“Bolu katuas sira”

1. Oinsá mak Jeová hatudu katak nia hafolin ninia bibi sira?

JEOVÁ hafolin ninia bibi sira. Tan neʼe, nia sosa sira ho Jesus nia raan no fó knaar ba katuas kongregasaun atu tau matan ba Ninia bibi-lubun. (Após 20:28) Jeová hakarak katuas sira atu trata ninia bibi sira ho laran-diʼak. Katuas sira halo tuir Jesus nuʼudar ulun ba kongregasaun hodi tau matan no proteje bibi sira husi perigu espirituál.—Isa 32:​1, 2.

2. Liuliu iha situasaun saida mak Jeová hanoin tebes ita? (Ezequiel 34:​15, 16)

² Jeová hanoin tebes ita hotu nuʼudar ninia bibi, liuliu bainhira ita hasoru susar. Jeová uza katuas kongregasaun atu ajuda ninia atan neʼebé hasoru susar iha dalan espirituál. (Lee Ezequiel 34:​15, 16.) Maibé, Jeová mós hakarak ita atu buka ajuda bainhira ita presiza. Iha situasaun hanesan neʼe, ita presiza halo orasaun ba Jeová no mós buka ajuda husi “bibi-atan no mestre” sira iha kongregasaun.—Éf 4:​11, 12.

3. Oinsá mak ita hotu bele hetan benefísiu husi lisaun neʼe?

³ Iha lisaun neʼe, ita sei buka-hatene oinsá Jeová uza katuas kongregasaun atu ajuda ita iha dalan espirituál. Ita sei buka resposta ba pergunta sira hanesan: Bainhira mak ita presiza buka katuas sira-nia ajuda? Tanbasá ita presiza halo nuneʼe? No oinsá mak sira ajuda ita? Maski agora daudaun Ita la hasoru susar, maibé lisaun neʼe sei ajuda Ita atu hafolin liután Jeová nia arranju no hatene saida mak Ita bele halo bainhira presiza ajuda.

BAINHIRA MAK ITA PRESIZA “BOLU KATUAS SIRA”?

4. Oinsá ita hatene katak Tiago 5:​14-16, 19, 20 koʼalia kona-ba moras espirituál? (Haree mós foto.)

⁴ Dixípulu Tiago esplika oinsá Jeová uza katuas sira atu ajuda ita. Nia hakerek: “Iha ema ruma neʼebé moras iha imi-nia leet ka lae? Nia tenke bolu katuas sira iha kongregasaun.” (Lee Tiago 5:​14-16, 19, 20.) Kontestu hatudu katak Tiago koʼalia kona-ba moras espirituál. Oinsá ita hatene? Tiago husu ema neʼebé moras atu bolu katuas sira, laʼós doutór. Tiago mós esplika katak ema neʼe nia moras sei sai diʼak kuandu ninia sala hetan ona perdua. Hakat sira atu hetan kura iha dalan espirituál mak hanesan ho hakat atu hetan kura iha dalan fíziku. Bainhira ita moras fíziku, ita bá konsulta iha doutór, esplika ita-nia sintoma, no halo tuir matadalan husi doutór. Nuneʼe mós, bainhira ita moras espirituál, ita presiza hakbesik ba katuas ida, esplika ita-nia situasaun, no halo tuir matadalan husi Bíblia neʼebé ita simu.

5. Oinsá mak ita bele hatene katak ita-nia saúde espirituál komesa sai fraku?

⁵ Tiago kapítulu 5 anima ita atu buka ajuda husi katuas sira bainhira ita sente katak ita-nia saúde espirituál sai fraku. Maibé diʼak atu halo nuneʼe antes situasaun sai aat liután toʼo estraga ita-nia relasaun ho Jeová! Bíblia fó avizu mai ita katak se ita la kuidadu, ita bele lohi ita-nia an hodi hanoin katak ita-nia kondisaun espirituál diʼak hela. (Tgo 1:22) Uluk, ema Kristaun balu iha Sardes hanoin hanesan neʼe, no Jesus fó avizu ba sira. (Apok 3:​1, 2) Dalan ida atu analiza ita-nia saúde espirituál mak hodi kompara ita-nia laran-manas atu serbí Jeová agora ho tempu uluk. (Apok 2:​4, 5) Husu Ita-nia an: ‘Haʼu komesa baruk atu lee Bíblia no hanoin kleʼan ka lae? Haʼu ladún prepara no ladún tuir reuniaun sira ka lae? Haʼu lakon laran-manas atu haklaken ka lae? Se kompara ho uluk, agora haʼu hanoin liu kona-ba osan ka lae?’ Se Ita-nia resposta ba pergunta sira-neʼe ida mak sin, neʼe katak Ita-nia saúde espirituál komesa fraku, no se la hadiʼa, bele sai aat liután. Se Ita rasik labele hadiʼa, ka Ita halo ona buat ruma neʼebé Jeová la gosta, Ita presiza buka katuas sira-nia ajuda.

