Ita presiza iha neʼebé kuandu mundu nia rohan toʼo mai?

BAINHIRA Jeová halakon sistema aat neʼe iha Armagedon, saida mak sei akontese ba ema laran-loos ida-idak? Provérbios 2:21, 22 hatete: “Ema laran-loos deʼit mak sei hela iha rai, no ema neʼebé moris ho hahalok loos mak sei hela nafatin iha neʼebá. Kona-ba ema aat, sira sei lakon husi rai, no ema neʼebé laran-makerek sei hasai tiha husi neʼebá.”

Entaun, oinsá mak ema neʼebé moris ho hahalok loos sei hela nafatin iha mundu? Sei iha fatin neʼebé seguru ba sira ka lae? Ema laran-loos tenke iha neʼebé kuandu mundu nia rohan toʼo mai? Istória haat iha Bíblia kona-ba oinsá Jeová salva ema sei ajuda ita hetan resposta ba pergunta sira-neʼe.

Kuandu fatin mak importante

Hanoin kona-ba oinsá Maromak salva Noé no Lot. Segundu Pedro 2:5-7 hatete: “[Maromak] la dada an atu fó kastigu ba mundu iha tempu uluk, maibé salva Noé, neʼebé mak haklaken-naʼin kona-ba justisa, hamutuk ho ema naʼin-hitu seluk bainhira nia halo rai-nabeen iha mundu neʼebé nakonu ho ema aat. No Maromak mós fó kastigu ba Sodoma no Gomorra no harahun sidade sira-neʼe toʼo sai ahi-kadesan, hodi halo nuneʼe nia hatudu ezemplu kona-ba buat neʼebé sei akontese ba ema aat sira iha tempu neʼebé atu mai. No nia salva ema laran-loos naran Lot, neʼebé sente laran-susar tebes tanba ema aat sira neʼebé halo hahalok aat toʼo la sente moe.”

Oinsá mak Noé bele moris liu Rai-Nabeen? Maromak hatete ba Noé: “Haʼu deside ona atu halakon kriatura hotu, tanba ema halo rai neʼe nakonu ho violénsia, tan neʼe haʼu sei halakon ema no rai. Nuneʼe, halo ró ida ba ó-nia an, halo neʼe ho ai-rezinoza.” (Gén 6:13, 14) Noé halo tuir duni Jeová nia mandamentu hodi harii ró ida. Loron hitu antes Rai-Nabeen komesa, Jeová haruka Noé atu halibur animál sira atu tama ba ró laran no nia hamutuk ho ninia umakain tomak mós tenke tama ba laran. Iha loron hitu, Maromak taka ró nia odamatan, no “udan boot tun ba rai toʼo loron 40 no kalan 40”. (Gén 7:1-4, 11, 12, 16) Noé no ninia família “hetan salvasaun liuhusi bee bainhira rai-nabeen”. (1 Ped 3:20) Sira tenke tama iha ró laran se sira hakarak hetan salvasaun. La iha fatin seluk iha mundu neʼebé seguru.​—Gén 7:19, 20.

Maibé kona-ba Lot, nia simu matadalan neʼebé la hanesan. Anju rua fó-hatene ba Lot kona-ba fatin neʼebé nia labele hela. Anju rua neʼe hatete ba Lot: “Ó-nia família hotu iha sidade [Sodoma], ó tenke lori sira sai husi fatin neʼe! Ami sei harahun fatin neʼe.” Sira presiza “halai ba área foho nian”.​—Gén 19:12, 13, 17.

Istória kona-ba Noé no Lot hatudu katak “Jeová hatene oinsá atu salva ema neʼebé laran-metin ba nia husi susar laran, maibé nia rai hela ema aat sira atu halakon tiha iha loron tesi-lia nian”. (2 Ped 2:9) Ezemplu rua neʼe hatudu katak salvasaun depende ba fatin neʼebé sira iha. Noé tenke tama ba ró laran, maibé Lot tenke sai husi Sodoma. Maibé ema nia salvasaun depende deʼit ba ida-neʼe ka lae? Jeová bele salva ema laran-loos iha fatin naran deʼit, maski sira la muda fatin ka lae? Atu hetan resposta, haree toʼok istória rua seluk tan.

