KAPÍTULU 17
Hakbesik nafatin ba Jeová nia organizasaun
TIAGO hakerek: “Hakbesik ba Maromak, no nia sei hakbesik ba imi.” (Tgo 4:8) Jeová la dook husi ita no maski ita la perfeitu, maibé nia hakarak rona ba ita. (Após 17:27) Oinsá ita bele hakbesik ba Maromak? Ita bele hakbesik ba Jeová liuhusi haburas relasaun besik ho nia no mós halo orasaun ba nia husi laran. (Sal 39:12) Ita mós bele haburas relasaun diʼak ho Jeová liuhusi estuda beibeik ninia Liafuan Bíblia. Hodi halo nuneʼe, ita bele koñese Jeová, hatene ninia hakarak no mós hatene buat neʼebé nia hakarak ita atu halo. (2 Tim 3:16, 17) Ita mós haburas domin ba nia no taʼuk atu hakanek ninia laran.—Sal 25:14.
2 Liuhusi Jeová nia Oan-Mane Jesus deʼit mak ita bele sai Jeová nia belun. (João 17:3; Rom 5:10) Só Jesus deʼit mak hatene didiʼak Jeová nia hanoin. Nia koñese didiʼak ninia Aman no bele dehan: “Haʼu-nia Aman entrega ona buat hotu mai haʼu, no la iha ema ida mak hatene Oan-Mane, só Aman deʼit. No la iha ema ida mak hatene Aman, só Oan-Mane deʼit no mós ema neʼebé Oan-Mane hakarak hanorin kona-ba Aman.” (Lc 10:22) Tan neʼe, bainhira ita aprende kona-ba Jesus nia hanoin no sentimentu iha Evanjellu, tuir loloos ita mós aprende kona-ba Jeová nia hanoin no sentimentu. Koñesimentu neʼe ajuda ita atu hakbesik ba Maromak.
3 Maromak nia Oan-Mane mak sai nuʼudar Ulun ba ninia organizasaun. Bainhira ita hakbesik nafatin ba Maromak nia organizasaun parte rai nian, ita bele iha relasaun diʼak ho Jeová tanba organizasaun neʼe ajuda ita hatene oinsá atu halo Jeová nia hakarak. Hanesan fó sai nanis ona iha Mateus 24:45-47, Naʼi Jesus Kristu hili ona “atan laran-metin no matenek” atu ‘fó ai-han iha tempu loloos’ ba Maromak nia atan sira. Ohin loron, atan laran-metin neʼe fó ai-han espirituál barak ba ita. Liuhusi atan neʼe, Jeová anima ita atu lee ninia Liafuan loroloron, tuir reuniaun Kristaun beibeik, no badinas atu “haklaken liafuan diʼak kona-ba Maromak nia Ukun”. (Mt 24:14; 28:19, 20; Jos 1:8; Sal 1:1-3) Maski atan laran-metin la perfeitu, maibé ita fiar metin katak Maromak mak dirije atan neʼe. Ita tenke hakaʼas an atu hakbesik nafatin ba Jeová nia organizasaun parte rai nian no halo tuir ninia matadalan. Neʼe sei ajuda ita hakbesik liután ba Maromak Jeová, hametin ita no proteje ita maski hasoru susar.
TANBASÁ SUSAR AUMENTA?
4 Karik Ita sai Testemuña ba tinan barak ona. Se nuneʼe, karik Ita-nia laran-metin hetan ona koko. Ka karik Ita foin mak koñese Jeová no halibur hamutuk ho ninia povu. Maski nuneʼe, Ita hatene ona katak Diabu Satanás kontra ema hotu neʼebé apoia Jeová nia direitu atu ukun. (2 Tim 3:12) Entaun, maski Ita tahan ona susar barak ka uitoan, maibé Ita la presiza sai taʼuk ka laran-kraik. Jeová promete katak nia sei apoia no fó Ita moris ba nafatin nuʼudar kolen.—Ebr 13:5, 6; Apok 2:10.