6. Ema neʼebé halo sala sériu presiza halo saida?

⁶ Klaru katak se ema ida halo ona sala sériu neʼebé bele sai razaun atu kongregasaun hasai, nia presiza hakbesik ba katuas ida. (1 Kor 5:​11-13) Ema neʼebé halo sala sériu presiza hetan ajuda atu hadiʼa ninia relasaun ho Jeová. Atu Jeová perdua ita, ita tenke ‘halo hahalok neʼebé hatudu katak ita arrepende an’. (Após 26:20) Neʼe inklui hakbesik ba katuas sira se ita halo ona sala neʼebé sériu.

7. Sé-sé deʼit mak presiza katuas sira-nia ajuda?

⁷ Katuas sira laʼós deʼit ajuda ema neʼebé halo ona sala sériu, maibé mós ajuda ema neʼebé fraku iha dalan espirituál. (Após 20:35) Porezemplu, karik Ita sente susar atu kontra hasoru hakarak neʼebé sala, liuliu ho fraku neʼebé Ita iha antes aprende lia-loos, hanesan uza droga, haree pornografia, ka halo hahalok la morál. Ita la presiza luta hasoru ida-neʼe mesak. Ita bele koʼalia ba katuas ida neʼebé Ita sente fasil atu koʼalia, no fiar bá katak nia sei rona ba Ita, fó matadalan, no hametin Ita katak Ita bele halo Jeová kontente hodi la halo tuir hakarak neʼebé sala. (Ecle 4:12) Se Ita sente laran-kraik tanba iha hakarak neʼebé sala, katuas sira bele fó-hanoin Ita katak Jeová kontente tanba Ita hakarak hametin Ita-nia relasaun ho nia no la sadere ba Ita-nia an rasik.—1 Kor 10:12.

8. Ita presiza koʼalia ba katuas sira kona-ba sala hotu neʼebé ita halo ka lae? Esplika toʼok.

⁸ Ita la presiza koʼalia ba katuas sira kona-ba sala hotu neʼebé ita halo. Porezemplu, karik Ita koʼalia liafuan neʼebé hakanek irmaun ka irmán ida nia laran, ka karik Ita sai hirus makaʼas. Se ida-neʼe akontese, duké koʼalia ba katuas, diʼak liu atu aplika Jesus nia matadalan kona-ba hadame malu ho irmaun ka irmán neʼe. (Mt 5:​23, 24) Ita mós bele halo peskiza kona-ba hahalok laran-maus, pasiénsia, no kontrola an. Klaru katak se Ita nafatin labele rezolve problema, Ita bele husu katuas nia ajuda. Bainhira Evódia no Síntike labele rezolve rasik sira-nia problema, Paulo husu irmaun ida atu ajuda sira. Katuas iha Ita-nia kongregasaun mós bele halo buat neʼebé hanesan.—Flp 4:​2, 3.

TANBASÁ MAK ITA PRESIZA BOLU KATUAS SIRA?

9. Tanbasá ita labele husik sentimentu moe hanetik ita atu koʼalia ba katuas sira? (Provérbios 28:13)

⁹ Bainhira ita halo sala sériu ka sente la iha forsa atu luta hasoru hakarak neʼebé sala, ita presiza iha fiar no aten-brani atu husu ajuda. Ita labele husik sentimentu moe hanetik ita atu koʼalia ba katuas sira. Tanbasá? Tanba Jeová fó katuas sira atu ajuda ita hametin ita-nia relasaun ho nia. Tan neʼe, bainhira ita koʼalia ba katuas sira, neʼe hatudu katak ita tau fiar ba Jeová no halo tuir ninia arranju. Ita rekoñese katak ita presiza Jeová nia ajuda kuandu ita besik atu monu ba sala. (Sal 94:18) No se ita halo ona sala, ita bele fiar katak Jeová perdua ita se ita fó sai ita-nia sala no la repete tan sala neʼe.—Lee Provérbios 28:13.

