Apéndise

Lia-menon ba inan-aman Kristaun:

Nuʼudar inan-aman, imi hakarak ajuda imi-nia oan hadomi Jeová no dedika sira-nia an ba nia. Saida mak imi bele halo atu ajuda sira laʼo ba oin toʼo hetan batizmu? Oinsá mak imi bele hatene katak sira prontu ona atu hetan batizmu?

Jesus dehan ba ninia dixípulu sira: “Hanorin ema husi nasaun hotu atu sai haʼu-nia dixípulu, fó batizmu ba sira.” (Mt 28:19) Tuir eskritura neʼe, antes ema ida hetan batizmu, nia tenke moris ona nuʼudar Jesus nia dixípulu ida. Neʼe katak nia hatene no fiar Kristu nia hanorin no mós moris tuir ida-neʼe ho didiʼak. Ema neʼebé idade kiʼik mós bele halo tuir Jesus no hetan batizmu.

Hatudu ezemplu diʼak ba oan sira, no kuda Jeová nia hanorin iha sira-nia laran. (Deut 6:6-9) Neʼe inklui hanorin lia-loos báziku husi Bíblia no treinu sira-nia kbiit atu tetu didiʼak Bíblia nia prinsípiu sira no moris tuir ida-neʼe hodi uza livru Moris Haksolok ba Nafatin. Ajuda imi-nia oan sira atu bele esplika sira-nia fiar ho sira-nia liafuan rasik. (1 Ped 3:15) Kuandu imi-nia oan hetan anima no koñesimentu husi imi, husi estuda mesak, adorasaun família nian, reuniaun sira, no ransu hamutuk ho maluk Kristaun, neʼe sei ajuda sira atu kumpre kritéria atu hetan batizmu no kontinua laʼo ba oin. Kontinua ajuda sira atu halo planu espirituál.

Provérbios 20:11 dehan: “Ema bele hatene se labarik ida iha hahalok loos no moos liuhusi ninia hahalok.” Entaun, oinsá mak labarik ida hatudu katak nia sai ona Jesus Kristu nia dixípulu no prontu atu hetan batizmu?

Labarik ida neʼebé laʼo ba oin iha lia-loos tenkesér halo tuir ninia inan-aman. (Após 5:29; Kol 3:20) Bainhira Jesus tinan 12, Bíblia dehan: “Nia kontinua halo tuir [ninia inan-aman].” (Lc 2:51) Klaru katak la iha labarik ida mak perfeitu. Maibé, labarik neʼebé hakarak hetan batizmu sei hakaʼas an atu banati-tuir Jesus no hetan naran diʼak nuʼudar labarik neʼebé halo tuir inan-aman.

Labarik neʼe mós tenke hatudu katak nia hakarak aprende lia-loos husi Bíblia. (Lc 2:46) Imi-nia oan gosta tuir reuniaun no hola parte iha reuniaun ka lae? (Sal 122:1) Nia gosta lee Bíblia beibeik no estuda Bíblia mesak ka lae?​—Mt 4:4.

Labarik neʼebé laʼo ba oin no hakarak hetan batizmu presiza hakaʼas an atu tau uluk Jeová nia hakarak iha ninia moris. (Mt 6:33) Nia hatene katak nia iha responsabilidade atu fó sai ninia fiar ba ema seluk. Nia hola parte iha serbisu haklaken iha dalan oioin no la moe atu fó sai ba mestre sira ka kolega eskola katak nia mak Testemuña ba Jeová. Nia mós badinas atu prepara ninia knaar iha Reuniaun Moris Kristaun no Haklaken.

Nia mós hakaʼas an atu moos nafatin iha dalan morál hodi la ransu ho ema neʼebé la diʼak. (Prov 13:20; 1 Kor 15:33) Nia mós hatudu ida-neʼe liuhusi kuidadu bainhira hili múzika, filme, programa televizaun, vídeo game no uza internét.

Inan-aman nia hakaʼas an ajuda ona sira-nia oan, no book oan sira atu halo tuir inan-aman, fiar lia-loos no kumpre kritéria atu hetan batizmu maski sira tinan kiʼik hela. Inan-aman sira, ami hein katak Jeová sei haraik bensaun ba imi-nia hakaʼas an tanba imi ajuda imi-nia oan atu foti desizaun importante neʼebé kona sira-nia relasaun diʼak ho Jeová.

Lia-menon ba haklaken-naʼin neʼebé seidauk hetan batizmu:

Serbí Jeová hamutuk ho kongregasaun nuʼudar haklaken-naʼin mak priviléjiu furak. Agora, Ita fó sai Ita-nia hakarak atu hetan batizmu. Ami hakarak gaba Ita tanba Ita laʼo ba oin daudaun iha dalan espirituál. Ita estuda Maromak nia Liafuan, iha koñesimentu neʼebé loos, no Ita mós fiar ba Maromak nia promesa sira.​—João 17:3; Ebr 11:6.