5 Antes Satanás nia mundu neʼe lakon, karik ita hotu sei hasoru susar. Bainhira Maromak nia Ukun harii iha tinan 1914, Jesus soe tun Satanás no ninia anju aat sira ba rai no sira labele tama fali ba lalehan. Satanás sai hirus, tan neʼe nia hamosu susar barak liután iha mundu, neʼe inklui mós fó-terus liután ba Jeová nia atan sira. Susar sira-neʼe hatudu katak lakleur tan Satanás nia ukun sei lakon.—Apok 12:1-12.
6 Satanás sai hirus tebes tanba nia lakon ninia pozisaun iha lalehan, no nia mós hatene katak ninia tempu hela uitoan deʼit ona. Satanás no ninia anju aat sira hakaʼas an makaʼas atu hanetik serbisu haklaken no koko halakon Jeová nia povu nia unidade. Entaun ita hotu presiza halo funu espirituál. Bíblia esplika kona-ba funu neʼe hodi dehan: “Ita halo funu laʼós kontra raan no isin, maibé kontra governu sira, kontra sira neʼebé iha podér, kontra ukun-naʼin sira iha mundu neʼebé nakukun no kontra anju aat sira iha lalehan.” Se ita hakarak manán funu neʼe no apoia Jeová, ita presiza kontinua luta makaʼas no uza ita-nia ekipamentu funu nian. Ita tenke “hamriik metin hodi kontra Diabu nia lasu sira”. (Éf 6:10-17) Neʼe katak ita presiza tahan toʼo rohan.
HABURAS KBIIT ATU TAHAN
7 Kbiit atu tahan refere ba “ema nia abilidade atu tahan susar ka problema sira”. Kuandu Bíblia koʼalia kona-ba kbiit atu tahan, neʼe katak kontinua halo buat neʼebé loos maski hasoru susar, ema kontra, ema fó-terus, ka hasoru situasaun seluk neʼebé bele halakon ita-nia laran-metin ba Maromak. Ita presiza haburas kbiit atu tahan. Presiza tempu atu halo nuneʼe. Se ita hametin liután ita-nia fiar, ita-nia kbiit atu tahan mós sei aumenta liután. Bainhira ita foin tama lia-loos, karik ita hasoru susar kiʼik oioin, no se ita tahan susar sira-neʼe, ita-nia fiar sei sai metin liután, no tuirmai ita bele tahan susar boot liu neʼebé ita sei hasoru iha futuru. (Lc 16:10) Ita labele hein toʼo hasoru susar boot mak foin deside atu hametin ita-nia fiar. Ita tenke hametin ita-nia fiar antes hasoru susar. Apóstolu Pedro dehan katak ita presiza haburas kbiit atu tahan hanesan ita haburas hahalok diʼak sira seluk. Nia hakerek: “Imi neʼebé iha ona fiar tenke hakaʼas an ho kbiit tomak atu aumenta tan ho hahalok diʼak, imi-nia hahalok diʼak aumenta tan ho koñesimentu, imi-nia koñesimentu aumenta tan ho hahalok kontrola an, imi-nia kontrola an aumenta tan ho hahalok tahan susar, imi-nia hahalok tahan susar aumenta tan ho hahalok laran-metin ba Maromak, imi-nia laran-metin ba Maromak aumenta tan ho domin ba maun-alin sira, no imi-nia domin ba maun-alin sira aumenta tan ho hahalok domin ba ema hotu.”—2 Ped 1:5-7; 1 Tim 6:11.
Loroloron bainhira ita hasoru susar no manán susar sira-neʼe, ita-nia kbiit atu tahan mós sei aumenta liután
8 Iha ninia karta, Tiago fó sai tanbasá importante atu haburas kbiit atu tahan. Nia dehan: “Haʼu-nia maun-alin sira, haksolok bá kuandu imi hasoru susar oioin, tanba imi hatene katak imi-nia fiar neʼebé hetan ona koko iha dalan hanesan neʼe sei halo imi aprende atu tahan susar. Hodi tahan nafatin susar, imi sei treinu didiʼak imi-nia an, atu nuneʼe imi bele sai kompletu no sai diʼak iha buat hotu, hodi la falta buat ida.” (Tgo 1:2-4) Tiago hatete katak ema Kristaun sira hatene sira sei hasoru susar no presiza haksolok bainhira hasoru susar tanba neʼe ajuda sira atu haburas kbiit atu tahan. Ita mós hanoin hanesan neʼe ka lae? Tiago mós dehan katak bainhira ita tahan susar, neʼe bele ajuda ita atu haburas hahalok Kristaun no neʼe sei halo Jeová hadomi liután ita. Loroloron bainhira ita hasoru susar no manán susar sira-neʼe, ita-nia kbiit atu tahan mós sei aumenta liután. No neʼe mós sei ajuda ita atu haburas hahalok diʼak seluk tan.