10. Saida mak bele akontese se ita koko atu subar ita-nia sala?

¹⁰ Se ita koko atu subar ita-nia sala, neʼe sei halo ita-nia situasaun sai aat liután. Bainhira Liurai David koko atu subar ninia sala, nia hasoru susar iha dalan espirituál, emosaun, no mós fíziku. (Sal 32:​3-5) Bainhira ita moras fíziku ka hetan kanek, ita hakarak halo kedas tratamentu tanba lakohi moras neʼe sai aat liután. Nuneʼe mós, kuandu ita halo sala neʼebé sériu, ita presiza buka kedas ajuda husi katuas sira atu ita-nia kondisaun espirituál la sai aat liután. Jeová komprende ida-neʼe, tan neʼe nia konvida ita atu “hadiʼa problema” ho nia hodi koʼalia ba katuas sira neʼebé nia uza atu ajuda ita.—Isa 1:​5, 6, 18.

11. Se ita subar sala neʼebé sériu, oinsá neʼe bele fó impaktu la diʼak ba ema seluk?

¹¹ Se ita subar ita-nia sala neʼebé sériu, neʼe bele fó impaktu la diʼak ba ema seluk. Ita bele hanetik Maromak nia espíritu santu atu ajuda kongregasaun no bele lori susar ba irmaun-irmán sira. (Éf 4:30) Nuneʼe mós, se ita hatene katak ema ruma iha kongregasaun halo sala neʼebé sériu, ita presiza husu nia atu koʼalia ba katuas sira.a Se ita subar ema seluk nia sala neʼebé sériu, ita sei hola parte iha ninia sala. (Lev 5:1) Domin ba Jeová book ita atu fó sai ba katuas sira kona-ba buat neʼebé akontese. Hodi halo nuneʼe, ita ajuda kongregasaun moos nafatin no ajuda ema neʼe atu hadiʼa ninia relasaun ho Jeová.

OINSÁ MAK KATUAS SIRA AJUDA ITA?

12. Oinsá mak katuas sira ajuda ema neʼebé fraku iha dalan espirituál?

¹² Bíblia husu katuas sira atu ajuda ema neʼebé fraku iha dalan espirituál. (1 Tes 5:14) Se Ita halo sala, karik katuas sira sei husu pergunta balu atu “kuru sai” Ita-nia hanoin no sentimentu. (Prov 20:5) Ita bele ajuda katuas sira hodi koʼalia nakloke maski Ita sente susar tanba Ita-nia kultura, toman, ka sentimentu moe. Keta hanoin katak buat neʼebé Ita atu koʼalia mak rona hanesan “liafuan arbiru deʼit”. (Job 6:3) Katuas sira sei la ansi atu foti konkluzaun, maibé sira sei rona didiʼak hodi bele komprende Ita-nia situasaun antes fó konsellu. (Prov 18:13) Katuas sira hatene katak la toʼo atu koʼalia dala ida deʼit hodi bele ajuda Ita, maibé presiza tempu.

13. Oinsá mak katuas sira bele ajuda ita liuhusi orasaun no matadalan husi Bíblia? (Haree mós foto.)

¹³ Bainhira Ita koʼalia ba katuas sira, sira sei hakaʼas an atu la aumenta tan Ita-nia todan. Maibé sira sei halo orasaun kona-ba Ita, no karik Ita sei hakfodak tanba hatene katak sira-nia orasaun mak “forsa boot”. Katuas sira mós sei ‘kose mina ba Ita hodi Jeová nia naran’. (Tgo 5:​14-16) “Mina” refere ba Maromak nia Liafuan. Neʼe katak katuas sira sei uza Bíblia ho matenek atu bele fó kmaan no ajuda Ita atu hadiʼa Ita-nia relasaun ho Jeová. (Isa 57:18) Matadalan husi Bíblia neʼebé sira fó bele hametin Ita-nia hakarak atu halo buat neʼebé loos. Liuhusi katuas sira, Ita bele rona Jeová nia liafuan neʼebé dehan: “Dalan mak neʼe. Laʼo tuir ida-neʼe bá.”—Isa 30:21.

