Abraão nia fiar hetan koko

Abraão hanorin ninia oan Isaac atu hadomi Jeová no tau fiar ba Jeová nia promesa hotu. Maibé bainhira Isaac maizumenus tinan 25, Jeová husu Abraão atu halo buat neʼebé susar tebes. Saida mak neʼe?

Maromak dehan ba Abraão: ‘Favór, lori ó-nia oan-mane mesak ba foho ida iha rai-Moria no hasaʼe nia nuʼudar sakrifísiu mai haʼu.’ Abraão la komprende tanbasá mak Jeová husu nia atu halo hanesan neʼe, maibé nia nafatin halo tuir Jeová.

Dadeer-saan tuirmai, Abraão lori Isaac no atan naʼin-rua atu bá rai-Moria. Liutiha loron tolu, sira bele haree foho husi fatin dook. Abraão haruka ninia atan sira atu hein, no nia ho Isaac mak bá atu hasaʼe sakrifísiu. Abraão haruka Isaac lori ai-sunu no nia rasik lori tudik. Isaac husu ba ninia aman: ‘Bibi neʼebé uza atu hasaʼe sakrifísiu iha neʼebé?’ Abraão dehan: ‘Haʼu-nia oan, Jeová mak sei fó ida-neʼe.’

Toʼo tiha iha foho, sira harii altár. Tuirmai Abraão kesi Isaac nia liman no ain no tau nia iha altár.

Bainhira Abraão foti tudik, nia rona Jeová nia anju nia lian husi lalehan, neʼebé dehan: ‘Abraão! Keta hakanek nia! Agora haʼu hatene katak ó iha fiar ba Maromak tanba ó prontu atu fó ó-nia oan-mane nuʼudar sakrifísiu.’ Tuirmai, Abraão haree bibi-malae aman ida neʼebé ninia dikur kaʼit hela iha ai-sanak sira. Nia kore tiha Isaac, no uza fali bibi neʼe nuʼudar sakrifísiu.

Husi tempu neʼebá, Jeová bolu Abraão nuʼudar ninia belun. Ó hatene tanbasá? Abraão sempre halo tuir buat neʼebé Jeová husu maski la komprende tanbasá Jeová haruka nia halo nuneʼe.

Jeová repete fali ninia promesa ba Abraão: ‘Haʼu sei fó bensaun ba ó, no haʼu sei halo ó-nia bei-oan sira sai barak tebes.’ Jeová mós promete katak liuhusi Abraão nia jerasaun mak nia sei haraik bensaun ba ema diʼak hotu.