LISAUN ESTUDU 34
KNANANUK 107 Maromak nia ezemplu kona-ba domin
Hatudu domin no laran-sadiʼa ba ema neʼebé halo sala
“Maromak ho laran-diʼak koko atu lori ó hodi arrepende ó-nia sala.”—ROM 2:4.
OBJETIVU
Aprende kona-ba oinsá mak katuas sira koko ajuda sira neʼebé halo sala sériu.
1. Saida mak bele akontese kuandu ema ida halo sala sériu?
IHA lisaun antes neʼe, ita haree apóstolu Paulo nia konsellu ba kongregasaun iha Korinto kona-ba mane ida neʼebé halo sala sériu. Tanba mane neʼe lakohi arrepende an, kongregasaun tenke hasai nia. Maski nuneʼe, hanesan temi iha eskritura tema, Maromak bele lori ema neʼebé halo sala atu arrepende an. (Rom 2:4) Oinsá mak nia uza katuas sira atu ajuda ema neʼebé halo sala sériu?
2-3. Saida mak ita presiza halo se ita hatene katak ita-nia maluk ida halo sala sériu, no tanbasá?
2 Antes fó ajuda, katuas sira presiza komprende didiʼak kona-ba situasaun. Entaun, saida mak ita presiza halo se ita hatene katak ita-nia maluk ida halo sala sériu? Ita presiza anima ema neʼe atu buka ajuda husi katuas sira.—Isa 1:18; Após 20:28; 1 Ped 5:2.
3 Oinsá se ema neʼe lakohi fó-hatene katuas sira? Se nuneʼe, ita mak presiza bá fó-hatene katuas sira hodi nia bele hetan ajuda. Neʼe hatudu katak ita hadomi irmaun ka irmán neʼe tanba ita lakohi lakon nia. Se nia kontinua halo hahalok sala neʼe, nia sei sai dook liután husi Jeová. Karik nia mós sei hafoʼer kongregasaun nia naran. Tan neʼe, ita presiza aten-brani atu fó-hatene katuas sira tanba ita hadomi Jeová no irmaun-irmán sira.—Sal 27:14.
OINSÁ KATUAS SIRA AJUDA EMA NEʼEBÉ HALO SALA SÉRIU
4. Saida mak katuas sira-nia objetivu bainhira hasoru ema neʼebé halo sala sériu?
4 Bainhira ema ida iha kongregasaun halo sala sériu, grupu katuas sei hili katuas naʼin-tolu neʼebé kumpre kritéria atu serbí nuʼudar komisaun ida.a Katuas naʼin-tolu neʼe presiza haraik an hodi rekoñese sira-nia limitasaun. Nuʼudar sira ajuda ema ida atu arrepende an, sira rekoñese katak sira labele obriga ema neʼe troka ninia hahalok. (Deut 30:19) Sira mós komprende katak laʼós ema hotu mak hanesan Liurai David neʼebé hakarak simu ajuda. (2 Sam 12:13) Karik ema balu neʼebé halo sala lakohi simu Jeová nia konsellu. (Gén 4:6-8) Maski nuneʼe, katuas sira-nia objetivu mak atu ajuda ema neʼebé halo sala arrepende an. Bíblia nia prinsípiu saida mak ajuda katuas sira kuandu hasoru ema neʼebé halo sala?
5. Katuas sira presiza hatudu hahalok saida bainhira hasoru ema neʼebé halo sala? (2 Timóteo 2:24-26) (Haree mós dezeñu.)
5 Katuas sira haree ema neʼebé halo sala hanesan bibi neʼebé lakon no folin-boot. (Lc 15:4, 6) Tan neʼe, bainhira sira hasoru ema neʼe, sira sei koʼalia ho laran-diʼak, no trata nia ho dignidade. Katuas sira sei la hanoin katak sira-nia knaar mak atu husu deʼit pergunta no hetan faktu sira. Maibé, sira sei hatudu hahalok sira neʼebé temi iha 2 Timóteo 2:24-26. (Lee.) Sira presiza nafatin hatudu laran-maus no laran-diʼak atu bele book ema neʼe nia laran.