14. Tuir Galásia 6:​1, oinsá mak katuas sira ajuda ema neʼebé “laʼo sala dalan”?

¹⁴ Lee Galásia 6:1. Ema Kristaun neʼebé “laʼo sala dalan” la laʼo tuir Jeová nia matadalan neʼebé loos. “Laʼo sala dalan” bele refere ba desizaun neʼebé la matenek ka halo sala neʼebé sériu. Domin sei book katuas sira atu ‘koko hadiʼa ema hanesan neʼe ho laran-maus’. Liafuan Gregu neʼebé tradús nuʼudar “hadiʼa” bele uza atu esplika kona-ba oinsá doutór hadiʼa ruin neʼebé tohar. Hanesan doutór neʼebé matenek hakaʼas an atu hadiʼa ruin neʼebé tohar hodi la aumenta pasiente nia moras, nuneʼe mós katuas sira fokus atu ajuda ema neʼebé moras espirituál hodi la aumenta ninia todan. Bíblia mós haruka katuas sira atu ‘tau matan ba sira-nia an’. Nuʼudar sira ajuda atu hametin ita, sira rekoñese katak sira mós la perfeitu no bele halo sala. Tan neʼe, sira la hanoin katak sira mak diʼak liu ka loos liu, maibé sira sei hatudu haraik an no hanoin ema seluk.—1 Ped 3:8.

15. Saida mak ita bele halo se ita iha problema?

¹⁵ Ita bele tau fiar ba katuas kongregasaun. Sira hetan ona treinu atu la fó sai segredu, fó konsellu husi Bíblia duké koʼalia hodi tuir sira-nia hanoin rasik, no kontinua ajuda ita atu tahan hasoru ita-nia problema. (Prov 11:13; Gal 6:2) Katuas ida-idak nia hahalok no esperiénsia la hanesan, maibé ita livre atu hakbesik ba katuas naran deʼit atu fó sai ita-nia problema. Klaru katak ita la bá husu katuas ida-idak hodi hein katak ita sei hetan konsellu neʼebé ita gosta. Se ita halo nuneʼe, ita sei sai hanesan ema neʼebé buka deʼit “buat neʼebé sira hakarak atu rona” duké buka “hanorin neʼebé loos” husi Bíblia. (2 Tim 4:3) Bainhira ita husu ajuda husi katuas ida, karik nia sei husu ita se ita koʼalia ona ba katuas seluk no simu ona matadalan ruma ka lae. No tanba haraik an, karik katuas neʼe mós sei husu matadalan husi katuas seluk.—Prov 13:10.

ITA IDA-IDAK NIA RESPONSABILIDADE

16. Ita ida-idak iha responsabilidade saida?

¹⁶ Maski katuas sira mak tau matan ita nuʼudar Maromak nia bibi, maibé ita rasik mak foti desizaun kona-ba buat neʼebé ita sei halo. Ita ida-idak iha responsabilidade atu hatudu sai ita-nia domin no laran-metin no hatán ba Maromak kona-ba ita-nia liafuan no hahalok. (Rom 14:12) No Jeová sei ajuda ita atu foti desizaun neʼebé diʼak no kontinua laran-metin. Tan neʼe, katuas sira la manda ita kona-ba buat neʼebé ita presiza halo, maibé sira uza Bíblia atu ajuda ita komprende Jeová nia hanoin no husik ita mak halo desizaun. Hodi halo tuir sira-nia konsellu neʼebé bazeia ba Bíblia, ita bele treinu ita-nia “kbiit atu tetu didiʼak” hodi bele halo desizaun neʼebé matenek.—Ebr 5:14.

17. Ita presiza deside metin atu halo saida?

¹⁷ Ita agradese tebes tanba Jeová tau matan ita nuʼudar ninia bibi! Jeová fó knaar ba Jesus nuʼudar “bibi-atan diʼak”, neʼebé fó ninia moris nuʼudar sakrifísiu hodi ita bele moris ba nafatin. (João 10:11) No liuhusi katuas sira iha kongregasaun, Jeová kumpre ninia promesa neʼebé dehan: “Haʼu sei fó imi bibi-atan sira neʼebé halo tuir haʼu-nia hakarak, no sira sei fó-han imi ho koñesimentu no matenek.” (Jer 3:15) Bainhira ita sai fraku ka moras iha dalan espirituál, ita labele dada an atu bolu katuas sira hodi husu ajuda. Mai ita deside metin atu aproveita didiʼak arranju neʼebé Jeová halo liuhusi katuas kongregasaun.