9 Ita halo Maromak kontente bainhira ita tahan susar. Nia sei fó ita kolen atu moris ba nafatin. Tiago hatutan tan: “Ksolok ba ema neʼebé kontinua tahan susar, tanba kuandu Maromak simu ona nia, nia sei simu koroa moris nian, koroa neʼebé Jeová promete ona ba ema sira neʼebé kontinua hadomi nia.” (Tgo 1:12) Ita presiza tahan susar sira atu bele moris ba nafatin. Se ita la iha kbiit atu tahan, ita sei la hamriik metin iha lia-loos. Se ita rende an bainhira hasoru susar husi mundu neʼe, ikusmai ita sei fila fali ba mundu. Se ita la iha kbiit atu tahan, ita sei la hetan Jeová nia espíritu santu no ita sei la hatudu hahalok diʼak neʼebé mai husi espíritu santu.
10 Atu bele kontinua tahan susar iha loron ikus sira-neʼe, ita presiza haburas hanoin neʼebé loos kona-ba susar neʼebé ita hetan nuʼudar ema Kristaun. Hanoin-hetan Tiago dehan: “Haksolok bá kuandu imi hasoru susar oioin.” Karik neʼe la fasil bainhira ita moras ka sente laran-susar. Maibé hanoin-hetan katak atu hetan moris ba nafatin ita presiza tahan. Apóstolu sira-nia ezemplu bele ajuda ita hatene oinsá atu haksolok nafatin bainhira hasoru susar. Ita bele lee kona-ba neʼe iha livru Apóstolu. Neʼe dehan: “Sira bolu apóstolu sira, baku sira ho xikote, no haruka sira atu labele koʼalia tan hodi Jesus nia naran, no husik sira bá. Nuneʼe apóstolu sira sai husi Sinédriu nia oin no sira haksolok tanba sira hetan moe tanba Jesus nia naran.” (Após 5:40, 41) Apóstolu sira komprende katak susar neʼebé sira hasoru hatudu katak sira halo tuir Jesus nia mandamentu no Jeová simu sira. Bainhira Pedro hakerek ninia karta primeiru, nia koʼalia kona-ba tanbasá importante atu tahan terus hodi halo hahalok diʼak.—1 Ped 4:12-16.
11 Ita mós bele aprende husi Paulo no Silas nia ezemplu. Bainhira sira haklaken iha sidade Filipe, ema kaer sira no duun katak sira halo runguranga iha sidade no hanorin kona-ba toman sira neʼebé la tuir lei. Rezultadu mak ema baku sira no hatama sira ba komarka. Bíblia konta katak “iha kalan fahe-rua” bainhira Paulo no Silas iha komarka laran no sira-nia isin sei kanek hela, sira “halo orasaun no hahiʼi Maromak ho knananuk, no ema iha komarka laran rona ba sira”. (Após 16:16-25) Paulo no Silas haree susar neʼebé sira hasoru tanba Kristu nuʼudar evidénsia katak sira mak ema neʼebé laran-metin iha Maromak nia oin no ema nia oin. No sira mós haree ida-neʼe nuʼudar dalan atu fó sasin ba ema sira neʼebé hakarak atu rona ba liafuan diʼak no neʼe bele ajuda ema hetan moris. Iha kalan neʼe kedas, guarda komarka nian no ninia família simu lia-loos no sai dixípulu. (Após 16:26-34) Paulo no Silas tau fiar ba Jeová, no mós iha konfiansa katak Jeová iha kbiit no prontu atu ajuda sira bainhira sira hasoru susar. Jeová ajuda duni sira.
