Promesa ba Jeová

Maizumenus fulan rua liu tiha depois povu Izraél sai husi Ejitu, sira toʼo iha Foho Sinai no harii tenda iha neʼebá. Jeová haruka Moisés saʼe ba foho, no dehan ba nia: ‘Haʼu salva ona ema Izraél. Se sira halo tuir haʼu no haʼu-nia ukun-fuan, sira sei sai haʼu-nia nasaun espesiál.’ Moisés fila fali ba povu Izraél no fó-hatene buat neʼebé Jeová hatete. Bainhira sira rona tiha ida-neʼe, sira hatán: ‘Ami sei halo buat hotu neʼebé Jeová hatete.’

Tuirmai Moisés saʼe fali ba foho. Jeová dehan ba Moisés: ‘Iha loron rua tan, haʼu sei koʼalia ba imi. Haruka povu atu labele saʼe ba Foho Sinai.’ Moisés fila fali ba povu Izraél no haruka sira prepara an atu rona Jeová nia liafuan.

Liutiha loron rua, ema Izraél haree rai-lakan no kalohan metan iha foho leten. Sira mós rona rai-tarutu no lian hanesan huu dikur. Tuirmai, Jeová tun ba foho neʼe ho ahi. Foho tomak nakonu ho suar no nakdoko makaʼas. Ema Izraél sai taʼuk tebes toʼo nakdedar. Dikur nia lian sai makaʼas liután. Tuirmai Maromak dehan: ‘Haʼu mak Jeová. Imi labele adora maromak seluk.’

Moisés saʼe fali ba foho, no Jeová fó mandamentu sira ba povu kona-ba oinsá atu adora Nia no oinsá atu halaʼo moris. Moisés hakerek mandamentu sira-neʼe no tuirmai lee ba ema Izraél. Sira promete: ‘Ami sei halo tuir buat hotu neʼebé Jeová haruka.’ Maibé sira halo tuir duni sira-nia promesa ka lae?