza fó-hatene ema neʼe kona-ba sira-nia desizaun, no esplika ho klaru razaun husi Bíblia tanbasá sira deside atu hasai nia husi kongregasaun. Bainhira komisaun judisiál fó sai sira-nia desizaun ba ema neʼe, sira presiza esplika ba nia katak se nia hanoin sira-nia desizaun mak sala, nia bele halo rekursu hasoru desizaun neʼebé sira foti ona liuhusi hakerek karta. Se nia hakerek karta, nia presiza esplika ho klaru tanbasá nia hakarak katuas sira atu halo nuneʼe. Husi tempu neʼebé komisaun judisiál fó sai sira-nia desizaun ba nia, nia iha loron hitu atu hakerek karta. Bainhira katuas sira simu ninia karta, sira sei kontaktu katuas área, no katuas área sei hili katuas sira seluk atu serbí iha komisaun rekursu hodi haree fali kazu neʼe. Sira sei hakaʼas an atu kumpre ida-neʼe iha semana ida nia laran hahú husi tempu neʼebé sira simu karta husi ema neʼe. Se ema neʼe hakerek karta atu halo rekursu, katuas sira labele fó sai lai anúnsiu kona-ba hasai nia husi kongregasaun. Durante tempu neʼe, ema neʼe labele fó komentáriu no halo orasaun iha reuniaun no labele halo priviléjiu sira seluk.

²⁷ Arranju atu halo rekursu mak arranju neʼebé diʼak tebes, no fó oportunidade ba ema neʼe atu fó sai ninia hanoin kona-ba komisaun judisiál nia desizaun. Tan neʼe, se ema neʼe ho neon lakohi tuir enkontru ho komisaun rekursu, komisaun neʼe sei hakaʼas an atu kontaktu nia, maibé se la konsege kontaktu nia, sira bele fó sai anúnsiu katak kongregasaun hasai ona nia.

²⁸ Kuandu ema lakohi halo rekursu hasoru komisaun judisiál nia desizaun, komisaun judisiál sei esplika ba nia katak nia presiza arrepende an no sira mós esplika kona-ba hakat saida deʼit mak nia bele halo atu kongregasaun simu fali nia. Hodi halo nuneʼe, neʼe bele ajuda nia no mós hatudu laran-diʼak ba nia. No sira hein katak nia sei troka ninia dalan sira no ikusmai bele filafali ba Jeová nia organizasaun.​—2 Kor 2:6, 7.

ANÚNSIU KONA-BA HASAI EMA HUSI KONGREGASAUN

²⁹ Kuandu presiza hasai ema ida husi kongregasaun tanba halo sala no la arrepende an, katuas sira sei halo anúnsiu, hodi dehan: “[Ema nia naran] laʼós tan Testemuña ba Jeová.” Anúnsiu neʼe sei fó-hanoin irmaun-irmán laran-metin sira iha kongregasaun atu la ransu tan ho ema neʼe.​—1 Kor 5:11.

EMA NEʼEBÉ LAKOHI TAN SAI PARTE BA KONGREGASAUN

³⁰ Bainhira Testemuña ida neʼebé batizmu ona fó sai katak nia lakohi tan sai parte ba kongregasaun Kristaun, neʼe katak nia husik ona ninia fiar no nia lakohi tan atu ema koñese nia nuʼudar Testemuña ba Jeová. Ka karik liuhusi ninia hahalok nia hatudu katak nia lakohi tan sai parte ba kongregasaun Kristaun. Porezemplu, karik nia envolve an iha organizasaun neʼebé halaʼo atividade neʼebé kontra Bíblia nia hanorin. Organizasaun hanesan neʼe sei simu tesi-lia husi Maromak Jeová.​—Isa 2:4; Apok 19:17-21.

