Presiza tahan kuandu haklaken
1 Maizumenus durante tinan 30 liu, apóstolu Paulo haksolok hodi halaʼo ninia knaar atu haklaken evanjellu. Maibé, nia mós hasoru susar oioin kuandu halaʼo knaar neʼe. (2 Kor 11:23-29) Maski nuneʼe, Paulo la para atu haklaken. (2 Kor 4:1) Nia hatene katak forsa atu tahan iha serbisu atu haklaken mak mai husi Maromak Jeová. (Flp 4:13) Tanba Paulo tahan ho laran-metin, nia bele hatete: “Imi buka halo tuir haʼu-nia hahalok, nuʼudar haʼu halo tuir Kristu.”—1 Kor 11:1.
2 Tahan susar agora: Loron-loron irmán-irmaun barak hasoru susar husi família, kolega iha serbisu-fatin no kolega iha eskola. Porezemplu ema goza sira no haterus sira. (Mt 10:35; Joao 15:20) Karik Ita mós hasoru daudauk susar hanesan neʼe. Iha parte seluk, karik Ita hasoru susar seluk hanesan moras, ka buat ruma neʼebé koko Ita-nia fiar no Ita-nia laran-metin. Hodi hanoin didiʼak ezemplu husi ema laran-metin iha tempu uluk no mós maluk kristaun iha tempu agora neʼebé hasoru no manán susar hanesan neʼe, Ita bele hetan forsa atu tahan.—1 Ped 5:9.
3 Ita bele hetan forsa atu hamriik metin iha ita-nia serbisu haklaken hodi hakaʼas an atu ‘tau hatais funu nian neʼebé Maromak haraik tiha ba ita’. (Ef 6:10-13, 15) No mós importante duni atu halo orasaun hodi bele tahan. Maromak haraik ninia espíritu santu ba ita atu nuneʼe ita bele tahan susar sira. (2 Kor 6:4-7) Atu manán funu espirituál nian, ita tenke halo tuir matadalan sira husi Maromak atu hafoun ita-nia hanoin. (Sal 119:24, 85-88) Hanesan oan sei lee beibeik surat husi nia aman neʼebé hadomi nia atubele hametin nia relasaun ho nia aman, nuneʼe mós kuandu ita lee Bíblia loron-loron ita hametin ita-nia relasaun ho Maromak Jeová. Liuhusi programa atu estuda mesak, ita bele hetan matenek atu hasoru susar oioin no atubele foti desizaun tuir Maromak nia hanoin, no mós ita bele hametin ita-nia fiar atu serbí Maromak Jeová nafatin.—Prov 2:10, 11.
4 Tahan lori bensaun barak: Hanesan ho apóstolu Paulo, ita-nia laran-metin hodi tahan susar sira kuandu halaʼo ita-nia knaar sei halo Maromak Jeová nia laran kontente no lori bensaun ba ita rasik no ba ema seluk. (Prov 27:11) Mai ita hakaʼas an atu tahan iha serbisu haklaken, no iha tempu neʼebé hanesan ita bele hatudu katak ita-nia fiar mak metin no “iha folin boot liu fali osan-mean neʼebé bele mohu maski ema koko ho ahi”.—1 Ped 1:6, 7 [MF].