Koʼalia ba dala ikus ho ema neʼebé hakarak hetan batizmu

Baibain programa batizmu nian sei halaʼo iha asembleia no reuniaun boot husi Testemuña ba Jeová. Iha diskursu batizmu nia rohan, oradór sei husu ema neʼebé atu hetan batizmu atu hamriik no hatán ho lian makaʼas no klaru ba pergunta rua tuirmai neʼe:

1. Ita arrepende ona Ita-nia sala sira, dedika an ona ba Jeová, no simu ona ninia dalan atu salva Ita liuhusi Jesus Kristu ka lae?

2. Ita komprende katak Ita-nia batizmu hatudu katak Ita mak Testemuña ba Jeová ida no sai parte ba Jeová nia organizasaun ka lae?

Bainhira ema neʼebé atu hetan batizmu hatán “Sin” ba pergunta rua neʼe, neʼe hatudu katak sira “fó sai iha ema barak nia oin” katak sira tau fiar ba Jesus nia sakrifísiu, no ho laran tomak dedika ona sira-nia an ba Jeová. (Rom 10:9, 10) Antes halo ida-neʼe, importante ba Ita atu hanoin didiʼak no halo orasaun kona-ba pergunta rua neʼe, atu nuneʼe Ita bele hatán tuir buat neʼebé Ita rasik fiar ona.

Ita halo ona orasaun hodi dedika an ba Jeová no promete atu adora nia mesak deʼit no tau uluk ninia hakarak iha Ita-nia moris ka lae?

Ita hakarak no prontu duni atu hetan batizmu iha asembleia ka reuniaun boot tuirmai ka lae?

Bainhira hetan batizmu, Ita presiza hatais iha dalan oinsá? (1 Tim 2:9, 10; João 15:19; Flp 1:10)

Ita presiza hatais iha dalan neʼebé “respeitu no ho hanoin neʼebé loos” atu hatudu katak ita “adora Maromak”. Tan neʼe, ema neʼebé atu hetan batizmu labele hatais roupa neʼebé badak, aperta demais, mihis liu, ka sabraut. Sira mós la hatais roupa neʼebé iha liafuan ruma. Sira presiza hatais roupa neʼebé moos, kabeer no hatudu respeitu ba tempu importante neʼe.

Bainhira hetan batizmu, Ita presiza hatudu hahalok saida? (Lc 3:21, 22)

Jesus nia batizmu mak ezemplu ba ema Kristaun ohin loron. Liuhusi ninia hahalok, Jesus hatudu katak tempu batizmu mak importante tebes. Tan neʼe, fatin neʼebé atu halaʼo batizmu laʼós fatin atu goza malu, halimar, nani, ka hatudu hahalok seluk neʼebé la respeitu. Ita mós lakohi hatudu an hanesan ema neʼebé foin manán buat ruma. Maski tempu batizmu halo Ita kontente, maibé Ita tenke hatudu sai Ita-nia ksolok iha dalan neʼebé respeitu.

Oinsá mak tuir reuniaun beibeik no ransu ho maluk sira iha kongregasaun ajuda Ita atu moris tuir Ita-nia dedikasaun ba Jeová?

Depois hetan batizmu, tanbasá mak importante atu nafatin estuda mesak no hola parte beibeik iha serbisu haklaken?

MATADALAN BA KATUAS KONGREGASAUN

Bainhira haklaken-naʼin ida fó sai ninia hakarak atu hetan batizmu, katuas sira sei anima nia atu prepara didiʼak parte “Pergunta ba ema neʼebé hakarak hetan batizmu” iha pájina 185-207. Katuas sira mós presiza fó-hanoin nia atu lee “Lia-menon ba haklaken-naʼin neʼebé seidauk hetan batizmu” iha pájina 182, neʼebé esplika oinsá atu prepara antes halaʼo entrevista ho katuas sira. Hanesan esplika ona iha pájina 182-184 nia bele uza ninia nota rasik no mós bele husik livru neʼe loke hela durante katuas sira husu pergunta. Nia la presiza husu ema seluk atu ajuda nia prepara resposta sira.