Fatin mak sempre importante ka lae?

Antes Jeová fó susar sanulu ba rai-Ejitu iha Moisés nia tempu, nia haruka ema Izraél atu hisik bibi-malae nia raan iha odamatan nia arus. Tanbasá? Atu nuneʼe, ‘bainhira Jeová liu rai neʼe hodi fó susar ba ema Ejitu, no haree raan iha odamatan nia arus parte leten no parte sorin loos no sorin karuk, nia sei hakat liu no nia sei la husik susar tama ba ema Izraél sira-nia uma’. Iha kalan neʼe duni, “Jeová oho oan primeiru hotu iha rai-Ejitu, hahú husi Faraó neʼebé tuur iha kadunan nia oan-mane primeiru toʼo ema dadur sira iha komarka nia oan-mane primeiru, no mós animál hotu nia oan primeiru”. Ema Izraél nia oan primeiru sira nafatin seguru maski sira la halai ba fatin seluk.​—Éx 12:22, 23, 29.

Hanoin mós istória kona-ba feto-aat ida neʼebé hela iha sidade Jerikó naran Raab. Ema Izraél komesa atu manán rai neʼebé Maromak promete. Kuandu Raab rona katak sidade Jerikó sei rahun, nia fó-hatene ba espiaun naʼin-rua husi Izraél katak ema hotu iha sidade neʼe taʼuk ba ema Izraél neʼebé hakbesik daudaun. Raab subar espiaun naʼin-rua neʼe no husu sira atu jura katak sira sei salva nia no ninia família tomak bainhira sidade Jerikó rahun. Espiaun naʼin-rua neʼe haruka Raab atu halibur ninia família iha ninia uma laran neʼebé iha sidade nia moru leten. Se sira sai husi uma neʼe, sira mós sei lakon mohu hamutuk ho sidade neʼe. (Jos 2:8-13, 15, 18, 19) Maibé depois neʼe Jeová dehan ba Josué katak “sidade neʼe nia moru sei monu tun toʼo rai”. (Jos 6:5) Espiaun sira-neʼe dehan katak fatin neʼe mak seguru, maibé ikusmai haree hanesan fatin neʼe la seguru ona. Se nuneʼe, saida mak sei akontese ba Raab no ninia família?

Kuandu tempu toʼo ona atu manán Jerikó, ema Izraél huu dikur no tuirmai hakilar. Josué 6:20 dehan: “Bainhira tropa sira rona dikur lian no hakilar lian funu nian, moru neʼe monu tun kedas toʼo rai.” La iha ema ida mak bele hapara moru neʼe atu rahun. Maibé liuhusi milagre, Raab nia uma la rahun maski moru sira monu rahun. Josué hatete ba espiaun naʼin-rua neʼe: “Tama ba feto-aat neʼe nia uma no lori sai feto neʼe no sira hotu neʼebé hamutuk ho nia, hanesan imi jura ona ba nia.” (Jos 6:22) Sira hotu neʼebé iha Raab nia uma hetan salvasaun.

Saida mak importante liu?

Ita bele aprende saida husi dalan neʼebé Jeová salva Noé, Lot, ema Izraél iha Moisés nia tempu, no mós Raab? Oinsá istória sira-neʼe ajuda ita atu deside fatin neʼebé ita iha bá, bainhira mundu nia rohan toʼo mai?

Noé hetan salvasaun kuandu iha ró boot laran. Maibé tanbasá mak nia iha neʼebá? Neʼe tanba nia hatudu fiar metin no halo tuir Jeová Bíblia dehan katak “Noé halo tuir mandamentu hotu neʼebé Maromak fó ba nia. Nia halo nuneʼe duni.” (Gén 6:22; Ebr 11:7) Oinsá ho ita? Ita halo tuir buat hotu neʼebé Jeová haruka ita atu halo ka lae? Noé mós “haklaken-naʼin kona-ba justisa”. (2 Ped 2:5) Hanesan ho Noé, ita mós haklaken ho laran-manas ka lae, maski ema la interese?

