ISTÓRIA 82
Jesus hanorin kona-ba orasaun
Ema Farizeu gosta ema seluk gaba sira. Sira hatudu hahalok diʼak tanba hakarak ema seluk haree. Sira halo orasaun iha fatin públiku atu nuneʼe ema hotu bele haree. Ema Farizeu dekór orasaun neʼebé naruk no repete orasaun sira-neʼe iha sinagoga no mós iha dalan sikun sira atu ema seluk rona. Tan neʼe ema hakfodak tebes kuandu Jesus dehan: ‘Keta halo orasaun hanesan ema Farizeu. Sira hanoin katak Maromak kontente kuandu sira uza liafuan barabarak, maibé tuir loloos lae. Ita halo orasaun laʼós atu ema haree, maibé atu koʼalia ba Jeová. Keta repete liafuan neʼebé hanesan. Jeová hakarak ita fó sai buat neʼebé ita sente.
‘Halo orasaun hanesan neʼe: “Ami Aman iha lalehan, halo Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.”’ Jesus mós dehan katak ita bele halo orasaun kona-ba hahán ba loron ohin nian, husu perdua ba ita-nia sala, no mós kona-ba buat seluk.
Jesus dehan: ‘Kontinua halo orasaun. Kontinua husu buat neʼebé diʼak husi imi-nia Aman Jeová. Inan-aman sira hakarak atu fó buat neʼebé diʼak ba sira-nia oan. Se imi-nia oan husu paun, imi sei la fó fatuk, loos ka lae? Se imi-nia oan husu ikan, imi sei la fó samea, loos ka lae?’
Tuirmai Jesus esplika: ‘Se imi deʼit hatene oinsá atu fó buat diʼak ba imi-nia oan, sá tan ho imi-nia Aman Jeová? Nia sei fó duni espíritu santu ba imi. Imi presiza deʼit atu husu.’ Ó halo tuir Jesus hodi halo orasaun ka lae? Ó halo orasaun kona-ba saida deʼit?
“Kontinua husu, no imi sei simu. Kontinua buka, no imi sei hetan. Kontinua dere odamatan, odamatan sei loke ba imi.”—Mateus 7:7