Jesus fó han ema rihun ba rihun

Antes loron Páskua tinan 32 EC, apóstolu sira fila fali husi sira-nia serbisu haklaken. Sira sente kole, tan neʼe Jesus lori sira saʼe ró ba Betsaida atu bele deskansa. Maibé bainhira ró neʼe besik tasi-ibun, Jesus haree katak ema rihun ba rihun halibur ona hodi hein nia. Maski Jesus hakarak deskansa ho ninia apóstolu sira, maibé nia nafatin hatudu laran-diʼak ba ema sira-neʼe. Nia kura ema neʼebé moras no hanorin sira loron tomak kona-ba Maromak nia Ukun. Kuandu atu besik kalan ona, apóstolu sira hatete ba Jesus: ‘Ema sira-neʼe hamlaha ona. Haruka sira fila atu sira bele sosa hahán.’

Jesus dehan: ‘Sira lalika fila. Imi mak fó buat ruma ba sira atu han.’ Apóstolu sira husu ba Jesus: ‘Ita hakarak ami sosa paun ba sira ka?’ Apóstolu ida naran Filipe dehan: ‘Maski ita iha osan barak mós la toʼo atu sosa paun ba sira.’

Jesus husu: ‘Ita iha hahán hira?’ André dehan: ‘Ita iha deʼit paun fuan lima no ikan kiʼik rua. Neʼe la toʼo ba ema sira-neʼe.’ Jesus dehan: ‘Lori paun no ikan sira-neʼe mai.’ Nia haruka ema hotu atu tuur grupu-grupu iha duʼut matak leten. Grupu balu iha ema naʼin-50 no balu iha ema naʼin-100. Jesus foti paun no ikan, hateke ba lalehan, no halo orasaun. Tuirmai nia fó hahán sira-neʼe ba apóstolu sira atu fahe ba ema. Mane naʼin-5.000 no mós feto no labarik sira hotu han toʼo bosu. Depois neʼe, apóstolu sira halibur hahán resin atu labele estraga. Sira halibur hahán resin bote 12 nakonu. Neʼe mak milagre neʼebé furak tebes.

Ema hotu kontente no sira hakarak foti Jesus sai liurai. Maibé Jesus hatene katak neʼe laʼós tempu ba Jeová atu foti nia sai liurai. Tan neʼe Jesus haruka ema sira-neʼe fila no haruka apóstolu sira atu bá Tasi Galileia nia sorin. Tuirmai apóstolu sira saʼe ró no Jesus bá foho mesamesak atu halo orasaun ba ninia Aman. Maski Jesus okupadu, nia sempre buka tempu atu halo orasaun.