Raab subar espiaun sira

Bainhira espiaun Izraél naʼin-rua bá hafuhu sidade Jerikó, sira tama iha feto ida naran Raab nia uma. Liurai Jerikó rona kona-ba neʼe no haruka ninia soldadu sira bá Raab nia uma atu kaer espiaun sira. Maibé Raab subar espiaun naʼin-rua neʼe iha uma-kakuluk no haruka soldadu sira bá fali fatin seluk. Raab dehan ba espiaun sira: ‘Haʼu ajuda imi tanba haʼu hatene katak Jeová hamutuk ho imi no imi sei manán rai neʼe. Favór promete mai haʼu katak imi sei salva haʼu no haʼu-nia família.’

Espiaun sira dehan ba Raab: ‘Ami promete, ema hotu neʼebé iha Ita-nia uma sei la mate. Kesi tali mean iha Ita-nia janela atu nuneʼe Ita no Ita-nia família la mate.’

Raab ajuda espiaun sira tun husi janela hodi uza tali. Espiaun sira-neʼe halai ba foho no subar durante loron tolu, depois sira fila fali ba Josué. Tuirmai povu Izraél hakur Mota Jordaun no prepara an atu foti rai-Kanaan. Jerikó mak sidade primeiru neʼebé sira manán. Jeová haruka sira marxa haleʼu sidade neʼe loron ida dala ida durante loron neen. No iha loron hitu, sira marxa haleʼu sidade neʼe ba dala hitu. Depois neʼe, amlulik sira huu dikur, no tropa hotu hakilar ho lian makaʼas. Ho ida-neʼe, sidade Jerikó nia moru monu namtate! Maibé, parte ida husi moru neʼebé iha Raab nia uma la monu. Raab no ninia família hetan salvasaun tanba nia tau fiar ba Jeová.