Ezras hanorin Maromak nia Ukun-Fuan

Maizumenus tinan 70 liu ona husi tempu neʼebé ema Izraél fila fali ba Jeruzalein, sei iha ema Izraél balu neʼebé nafatin hela iha área oioin iha Pérsia. Ema ida mak amlulik Ezras neʼebé hanorin Jeová nia Ukun-Fuan. Bainhira Ezras rona katak povu iha Jeruzalein la halo tuir Ukun-Fuan, nia hakarak bá atu ajuda sira. Liurai Pérsia naran Artaxerxes dehan ba nia: ‘Maromak fó ona matenek ba ó atu hanorin ninia Ukun-Fuan. Tan neʼe, bá Jeruzalein hamutuk ho ema neʼebé hakarak bá ho ó.’ Ezras halibur ema hotu neʼebé hakarak atu fila fali ba Jeruzalein. Sira halo orasaun ba Jeová atu tau matan ba sira durante sira-nia viajen neʼebé naruk. Tuirmai sira bá.

Fulan haat liu tiha, sira toʼo iha Jeruzalein. Ulun-naʼin sira iha Jeruzalein dehan ba Ezras: ‘Ema Izraél sira la halo tuir Jeová no kaben ho feto sira neʼebé adora maromak falsu.’ Ezras halo saida? Iha povu nia oin, Ezras hakneʼak no halo orasaun: ‘Jeová, Ita halo ona buat barak mai ami, maibé ami halo sala hasoru Ita.’ Povu mós arrepende sira-nia sala, maibé sira presiza ajuda atu bele halo buat neʼebé loos. Ezras hili katuas no juís sira atu ajuda povu. Durante fulan tolu, ema Izraél haruka sai ema neʼebé la adora Jeová.

Tinan 12 liu tiha, moru neʼebé haleʼu Jeruzalein harii fali ona. Tan neʼe, Ezras halibur povu iha fatin públiku atu nia bele lee Maromak nia Ukun-Fuan ba sira. Bainhira Ezras loke livru Ukun-Fuan, povu hotu hamriik. Ezras fó hahiʼi ba Jeová no sira foti saʼe sira-nia liman atu hatudu katak sira apoia. Ezras lee no esplika Maromak nia Ukun-Fuan no povu rona ho didiʼak. Sira hatene katak sira halo ona sala hasoru Jeová no sira tanis. Iha loron tuirmai, Ezras lee tan Ukun-Fuan ba sira. Sira aprende katak lakleur tan sira presiza selebra Festa Barraka. Tan neʼe sira komesa prepara ba festa neʼe.

Durante loron hitu iha festa neʼe, povu haksolok no fó agradese ba Jeová tanba haraik bensaun ba sira-nia toʼos. Husi Josué nia tempu, ema seidauk halaʼo Festa Barraka iha dalan neʼebé furak hanesan neʼe. Depois festa neʼe, povu halibur hamutuk no halo orasaun: ‘Oh Jeová, Ita-Boot salva ami husi moris nuʼudar atan, Ita fó hahán mai ami iha rai-fuik maran, no mós fó rai neʼebé diʼak. Maibé ami kontra beibeik Ita. Ita haruka profeta sira atu fó avizu ba ami, maibé ami la rona. Maski nuneʼe, Ita pasiénsia nafatin. Ita la haluha Ita-nia promesa ba Abraão. Agora ami promete atu halo tuir Ita.’ Sira hakerek sira-nia promesa, no ulun-naʼin, ema Levi, no amlulik sira tau sira-nia selus ba ida-neʼe.