Hanesan bibi-atan iha tempu uluk, katuas sira hakaʼas an atu buka bibi neʼebé lakon (Haree parágrafu 5)
6. Oinsá mak katuas sira prepara sira-nia laran antes hasoru ema neʼebé halo sala? (Roma 2:4)
6 Katuas sira prepara sira rasik nia laran. Sira koko atu banati-tuir Jeová iha buat hotu kuandu koʼalia ho ema neʼebé halo sala. Sira presiza hanoin kona-ba Paulo nia liafuan: “Maromak ho laran-diʼak koko atu lori ó hodi arrepende ó-nia sala.” (Lee Roma 2:4.) Katuas sira tenke hanoin-hetan katak sira mak bibi-atan no presiza banati-tuir Jesus nia dalan atu tau matan kongregasaun. (Isa 11:3, 4; Mt 18:18-20) Antes hasoru ema neʼebé halo sala, komisaun sei halo orasaun hodi hanoin kona-ba sira-nia objetivu, neʼe mak atu ajuda ema neʼe arrepende an. Sira sei halo peskiza kona-ba Eskritura no publikasaun sira no husu Jeová nia ajuda atu komprende ema neʼe nia situasaun. Sira sei buka-hatene uluk kona-ba saida mak karik afeta ema neʼe nia hanoin no hahalok toʼo ikusmai monu ba sala.—Prov 20:5.
7-8. Oinsá mak katuas sira banati-tuir Jeová nia pasiénsia bainhira koʼalia ho ema neʼebé halo sala?
7 Katuas sira banati-tuir Jeová nia pasiénsia. Sira hanoin-hetan oinsá Jeová trata ona ema neʼebé halo sala. Porezemplu, Jeová hatudu pasiénsia ba Caim. Nia fó-hatene Caim kona-ba konsekuénsia neʼebé Caim sei hetan se nia halo sala, no mós bensaun neʼebé nia sei hetan kuandu nia troka ninia hahalok. (Gén 4:6, 7) Jeová mós haruka profeta Natan atu ajuda David hodi uza ai-knanoik neʼebé kona David nia laran. (2 Sam 12:1-7) No Jeová haruka ninia profeta sira “fila-fila” atu ajuda nasaun Izraél neʼebé ulun-toos. (Jer 7:24, 25) Nia la hein deʼit atu ninia povu arrepende an tiha mak nia fó ajuda. Maibé, nia foti inisiativu atu ajuda sira arrepende an.
8 Katuas sira banati-tuir Jeová nia ezemplu bainhira koko ajuda ema neʼebé halo sala sériu. Sira presiza hatudu pasiénsia hodi halo tuir matadalan iha 2 Timóteo 4:2. Neʼe katak katuas ida presiza mantein kalma no pasiénsia nuʼudar nia hakaʼas an atu book ema neʼe nia laran atu haburas hakarak neʼebé loos. Se katuas neʼe sai hirus ka estrese, ema neʼe karik sei lakohi rona ba konsellu ka lakohi arrepende an.
9-10. Oinsá mak katuas sira bele ajuda ema neʼebé halo sala atu rekoñese ninia hahalok?
9 Katuas sira koko atu komprende situasaun neʼebé book ema neʼe atu monu ba sala. Porezemplu, tanbasá mak irmaun ka irmán neʼe nia relasaun ho Jeová sai fraku? Karik tanba nia ladún estuda Bíblia no haklaken. Karik nia ladún halo orasaun ba Jeová. Ka karik nia husik hakarak neʼebé sala mak domina nia. Oinsá ho ninia ransu no atividade halimar nian? Oinsá mak ninia desizaun sira kona-ba neʼe fó impaktu ba nia? Nia rekoñese ka lae katak ninia desizaun no hahalok neʼe afeta Jeová nia sentimentu?
10 Hodi husu pergunta ho matenek, katuas sira bele ajuda ema neʼe atu hanoin kona-ba buat neʼebé halo fraku ninia relasaun ho Jeová toʼo monu ba sala. Katuas sira halo ida-neʼe ho laran-diʼak no la husu buat privadu nian neʼebé loloos sira la iha direitu atu hatene. (Prov 20:5) Hanesan profeta Natan, katuas sira mós bele uza ezemplu ka ai-knanoik ruma atu ajuda ema neʼe rekoñese ninia sala. Karik kuandu hasoru ba dala primeiru, ema neʼe komesa sente triste kona-ba sala neʼebé nia halo ona. Ka nia mós bele arrepende an.