Ema neʼebé hakarak hetan batizmu presiza fó-hatene ba koordenadór ba grupu katuas. Bainhira nia lee ona “Pergunta ba ema neʼebé hakarak hetan batizmu”, koordenadór ba grupu katuas sei husu ba nia se nia dedika an ona hodi promete ba Jeová liuhusi orasaun atu halo tuir Jeová nia hakarak ka lae. Se nia dedika an ona, koordenadór ba grupu katuas sei arranja katuas naʼin-rua atu halaʼo entrevista hodi uza “Pergunta ba ema neʼebé hakarak hetan batizmu”. Katuas ida sei halo parte primeiru, no katuas ida seluk halo parte segundu. Katuas sira la presiza hein toʼo kongregasaun fó avizu kona-ba asembleia ka reuniaun boot mak foin halaʼo entrevista.

Baibain parte ida-idak sei halaʼo maizumenus ba oras ida, maibé dala ruma bele liu oras ida, depende ba ema ida-idak nia situasaun. Entrevista neʼe tenke loke no taka ho orasaun. Durante parte ida-idak, katuas no ema neʼebé hakarak hetan batizmu labele ansi atu halo hotu lalais pergunta sira. Katuas sira neʼebé hetan knaar atu halaʼo entrevista labele demora atu halo ida-neʼe.

Baibain diʼak liu atu halaʼo entrevista ho ema ida-idak neʼebé hakarak hetan batizmu, laʼós hamutuk nuʼudar grupu. Hodi nuneʼe katuas sira bele rona ba ema ida-idak nia resposta, no hatene se ema neʼe komprende didiʼak lia-loos no prontu atu hetan batizmu ka lae. No mós, hodi husu pergunta sira ho ema ida-idak, neʼe sei halo ema neʼe sente kmaan liu atu fó sai ninia hanoin. Maibé se feen-laʼen mak hakarak hetan batizmu, katuas sira bele husu pergunta hamutuk ho sira naʼin-rua.

Se irmán ida mak hakarak atu hetan batizmu, katuas ida presiza halo entrevista ho irmán neʼe iha fatin neʼebé ema seluk bele haree, maibé labele rona buat neʼebé sira koʼalia. Se katuas neʼe presiza lori ema ida tan atu akompaña nia, nia sei lori deʼit katuas seluk ka atan ba kongregasaun, depende ba informasaun neʼebé sira atu koʼalia, hodi tuir matadalan iha parágrafu tuirmai.

Se kongregasaun ida la iha katuas barak, bele uza atan ba kongregasaun neʼebé kumpre kritéria no iha matenek atu hanoin no tetu didiʼak situasaun, atu halaʼo entrevista ho ema neʼebé hakarak hetan batizmu hodi uza “Parte 1: Hanorin Kristaun”. Maibé kona-ba “Parte 2: Moris Kristaun”, katuas deʼit mak bele halaʼo entrevista neʼe. Se kongregasaun ida la iha irmaun sira neʼebé kumpre kritéria atu halaʼo entrevista neʼe, fó-hatene ba katuas área hodi nia bele buka ajuda husi kongregasaun seluk neʼebé besik.

Kuandu labarik ho idade menór mak hakarak hetan batizmu, ninia inan-aman neʼebé Testemuña presiza tuir entrevista neʼe. Maibé se inan-aman labele tuir, entaun katuas naʼin-rua ka katuas no atan ba kongregasaun, depende ba informasaun neʼebé sira koʼalia tenke halaʼo entrevista hamutuk ho nia.

Katuas sira sei haree didiʼak se ema neʼebé hakarak hetan batizmu iha ona koñesimentu neʼebé natoon kona-ba hanorin importante husi Bíblia. Sira mós presiza hatene se ema neʼe hafolin duni lia-loos no hatudu respeitu ba Jeová nia organizasaun. Se ema neʼe la komprende hanorin báziku sira husi Bíblia, katuas sira sei halo arranju atu ajuda nia, hodi nuneʼe nia bele kumpre kritéria atu hetan batizmu iha futuru. Dala ruma, ema balu presiza tempu atu hatudu liután katak sira hafolin duni serbisu haklaken no hakruʼuk ba arranju husi Maromak nia organizasaun. Katuas sira mak sei deside oinsá atu fahe tempu durante entrevista atu haree didiʼak se ema neʼe prontu ona atu hetan batizmu ka lae. Porezemplu, katuas sira bele uza tempu barak liu ba pergunta balu no uza tempu uitoan ba pergunta seluk. Maibé sira tenke husu pergunta hotu.

