Oinsá kongregasaun bele banati-tuir Jeová nia hanoin kona-ba ema neʼebé halo sala sériu

1. Saida mak Jeová nia hakarak ba ema hotu?

JEOVÁ kria ema ho liberdade atu halo desizaun rasik. Ita uza beibeik prezente neʼe bainhira halo desizaun oioin. Desizaun neʼebé importante liu mak atu dedika an ba Jeová no sai parte ba Ninia família. Jeová hakarak ema hotu atu halo nuneʼe. Tanbasá? Tanba nia hadomi ema no hakarak ema atu moris kontente. Nia hakarak sira atu iha relasaun diʼak ho nia no moris ba nafatin.—Deut 30:​19, 20; Gal 6:​7, 8.

2. Jeová sente oinsá kona-ba ema neʼebé la arrepende sala? (1 João 2:1)

² Jeová la obriga ema atu adora nia. Nia husik ema ida-idak atu deside saida mak sira sei halo. Oinsá se ema ida neʼebé batizmu ona la halo tuir Jeová nia ukun-fuan no halo sala neʼebé sériu? Se nia la arrepende sala, kongregasaun tenke hasai nia. (1 Kor 5:13) Maski nuneʼe, Jeová hakarak tebes ema neʼe atu fila fali ba Nia. Loloos razaun importante tanbasá Jeová fó Jesus nia sakrifísiu mak atu fó perdua ba ema neʼebé arrepende an. (Lee 1 João 2:1.) Jeová mak Maromak neʼebé nakonu ho domin, no nia hakarak tebes ema atu arrepende sala.—Zac 1:3; Rom 2:4; Tgo 4:8.

3. Iha lisaun neʼe, ita sei koʼalia kona-ba saida?

³ Jeová hakarak ita atu iha hanoin hanesan nia kona-ba hahalok neʼebé sala, no mós kona-ba ema neʼebé halo sala. Iha lisaun neʼe, ita sei koʼalia kona-ba oinsá ita bele halo nuneʼe. Mai ita buka-hatene (1) kongregasaun iha Korinto halo saida kuandu mane ida halo sala sériu, (2) Paulo fó matadalan saida kuandu mane neʼe arrepende sala, no (3) Jeová hanoin oinsá kona-ba ema neʼebé halo sala sériu.

KONGREGASAUN IHA KORINTO HALO SAIDA KUANDU MANE IDA HALO SALA SÉRIU

4. Saida mak akontese iha kongregasaun iha Korinto? (1 Korinto 5:​1, 2)

⁴ Lee 1 Korinto 5:​1, 2. Durante Paulo nia viajen terseiru nuʼudar misionáriu, nia rona kona-ba hahalok aat neʼebé akontese iha kongregasaun foun iha Korinto. Irmaun ida iha kongregasaun halo sala seksuál ho ninia aman nia feen. Hahalok neʼe mak aat tebes no ema neʼebé la serbí Jeová mós hatene katak neʼe mak aat duni! Kongregasaun laʼós deʼit tolera ninia hahalok, maibé mós karik sente orgullu tanba bele hatudu toleránsia. Karik irmaun-irmán balu hanoin katak sira haleno Jeová nia laran-sadiʼa ba ema neʼebé halo sala. Maibé loloos, Jeová la tolera hahalok sala neʼe iha ninia povu nia leet. Hahalok sala neʼe bele fó razaun ba ema neʼebé la adora Jeová atu koʼalia aat kona-ba kongregasaun. Mane neʼe mós fó influénsia aat ba ema Kristaun seluk neʼebé ransu ho nia. Entaun, Paulo haruka kongregasaun atu halo saida?

5. Paulo haruka kongregasaun atu halo saida, no neʼe katak sá? (1 Korinto 5:13) (Haree mós dezeñu.)

⁵ Lee 1 Korinto 5:13. Ho espíritu santu nia ajuda, Paulo hakerek karta ida atu fó sai katak kongregasaun tenke hasai mane neʼebé la arrepende an. No sira neʼebé laran-metin iha kongregasaun neʼe presiza halo saida? Paulo haruka sira “atu labele ransu tan” ho mane neʼe. Neʼe katak sá? Paulo esplika katak matadalan neʼe inklui mós “keta han ho ema hanesan neʼe”. (1 Kor 5:11) Se ita han hamutuk ho ema ruma, baibain ita mós dada lia ho nia. Tan neʼe Paulo koʼalia katak kongregasaun labele gasta tempu hamutuk ho mane neʼe. Hodi halo nuneʼe sei proteje kongregasaun husi influénsia neʼebé aat. (1 Kor 5:​5-7) Neʼe mós sei ajuda mane neʼe atu rekoñese katak nia halo ona Jeová laran-kanek, no nia sente triste toʼo hakarak atu arrepende an.