11. Oinsá Jesus ajuda ema neʼebé halo sala sériu?
11 Katuas sira hakaʼas an atu banati-tuir Jesus. Jesus ajuda Saul husi Tarsu hodi husu pergunta ho matenek. Nia dehan: “Saul, Saul, tanbasá mak ó fó-terus ba haʼu?” Pergunta neʼe ajuda Saul rekoñese katak buat neʼebé nia halo mak sala. (Após 9:3-6) No kona-ba “feto Jezabel”, Jesus hatete: “Haʼu fó tempu ba nia atu arrepende an.”—Apok 2:20, 21.
12-13. Oinsá mak katuas sira fó tempu ba ema neʼebé halo sala arrepende an? (Haree mós foto.)
12 Hodi banati-tuir Jesus, katuas sira mós la ansi atu foti desizaun katak ema neʼe lakohi arrepende an. Karik ema balu arrepende an kedas kuandu hasoru komisaun ba dala primeiru, maibé ema seluk presiza tempu. Tan neʼe, katuas sira bele arranja atu hasoru ema neʼe ba dala balu. Karik depois hasoru tiha dala primeiru, ema neʼe komesa hanoin kona-ba buat neʼebé katuas sira hatete. Karik nia ho haraik an husu Jeová nia perdua. (Sal 32:5; 38:18) Tan neʼe, kuandu hasoru fali komisaun, karik ema neʼe hatudu atitude la hanesan ho tempu neʼebé nia hasoru dala primeiru.
13 Atu ajuda ema neʼebé halo sala arrepende an, katuas sira presiza hatudu laran-maus no laran-diʼak. Sira sei halo orasaun ba Jeová atu haraik bensaun ba sira-nia hakaʼas an no tau esperansa katak ema neʼe sei rekoñese ninia sala no arrepende an.—2 Tim 2:25, 26.
Karik katuas sira presiza hasoru dala balu ho ema neʼebé halo sala hodi fó tempu ba nia atu arrepende an (Haree parágrafu 12)
14. Sé mak merese simu gaba bainhira ema ida arrepende an, no tanbasá?
14 Se ema neʼebé halo sala arrepende an, neʼe sei lori ksolok boot! (Lc 15:7, 10) Sé mak merese simu gaba? Katuas sira? Haree toʼok saida mak Paulo hatete kona-ba ema neʼebé halo sala: “Karik Maromak sei husik sira arrepende an.” (2 Tim 2:25) Sin, Jeová mak ajuda ema Kristaun ida atu troka ninia hanoin no atitude, laʼós ema. Paulo esplika buat diʼak neʼebé akontese depois ema ida arrepende an. Ema neʼe bele iha koñesimentu neʼebé loos kona-ba lia-loos, iha fali hanoin neʼebé moos, no bele halai sai husi Diabu nia lasu.—2 Tim 2:26.
15. Oinsá mak katuas sira bele kontinua ajuda ema neʼebé arrepende an?
15 Bainhira ema neʼebé halo sala arrepende an, komisaun sei arranja vizita bibi-atan nian atu ema neʼe bele kontinua simu ajuda neʼebé nia presiza atu bele luta hasoru Satanás nia lasu no halo buat neʼebé loos. (Ebr 12:12, 13) Klaru katak katuas sira labele fó sai ba ema seluk kona-ba ema neʼe nia sala. Maibé, saida mak kongregasaun presiza hatene?
“FÓ DIXIPLINA BA SIRA IHA EMA HOTU NIA OIN”
16. Tuir 1 Timóteo 5:20, Paulo nia liafuan “iha ema hotu nia oin” refere ba sé?
16 Lee 1 Timóteo 5:20. Paulo hakerek liafuan neʼe ba ninia maluk katuas Timóteo kona-ba oinsá atu ajuda “ema sira neʼebé halo sala beibeik”. Entaun kuandu Paulo dehan fó dixiplina “iha ema hotu nia oin”, neʼe laʼós sempre refere ba kongregasaun tomak. Maibé nia refere ba ema neʼebé hatene kona-ba sala neʼe. Karik neʼe inklui ema neʼebé haree ho matan rasik ka rona husi ema neʼebé halo sala kona-ba sala neʼebé nia halo. Katuas sira sei fó-hatene deʼit ba ema sira-neʼe katak katuas sira tau matan ona ba kazu neʼe.