³¹ Apóstolu João hakerek kona-ba ema Kristaun iha ninia tempu neʼebé husik ona sira-nia fiar: “Uluk sira hamutuk ho ita maibé sira husik hela ita tanba sira laʼós parte ba ita-nia grupu. Se sira parte ba ita-nia grupu, entaun sira hela nafatin ho ita.”​—1 João 2:19.

³² Tuir Maromak Jeová nia haree, ema neʼebé lakohi tan sai parte ba kongregasaun mak la hanesan duni ho haklaken-naʼin neʼebé la ativu ona iha serbisu haklaken. Karik ema ida la ativu tanba la estuda beibeik Maromak nia Liafuan. Ka karik nia hasoru problema iha ninia moris loroloron ka ema fó-terus ba nia no neʼe halo nia la laran-manas tan atu serbí Jeová. Katuas sira no irmaun-irmán seluk iha kongregasaun sei kontinua fó ajuda ba ema Kristaun neʼebé la ativu.​—Rom 15:1; 1 Tes 5:14; Ebr 12:12.

³³ Maibé se ema ida lakohi tan sai parte ba kongregasaun, katuas sira sei fó sai anúnsiu atu fó-hatene kongregasaun kona-ba neʼe, hodi dehan: “[Ema nia naran] laʼós tan Testemuña ba Jeová.” Irmaun-irmán iha kongregasaun presiza haree nia hanesan ho ema neʼebé kongregasaun hasai.

KONGREGASAUN SIMU FALI EMA

³⁴ Ema neʼebé kongregasaun hasai ka ema neʼebé lakohi tan sai parte ba kongregasaun, bele fila fali ba kongregasaun se nia hatudu ho klaru katak nia arrepende an, no hatudu ona ba tempu balu katak nia husik ninia hahalok sala. Nia presiza hatudu katak nia hakarak iha relasaun diʼak ho Maromak Jeová. Katuas sira presiza fó tempu ba ema neʼe atu hatudu ho klaru katak nia arrepende an ho laran tomak. Karik ida-neʼe bele han fulan barak, tinan ida ka liu, depende ba ema neʼe nia situasaun. Bainhira nia hakarak fila fali ba kongregasaun, nia presiza hakerek karta ba katuas sira. Kuandu grupu katuas simu karta husi ema neʼe, komisaun neʼebé simu fali ema sei koʼalia ho ema neʼe hodi deside atu simu fali nia ka lae. Komisaun neʼe sei tetu didiʼak kona-ba ema neʼe nia hahalok atu haree se nia “hatudu katak [nia] arrepende an”, no tuirmai halo desizaun atu simu fali nia iha tempu neʼe ka lae.​—Após 26:20.

³⁵ Se ema ida hakerek karta atu kongregasaun simu fali nia, maibé kongregasaun seluk mak uluk hasai nia, entaun komisaun iha kongregasaun neʼebé simu ninia karta sei hasoru nia no tetu ninia situasaun. Se komisaun neʼe hanoin katak kongregasaun bele simu fali nia, sira sei fó sai sira-nia desizaun ba grupu katuas iha kongregasaun neʼebé uluk hasai nia. Komisaun sira husi kongregasaun rua sei serbisu hamutuk hodi haree katak sira iha faktu hotu neʼebé presiza atu halo desizaun neʼe. Maibé komisaun iha kongregasaun uluk nian neʼebé hasai ema neʼe mak sei halo desizaun atu simu fali nia ka lae.

ANÚNSIU KONA-BA KONGREGASAUN SIMU FALI EMA IDA

³⁶ Bainhira komisaun neʼe fiar katak ema neʼebé kongregasaun hasai ka ema neʼebé lakohi tan sai parte ba kongregasaun mak arrepende an ona ho laran no bele simu fali nia, katuas sira iha ninia kongregasaun sei fó sai anúnsiu kona-ba neʼe. Se ema neʼe muda ona ba kongregasaun seluk, katuas sira iha kongregasaun foun mós presiza fó sai anúnsiu neʼe. Sira presiza fó sai anúnsiu hanesan tuirmai: “Kongregasaun simu fali ona [ema nia naran] nuʼudar Testemuña ba Jeová ida.”