6. Paulo nia karta fó impaktu saida ba kongregasaun no mane neʼebé halo sala?

⁶ Depois haruka tiha ninia karta ba kongregasaun iha Korinto, Paulo hanoin kona-ba oinsá kongregasaun nia reasaun ba ninia konsellu neʼe. Liutiha tempu balu, Tito lori relatóriu neʼebé halo Paulo kontente. (2 Kor 7:​6, 7) Kongregasaun kontente hodi simu Paulo nia karta no halo tuir ninia konsellu. Liután neʼe, depois kongregasaun aplika matadalan husi Paulo nia karta primeiru, mane neʼe arrepende an, troka ninia hahalok, no komesa halo tuir fali Jeová nia matadalan kona-ba morál. (2 Kor 7:8-11) Matadalan saida tan mak Paulo sei fó ba kongregasaun?

OINSÁ MAK KONGREGASAUN TRATA EMA NEʼEBÉ ARREPENDE SALA

7. Hodi hasai mane neʼebé halo sala husi kongregasaun lori rezultadu diʼak saida? (2 Korinto 2:​5-8)

⁷ Lee 2 Korinto 2:​5-8. Paulo hatete: “Kastigu neʼebé imi barak fó ba mane neʼe mak natoon ona ba nia.” Neʼe katak dixiplina neʼe kumpre ona ninia objetivu. Objetivu saida? Atu halo mane neʼe arrepende an.—Ebr 12:11.

8. Tuirmai Paulo haruka kongregasaun atu halo saida?

⁸ Paulo haruka kongregasaun atu “fó perdua ba nia ho laran-diʼak”, no ‘hatudu sai sira-nia domin ba nia’. Nota katak Paulo la haruka deʼit kongregasaun simu fali mane neʼe, maibé nia mós hakarak sira atu hatudu katak sira perdua duni no hadomi mane neʼe liuhusi sira-nia hahalok no liafuan. Kongregasaun presiza hatudu ho klaru katak sira kontente atu simu fali mane neʼe.

9. Karik tanbasá ema balu sente susar atu simu ema neʼebé fila fali ba kongregasaun?

⁹ Iha ka lae ema balu iha kongregasaun neʼebé la kontente atu simu fali mane neʼebé arrepende an ona? Bíblia la fó-hatene kona-ba neʼe, maibé karik neʼe bele akontese. Karik ema balu sente susar atu simu nia tanba nia hamosu ona problema iha kongregasaun, no karik nia mós hakanek ona sira balu nia laran. Kongregasaun hakaʼas an atu halo tuir Jeová nia mandamentu, tan neʼe sira balu sente la justu atu kongregasaun simu fali mane neʼe. (Kompara ho Lucas 15:​28-30.) Entaun, tanbasá importante ba kongregasaun atu hatudu domin ba ema neʼebé fila fali ba kongregasaun?

10-11. Saida mak bele akontese se katuas sira lakohi fó perdua ba ema neʼebé arrepende an?

¹⁰ Imajina toʼok saida mak sei akontese kuandu katuas sira lakohi simu fali nia, ka se nia sente katak irmaun-irmán sira la hatudu domin ba nia maski kongregasaun simu ona nia. Nia bele sai “triste demais” no karik sente katak nia nunka bele serbí tan Jeová. Nia mós bele rende an atu haburas ninia relasaun ho Maromak.

¹¹ Aat liután mak irmaun-irmán sira sei tau sira-nia an iha perigu laran se sira lakohi fó perdua ba ema neʼebé arrepende an. Tanbasá? Tanba sira la halo tuir Jeová neʼebé fó perdua, maibé halo tuir liu Satanás neʼebé la hatudu laran-sadiʼa. Sira sei husik Diabu uza sira hodi hanetik ema atu serbí Jeová.—2 Kor 2:​10, 11; Éf 4:27.