17. Se ema barak hatene katak ema ida halo sala sériu ka karik lakleur kongregasaun sei hatene kona-ba neʼe, katuas sira sei halo saida, no tanbasá?
17 Dala ruma, ema barak hatene katak ema ida halo sala sériu ka karik lakleur kongregasaun sei hatene kona-ba neʼe. Se nuneʼe, liafuan “iha ema hotu nia oin” refere ba kongregasaun tomak. Entaun katuas ida sei fó anúnsiu ba kongregasaun katak irmaun ka irmán neʼe hetan ona dixiplina. Tanbasá? Paulo hatete katak neʼe mak “nuʼudar avizu ba sira seluk” atu la monu ba sala.
18. Saida mak katuas sira halo se labarik neʼebé batizmu ona mak halo sala? (Haree mós foto.)
18 Oinsá se labarik neʼebé seidauk toʼo tinan 18 no batizmu ona halo sala sériu? Grupu katuas sei arranja katuas naʼin-rua atu hasoru labarik neʼe no ninia inan-aman neʼebé Testemuña.b Katuas sira sei buka-hatene hakat neʼebé inan-aman neʼe halo ona atu ajuda sira-nia oan arrepende an. Se labarik neʼe iha atitude diʼak no simu inan-aman nia ajuda, karik katuas naʼin-rua bele deside katak la presiza tan halo buat ruma ho kazu neʼe. Tuir loloos, neʼe mak inan-aman nia responsabilidade atu hanorin oan ho domin. (Deut 6:6, 7; Prov 6:20; 22:6; Éf 6:2-4) Katuas sira sei buka-hatene husi labarik neʼe nia inan-aman atu haree katak nia hetan ajuda tuir ninia presiza. Maibé, oinsá se labarik neʼe kontinua halo sala no la arrepende an? Se nuneʼe, katuas naʼin-tolu sei koʼalia ho labarik neʼe no ninia inan-aman.
Bainhira labarik ida mak halo sala sériu, katuas naʼin-rua sei hasoru labarik neʼe no ninia inan-aman neʼebé Testemuña (Haree parágrafu 18)
“JEOVÁ IHA DOMIN NEʼEBÉ BOOT TEBES NO LARAN-SADIʼA”
19. Oinsá mak katuas sira banati-tuir Jeová bainhira ajuda ema neʼebé halo sala?
19 Jeová hakarak katuas sira atu proteje kongregasaun husi ema neʼebé lakohi halo tuir ninia mandamentu. (1 Kor 5:7) Katuas sira mós hakarak ema neʼebé halo sala arrepende an. Sira kontinua tau esperansa katak ema neʼe sei troka ninia hahalok. Tanbasá? Tanba sira banati-tuir Jeová neʼebé “iha domin neʼebé boot tebes no laran-sadiʼa”. (Tgo 5:11) Haree toʼok oinsá apóstolu João hatudu domin ba irmaun-irmán sira. Nia dehan: “Haʼu-nia oan doben sira, haʼu hakerek buat sira-neʼe ba imi atu imi labele halo sala. Maibé se ema ida halo sala, ita iha ajuda-naʼin ida neʼebé hamutuk ho Aman, ajuda-naʼin neʼe mak Jesus Kristu neʼebé halo buat loos iha Maromak nia oin.”—1 João 2:1.
20. Saida mak ita sei aprende iha lisaun tuirmai?
20 Triste mak dala ruma ema Kristaun ida lakohi arrepende an. Se nuneʼe, kongregasaun tenke hasai nia. Oinsá mak katuas sira tau matan ba kazu sériu hanesan neʼe? Ita sei aprende kona-ba neʼe iha lisaun tuirmai.
Knananuk 103 Bibi-atan sira mak prezente
a Uluk grupu neʼe bolu nuʼudar komisaun judisiál. Maibé tanba tesi-lia mak nuʼudar parte ida deʼit husi katuas sira-nia knaar, ita sei la uza tan fraze neʼe. Ita sei temi deʼit grupu neʼe nuʼudar komisaun katuas sira.
b Se labarik nia inan-aman laʼós Testemuña, ninia família neʼebé Testemuña, ka mestre Bíblia, ka Testemuña seluk neʼebé labarik neʼe tau fiar presiza akompaña iha enkontru ho katuas.