Lot hetan salvasaun kuandu Sodoma rahun hodi halai sai husi sidade neʼe. Jeová salva nia tanba nia mak ema neʼebé laran-loos no sente laran-susar tanba ema Sodoma no Gomorra nia hahalok aat. Ohin loron ita sente laran-susar bainhira haree ema nia hahalok aat ka lae? Ka Ita sai toman ona ho buat sira-neʼe toʼo ita la preokupa tan? Ita hakaʼas an atu Jeová haree ita nuʼudar “ema neʼebé moos, sala-laek no iha dame ho Maromak” ka lae?​—2 Ped 3:14.

Ba ema Izraél iha rai-Ejitu no Raab iha Jerikó, atu hetan salvasaun sira tenke hela nafatin iha sira-nia uma. No atu halo nuneʼe, sira presiza iha fiar no halo tuir matadalan. (Ebr 11:28, 30, 31) Imajina toʼok oinsá família Izraél ida-idak hateke ba sira-nia oan-mane primeiru nuʼudar sira rona “tanis no hakilar makaʼas” iha ema Ejitu sira-nia uma. (Éx 12:30) Imajina toʼok oinsá Raab hakoʼak metin ninia família nuʼudar nia sente moru Jerikó monu. Neʼe presiza duni hatudu fiar neʼebé metin atu bele nafatin halo tuir no la sai husi uma neʼe.

Lakleur tan Satanás nia mundu aat mós sei lakon mohu. Ita la hatene ho loloos oinsá Jeová sei proteje ninia povu iha ‘ninia loron hirus’. (Sof 2:3) Maski ita la hatene ita presiza bá neʼebé ka sei hasoru situasaun hanesan saida, maibé ita bele fiar katak atu bele hetan salvasaun ita presiza tau fiar ba Jeová no halo tuir nia. Ita mós presiza komprende ho didiʼak saida mak signifikadu husi Isaias nia profesia kona-ba “tama ba imi-nia kuartu laran”.

“Tama ba imi-nia kuartu laran”

Isaias 26:20 hatete: “Oh haʼu-nia povu, bá, tama ba imi-nia kuartu laran, no taka odamatan sira. Subar imi-nia an ba tempu uitoan toʼo Maromak nia hirus liu tiha ona.” Haree hanesan profesia neʼe sai loos ba dala primeiru iha tinan 539 AEC kuandu Média Pérsia manán Babilónia. Bainhira tama ba Babilónia, Liurai Ciro husi Pérsia haruka ema hotu atu nafatin iha uma laran, tanba ninia soldadu sira sei oho ema naran deʼit neʼebé sira hetan iha liʼur.

Iha ita-nia tempu, “kuartu laran” neʼebé temi iha profesia neʼe karik refere ba Testemuña ba Jeová nia kongregasaun hamutuk 100.000 iha mundu tomak. Kongregasaun sira-neʼe importante ba ita ohin loron no sei nafatin ajuda ita durante “terus boot.” (Apk 7:14) Maromak haruka ninia povu atu tama ba sira-nia “kuartu laran” no subar sira-nia an “toʼo Maromak nia hirus liu tiha ona”. Importante tebes ba ita atu haburas no mantein atitude diʼak kona-ba kongregasaun sira no hakaʼas an atu nafatin hakbesik ba kongregasaun. Hakaʼas an atu halo tuir Paulo nia liafuan neʼebé dehan: “Mai ita hanoin malu hodi fó laran-manas ba malu atu hatudu domin no hahalok diʼak, no maski ema balu sai toman ona atu la halibur hamutuk, maibé imi keta haluha atu halibur hamutuk, no fó aten-brani ba malu, liuliu bainhira imi haree loron neʼe besik daudaun ona.”​—Ebr 10:24, 25.

[Dezeñu]

Saida mak ita bele aprende husi Jeová nia dalan atu salva ema iha tempu uluk?

[Dezeñu]

Iha tempu modernu, “kuartu laran” karik refere ba saida?