12. Oinsá mak kongregasaun bele banati-tuir Jeová?

¹² Entaun, oinsá mak kongregasaun iha Korinto bele banati-tuir Jeová, laʼós Satanás? Neʼe mak hodi trata ema neʼebé arrepende an tuir Jeová nia dalan. Haree toʼok saida mak hakerek-naʼin balu kona-ba Bíblia hatete. David dehan katak Jeová mak “diʼak no prontu atu fó perdua”. (Sal 86:5) Miqueias hakerek: “Maromak ida-neʼebé mak hanesan Ita-Boot? Ita fó perdua ba sala no la hanoin tan hahalok kontra.” (Miq 7:18) No Isaias hatete: “Ema aat tenke husik ninia dalan no ema laran-aat tenke husik ninia hanoin aat sira; husik nia fila fali ba Jeová, neʼebé sei hatudu laran-sadiʼa ba nia, fila fali ba ita-nia Maromak, tanba Maromak sei fó perdua ho laran-luak.”—Isa 55:7.

13. Tanbasá kongregasaun presiza simu fali ema neʼebé arrepende sala? (Haree kaixa “Bainhira mak kongregasaun iha Korinto simu fali mane neʼe?”)

¹³ Atu banati-tuir Jeová, kongregasaun iha Korinto presiza fó perdua ba mane neʼebé arrepende sala, no hatudu katak sira hadomi nia. Hodi halo tuir Paulo nia konsellu, kongregasaun hatudu katak sira “halo tuir iha buat hotu”. (2 Kor 2:9) Maski kongregasaun hasai mane neʼe iha fulan balu liubá, maibé se nia arrepende duni ninia sala, kongregasaun la presiza demora atu simu fali nia.

BANATI-TUIR JEOVÁ NIA JUSTISA NO LARAN-SADIʼA

14-15. Saida mak ita bele aprende husi situasaun iha Korinto? (2 Pedro 3:9) (Haree mós foto.)

¹⁴ Situasaun neʼebé akontese iha Korinto, hakerek ona iha Bíblia atu “hanorin ita”. (Rom 15:4) Husi akontesimentu neʼe, ita aprende katak Jeová la husik deʼit ema neʼebé halo sala sériu no la arrepende an atu nafatin iha kongregasaun. Ema balu karik hanoin katak tanba Jeová mak “laran-sadiʼa”, nia bele husik deʼit ema neʼebé la arrepende an atu nafatin iha kongregasaun. Maibé hanoin hanesan neʼe mak la loos. Maski Jeová mak laran-sadiʼa, maibé nia la simu deʼit hahalok sala, no nia mós la troka ninia matadalan kona-ba morál. (Judas 4) Se Jeová husik deʼit ema neʼebé la arrepende sala atu nafatin iha kongregasaun, neʼe la hatudu laran-sadiʼa tanba neʼe sei lori perigu ba kongregasaun.—Prov 13:20; 1 Kor 15:33.

¹⁵ Jeová lakohi ema ida atu lakon, nia hakarak ema hotu hetan salvasaun. Nia hatudu laran-sadiʼa ba ema neʼebé troka sira-nia hanoin no hahalok no hakarak atu serbí fali nia. (Eze 33:11; lee 2 Pedro 3:9.) Tan neʼe, bainhira mane iha Korinto arrepende an no troka ninia hahalok, Jeová uza Paulo atu esplika ba kongregasaun katak sira presiza fó perdua no simu fali nia.

16. Ita sente oinsá kuandu aprende kona-ba situasaun iha Korinto?

¹⁶ Situasaun iha Korinto hanorin ita katak Jeová mak domin no justisa. (Sal 33:5) Kuandu ita aprende kona-ba Jeová nia hahalok furak sira-neʼe, neʼe sei book ita atu fó hahiʼi ba nia. Loloos ita hotu mak sala-naʼin no presiza hetan perdua. Ita mós fó agradese ba Jeová tanba fó Jesus nia sakrifísiu atu ita bele hetan perdua ba ita-nia sala. Tanba ita hatene katak Jeová hadomi tebes ninia povu no hakarak ita atu moris kontente, neʼe fó kmaan no hametin duni ita!

17. Iha lisaun tuirmai, ita sei koʼalia kona-ba saida?

¹⁷ Oinsá se ema ida halo sala ohin loron? Oinsá katuas kongregasaun bele banati-tuir Jeová nia domin no ajuda ema neʼe atu arrepende an? Ita presiza halo saida kuandu katuas sira deside atu hasai ka simu ema ida iha kongregasaun? Iha lisaun tuirmai, ita sei koʼalia kona-ba neʼe.