SE LABARIK NEʼEBÉ BATIZMU ONA MAK HALO SALA SÉRIU

³⁷ Bainhira labarik neʼebé hetan ona batizmu mak halo sala sériu, presiza fó-hatene ida-neʼe ba katuas sira. Kuandu katuas sira koʼalia ho labarik neʼebé halo sala sériu, diʼak atu ninia inan-aman neʼebé batizmu ona mós tuir. Diʼak se inan-aman neʼe apoia komisaun judisiál, no la koko atu proteje ninia oan atu la hetan dixiplina neʼebé nia presiza. Komisaun judisiál sei koko atu fó konsellu hodi ajuda labarik neʼe fila fali ba dalan loos, hanesan sira halo ba ema boot. Maibé, se labarik ida lakohi arrepende an, katuas sira sei hasai nia husi kongregasaun.

SE HAKLAKEN-NAʼIN NEʼEBÉ SEIDAUK HETAN BATIZMU MAK HALO SALA SÉRIU

³⁸ Oinsá se haklaken-naʼin neʼebé seidauk hetan batizmu mak halo sala sériu? Tanba sira seidauk hetan batizmu nuʼudar Testemuña, entaun kongregasaun labele hasai sira. Karik sira ladún komprende Bíblia nia matadalan kona-ba morál, tan neʼe bainhira katuas fó konsellu ho laran-diʼak ba sira, karik neʼe bele ajuda sira atu “halo loos” sira-nia dalan.​—Ebr 12:13.

³⁹ Se ema neʼebé seidauk hetan batizmu mak halo sala sériu, katuas naʼin-rua sei koʼalia ho nia no koko atu ajuda nia. Maibé se nia lakohi arrepende an, entaun presiza fó-hatene ba kongregasaun. Katuas sira sei halo anúnsiu hodi dehan: “[Ema nia naran] laʼós tan haklaken-naʼin neʼebé seidauk hetan batizmu.” Kongregasaun sei haree ema neʼe hanesan ema mundu. Maski kongregasaun la hasai ema neʼe, maibé ema Kristaun hotu sei kuidadu kuandu ransu ho nia. (1 Kor 15:33) Kongregasaun sei la simu tan relatóriu haklaken husi nia.

⁴⁰ Liutiha tempu balu, ema neʼe karik hakarak sai fali haklaken-naʼin. Iha situasaun neʼe, katuas naʼin-rua sei koʼalia ho nia atu hatene se nia hadiʼa ona ninia hahalok no laʼo ba oin iha dalan espirituál. Se nia kumpre kritéria, katuas sira sei halo anúnsiu: “[Ema nia naran] sai fali haklaken-naʼin neʼebé seidauk hetan batizmu.”

JEOVÁ FÓ BENSAUN BA ADORASAUN NEʼEBÉ MOOS NO IHA DAME

⁴¹ Ohin loron, ema hotu neʼebé sai parte ba Maromak nia kongregasaun haksolok tanba bensaun barak neʼebé Jeová fó ba ninia povu. Ita-nia paraízu espirituál mak furak loos, no ita iha bee lia-loos nian neʼebé fresku. Jeová mós proteje ita liuhusi ninia arranju teokrátiku no Kristu mak Ulun. (Sal 23; Isa 32:1, 2) Ita sente seguru tebes tanba sai parte ba paraízu espirituál durante loron ikus sira-neʼe.

⁴² Bainhira ita hotu mantein dame no halo kongregasaun moos nafatin, ita kontinua halo naroman lia-loos nian sai nabilan. (Mt 5:16; Tgo 3:18) Ho Maromak nia bensaun, ita sei haksolok hodi haree ema barak tan koñese Jeová no serbí nia hamutuk ho ita.