Bainhira halaʼo tiha entrevista ba parte segundu, katuas sira neʼebé halaʼo entrevista sei hasoru malu atu deside se ema neʼe bele hetan batizmu ka lae. Sira sei hanoin didiʼak kona-ba ema neʼe nia situasaun, abilidade no mudansa saida mak nia halo ona iha ninia moris. Sira sei buka-hatene se ema neʼe ho laran tomak haburas relasaun diʼak ho Jeová no komprende ona lia-loos importante husi Bíblia. Ho domin, katuas sira sei ajuda ema neʼebé hakarak hetan batizmu hodi prepara an atu halaʼo didiʼak sira-nia knaar atu haklaken liafuan diʼak.

Tuirmai, katuas ida ka rua neʼebé halaʼo entrevista, sei hasoru ema neʼe atu fó-hatene se nia kumpre kritéria atu hetan batizmu ka lae. Se ema neʼe kumpre ona kritéria, katuas sira-neʼe sei koʼalia hamutuk ho nia kona-ba pergunta sira iha pájina 206-207 husi livru neʼe iha parte “Koʼalia ba dala ikus ho ema neʼebé hakarak hetan batizmu”. Se ema neʼe seidauk remata livru Moris Haksolok ba Nafatin, katuas sira presiza fó laran-manas ba nia atu estuda livru neʼe toʼo hotu maski hetan ona batizmu. Fó-hatene ema neʼe katak data ba ninia loron batizmu sei hakerek iha Kongregasaun nia Kartaun ba Haklaken-naʼin sira. Fó-hanoin nia katak katuas sira sei rai ninia informasaun pesoál atu nuneʼe organizasaun bele kontinua tau matan ba Testemuña ba Jeová nia atividade neʼebé halaʼo iha mundu tomak. Katuas sira sei uza informasaun neʼe atu nia bele hola parte iha kongregasaun nia atividade oioin no hetan apoia iha dalan espirituál. Katuas sira mós presiza fó-hanoin haklaken-naʼin foun sira katak kongregasaun sei rai sira-nia informasaun pesoál hodi tuir matadalan iha jw.org, parte “Informasaun kona-ba oinsá Testemuña ba Jeová proteje dadus”. Baibain, enkontru neʼe la liu minutu sanulu.

Liutiha tinan ida depois haklaken-naʼin hetan batizmu, katuas naʼin-rua sei koʼalia hamutuk ho nia hodi fó laran-manas no sujestaun balu. Katuas sira-neʼe ida mak katuas neʼebé tau matan ba ninia grupu haklaken. Se irmaun ka irmán foun neʼe mak labarik neʼebé idade menór, ninia inan-aman neʼebé Testemuña mós presiza tuir enkontru neʼe. Katuas sira presiza koʼalia ho laran-diʼak hodi fó kmaan no anima. Sira sei koʼalia kona-ba oinsá nia laʼo ba oin ona iha lia-loos. Sira mós sei fó sujestaun balu neʼebé bele ajuda nia atu kontinua iha toman neʼebé diʼak, hanesan estuda mesak, lee Bíblia loroloron, halaʼo adorasaun família nian semana-semana, tuir reuniaun sira no hola parte beibeik, no mós halaʼo serbisu haklaken semana-semana. (Éf 5:15, 16) Se irmaun ka irmán foun neʼe seidauk remata livru Moris Haksolok ba Nafatin, katuas sira presiza halo arranju atu ema ruma estuda ho nia. Katuas sira presiza gaba nia ho laran. Baibain, diʼak se katuas sira fó konsellu ka sujestaun kona-ba buat ida ka rua deʼit.