Antes Ita estuda ho Testemuña ba Jeová, karik Ita tuir ona relijiaun seluk. Ka uluk Ita la fiar ba Maromak no la iha relijiaun. Ka karik Ita halo buat neʼebé kontra Bíblia nia matadalan. Maibé agora, Ita hatudu ona Ita-nia fiar hodi arrepende an, ka hakribi Ita-nia sala neʼebé uluk Ita halo. Ita mós husik tiha ona moris uluk nian neʼebé la loos no hakarak duni atu moris tuir dalan neʼebé loos iha Maromak nia oin.​—Após 3:19.

Ka karik Ita aprende Maromak nia matadalan “husi kiʼik kedas” no neʼe proteje Ita atu la monu ba sala sériu oioin. (2 Tim 3:15) Ita aprende ona atu tahan hasoru tentasaun sira neʼebé mai husi kolega no husi buat seluk neʼebé book Ita atu halo sala kontra Jeová. Ita hatudu ona Ita-nia fiar hodi hamriik metin hodi apoia adorasaun neʼebé loos no fó sai Ita-nia fiar ba ema seluk. Ita hetan ona treinu atu halaʼo serbisu haklaken. Agora, Ita rasik halo ona desizaun atu serbí Jeová nuʼudar haklaken-naʼin neʼebé seidauk hetan batizmu.

Ita laʼo ba oin ona iha dalan espirituál no hanoin atu halo hakat rua tuirmai, neʼe mak dedikasaun no batizmu. Ita dedika an ba Jeová liuhusi orasaun hodi fó sai Ita rasik nia desizaun atu fó Ita-nia moris tomak ba Jeová mesak deʼit ba nafatin. (Mt 16:24) Tuirmai Ita hatudu sai desizaun neʼe liuhusi batizmu. (Mt 28:19, 20) Bainhira Ita dedika an no hetan batizmu, Ita sai nuʼudar Maromak Jeová nia atan. Neʼe mak priviléjiu neʼebé furak tebes.

Maibé hanesan Ita aprende ona husi Bíblia, Ita sei hasoru susar oioin. Hanoin-hetan katak lakleur depois Jesus hetan batizmu, “espíritu lori Jesus ba rai-fuik, no Diabu tenta nia”. (Mt 4:1) Nuneʼe mós ho Ita, depois Ita hetan tiha batizmu nuʼudar Kristu nia dixípulu, Ita sei hasoru susar liután. (João 15:20) Susar sira-neʼe bele mosu liuhusi dalan oioin, karik mai husi Ita-nia família rasik. (Mt 10:36) Karik kolega eskola, kolega serbisu ka viziñu sira sei goza Ita. Maibé hanoin-hetan nafatin Jesus nia liafuan iha Marcos 10:29, 30, neʼebé dehan: “Haʼu hatete loloos ba imi katak, ema neʼebé husik ona uma, maun-alin ka feton, inan ka aman, oan, ka toʼos tanba haʼu no tanba liafuan diʼak sei simu uma, maun-alin, feton, inan, oan no toʼos dala atus ida liu fali uluk nian, hamutuk ho terus oioin iha tempu agora, no sei simu moris rohan-laek iha tempu neʼebé atu mai.” Tan neʼe, kontinua hakaʼas an atu hakbesik liután ba Jeová no moris tuir ninia matadalan sira.

Kuandu Ita hakarak hetan batizmu, fó-hatene ba koordenadór ba grupu katuas. Katuas sira sei koʼalia hamutuk ho Ita hodi uza pergunta sira iha livru neʼe, atu bele hatene se Ita prontu ona ka lae atu hetan batizmu. Ita bele komesa kedas prepara resposta ba pergunta sira-neʼe bainhira Ita halo estuda mesak.

Bainhira Ita halo preparasaun, lee no hanoin didiʼak eskritura sira iha pergunta ida-idak nia kraik. Ita bele hakerek Ita-nia resposta ka nota ruma iha livru neʼe ka iha fatin seluk. Kuandu Ita koʼalia hamutuk ho katuas sira, Ita bele uza Ita-nia nota no mós bele husik livru neʼe nakloke nafatin. Se Ita ladún komprende pergunta ruma, Ita bele husu ajuda husi Ita-nia mestre Bíblia ka katuas sira.

Kuandu katuas sira husu pergunta, Ita la presiza fó resposta neʼebé naruk ka ho liafuan barabarak. Diʼak liu atu fó resposta simples deʼit hodi uza Ita-nia liafuan rasik. Kuandu hatán ba pergunta sira-neʼe, diʼak liután se Ita uza eskritura ida ka rua atu esplika Ita-nia resposta.

Se Ita-nia koñesimentu kona-ba hanorin importante husi Bíblia seidauk toʼo atu bele hetan batizmu, katuas sira sei halo arranju atu ajuda Ita. Hodi nuneʼe, Ita bele komprende no esplika lia-loos ho Ita-nia liafuan rasik no mós kumpre kritéria atu hetan batizmu iha futuru.

[Ba katuas kongregasaun sira: Atu hetan matadalan kona-ba oinsá atu halaʼo pergunta sira ho ema neʼebé hakarak hetan batizmu, haree pájina 208-212.]