12 Ohin loron, Jeová mós fó buat hotu neʼebé ita presiza atu bele tahan susar. Nia hakarak ita atu tahan susar sira. Nia fó ona ninia Liafuan Bíblia atu ajuda ita hetan koñesimentu loos kona-ba ninia hakarak. Neʼe hametin ita-nia fiar. Ita bele ransu hamutuk ho ita-nia maluk fiar-naʼin no halo serbisu sagradu. Ita mós bele kontinua halo orasaun ba Jeová hodi hametin ita-nia relasaun diʼak ho nia. Nia rona ba ita-nia orasaun neʼebé atu hatudu agradese no mós ita-nia harohan atu husu ajuda hodi la halo sala. (Flp 4:13) Ita mós bele haburas kbiit atu tahan liuhusi medita kona-ba ita-nia esperansa ba futuru.—Mt 24:13; Ebr 6:18; Apok 21:1-4.
TAHAN SUSAR OIOIN
13 Susar neʼebé ita hasoru mak hanesan ho susar neʼebé Jesus Kristu nia dixípulu sira hasoru iha tempu uluk. Ohin loron, ema koʼalia aat no baku Testemuña sira tanba rona informasaun neʼebé la loos. Hanesan iha apóstolu sira-nia tempu, Testemuña sira hetan susar barak husi ema neʼebé fanátiku ba relijiaun. Bíblia fó sai katak relijiaun sira-neʼe nia hanorin no hahalok mak sala. (Após 17:5-9, 13) Dala ruma, Jeová nia povu hetan ajuda tanba sira hatene no uza lei sira atu proteje sira-nia direitu. (Após 22:25; 25:11) Maibé, ukun-naʼin balu mós bandu ita-nia atividade sira, no hakaʼas an atu hapara ita-nia serbisu haklaken. (Sal 2:1-3) Bainhira hasoru susar sira-neʼe, ita ho aten-brani halo tuir ezemplu husi apóstolu laran-metin sira neʼebé dehan: “Ami tenke halo tuir Maromak nuʼudar ukun-naʼin duké halo tuir ema.”—Após 5:29.
14 Sentimentu nasionalizmu aumenta barak iha mundu tomak. Tan neʼe, ema barak liután obriga Testemuña sira atu para husi serbisu haklaken neʼebé Maromak haruka sira atu halo. Maromak nia atan hotu komprende liafuan iha Apokalipse 14:9-12 kona-ba “adora animál fuik no ninia estátua”. João nia liafuan tuirmai mak importante: “Ema santu sira presiza atu tahan susar, santu sira neʼebé halo tuir Maromak nia ukun-fuan sira no kaer metin ba fiar kona-ba Jesus.”
15 Karik Ita hetan susar tanba funu, ema kontra makaʼas Ita ka governu bandu, no buat sira-neʼe bele hanetik Ita atu halaʼo Ita-nia adorasaun. Karik Ita labele halibur hamutuk nuʼudar kongregasaun. Karik Ita labele kontaktu sukursál. Karik Ita mós la hetan vizita husi katuas área. Karik Ita la simu Ita-nia publikasaun sira. Se nuneʼe, Ita presiza halo saida?
16 Ita presiza hakaʼas an halo buat neʼebé Ita bele halo, tuir Ita-nia situasaun. Ita bele estuda mesak. Karik Ita bele halibur hamutuk iha grupu kiʼik-kiʼik atu estuda iha uma privadu. Ita bele halaʼo reuniaun hodi estuda Bíblia ka estuda fali publikasaun sira neʼebé Ita estuda ona iha tempu uluk. Keta hanoin barak ka laran-taridu. Baibain Grupu Administradór sei buka dalan lalais hodi komunika ho irmaun sira neʼebé iha responsabilidade.
17 Maski karik Ita labele koʼalia ho maluk Kristaun seluk, hanoin-hetan katak Jeová no ninia Oan-Mane Jesus Kristu sempre hamutuk ho Ita. Ita-nia esperansa bele metin nafatin. Jeová kontinua rona ba Ita-nia orasaun, no nia bele hametin Ita liuhusi ninia espíritu santu. Buka matadalan husi nia. Hanoin-hetan katak Ita mak Jeová nia atan no Jesus Kristu nia dixípulu. Tan neʼe, uza didiʼak oportunidade sira atu haklaken. Jeová sei haraik bensaun ba Ita-nia hakaʼas an, no karik ema seluk sei adora Jeová hamutuk ho Ita.—Após 4:13-31; 5:27-42; Flp 1:27-30; 4:6, 7; 2 Tim 4:16-18.
18 Se ema ameasa atu oho Ita hanesan ema halo ba apóstolu Paulo no mós ema seluk, diʼak atu tau fiar ba “Maromak neʼebé fó moris-hiʼas ba ema mate sira”. (2 Kor 1:8-10) Ita-nia fiar kona-ba moris-hiʼas bele ajuda Ita atu tahan, maski ema kontra makaʼas Ita. (Lc 21:19) Jesus hatudu ezemplu diʼak. Nia hatene katak hodi laran-metin nafatin bainhira hasoru susar, neʼe sei hametin ema seluk atu tahan susar sira. Se Ita mós laran-metin, Ita sei hametin ema seluk.—João 16:33; Ebr 12:2, 3; 1 Ped 2:21.
19 Karik Ita mós tahan susar tanba situasaun oioin. Porezemplu, ema balu sai laran-kraik tanba ema iha sira-nia haklaken-fatin lakohi rona ba lia-loos. Ema seluk karik presiza tahan susar tanba moras iha dalan fíziku ka mentál, ka karik iha limitasaun tanba la perfeitu. Apóstolu Paulo mós tenke tahan susar ruma neʼebé hanetik ka halo susar ba nia atu halaʼo ninia serbisu ba Maromak. (2 Kor 12:7) No mós iha apóstolu sira-nia tempu, iha ema Kristaun ida naran Epafrodito husi sidade Filipe. Nia sai “laran-triste tanba [ninia belun sira] rona katak nia moras”. (Flp 2:25-27) Dala ruma susar atu tahan problema neʼebé mosu tanba ita no mós ema seluk la perfeitu. Karik mosu problema entre Ita no maluk Kristaun ida ka ema ruma iha Ita-nia família. Maibé Ita bele tahan susar sira-neʼe ho susesu no bele manán se Ita halo tuir konsellu husi Jeová nia Liafuan.—Eze 2:3-5; 1 Kor 9:27; 13:8; Kol 3:12-14; 1 Ped 4:8.
LARAN-METIN NAFATIN
20 Ita tenke kontinua halo tuir Jesus Kristu neʼebé Jeová hili ona nuʼudar Ulun ba kongregasaun. (Kol 2:18, 19) Ita tenke apoia “atan laran-metin no matenek” no mós ema sira neʼebé atan neʼe hili ona atu dirije ita. (Ebr 13:7, 17) Hodi halo tuir didiʼak arranju teokrátiku no apoia sira neʼebé dirije ita, ita sei apoia malu nuʼudar organizasaun neʼebé halo Jeová nia hakarak. Ita tenke halo orasaun beibeik. Maski ita tama komarka ka hasoru susar seluk, maibé la iha buat ida mak bele hanetik ita atu koʼalia ho ita-nia Aman iha lalehan neʼebé hadomi ita ka halakon ita-nia unidade nuʼudar Jeová nia povu.
21 Mai ita hakaʼas an atu halo buat hotu neʼebé ita bele hodi kumpre Jesus nia mandamentu neʼebé nia fó ba ninia dixípulu sira depois nia moris-hiʼas. Nia dehan: “Neʼe duni, laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir mandamentu hotu neʼebé haʼu fó ona ba imi.” (Mt 28:19, 20) Hanesan Jesus, mai ita hakaʼas an atu tahan susar sira. Mai ita sempre hanoin kona-ba bensaun husi Maromak nia Ukun no mós ita-nia esperansa atu moris ba nafatin. (Ebr 12:2) Nuʼudar Kristu nia dixípulu neʼebé hetan ona batizmu, ita iha priviléjiu atu hola parte hodi kumpre Jesus nia profesia kona-ba “mundu neʼe nia rohan”. Nia dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.” (Mt 24:3, 14) Se ita kumpre serbisu neʼe ho laran tomak, ita sei hetan moris ba nafatin iha Jeová nia mundu foun.