Jesus laʼo iha bee leten

Jesus laʼós deʼit bele kura ema neʼebé moras no halo ema mate moris fali, maibé nia mós bele kontrola anin no udan. Depois halo tiha orasaun iha foho, Jesus hateke tun ba Tasi Galileia no nia haree anin-fuik. Ninia apóstolu sira iha ró laran koko makaʼas atu hean hasoru anin. Jesus tun husi foho no komesa laʼo iha bee leten hodi hakbesik ba ró. Kuandu apóstolu sira haree ema ida laʼo iha bee leten, sira sai taʼuk tebes. Maibé Jesus dehan ba sira: ‘Neʼe mak haʼu. Keta taʼuk.’

Pedro dehan: ‘Naʼi, se neʼe mak Ita, haruka haʼu laʼo iha bee leten hodi toʼo Ita.’ Jesus dehan ba Pedro: ‘Mai.’ Entaun, maski anin huu makaʼas, Pedro tun husi ró no laʼo iha bee leten hodi hakbesik ba Jesus. Maibé bainhira nia atu besik ona ba Jesus, nia haree anin boot no sai taʼuk. Pedro sente atu mout. Nia hakilar: ‘Naʼi, salva haʼu!’ Jesus kaer kedas Pedro nia liman no dehan: ‘Tanbasá ó laran-rua? Ó-nia fiar iha neʼebé?’

Jesus no Pedro saʼe ba ró no anin boot neʼe para kedas. Imajina toʼok, apóstolu sira sente oinsá? Sira hatete: ‘Ita mak Maromak nia Oan duni.’

Jesus mós halo buat neʼebé hanesan iha tempu seluk. Loron ida, kuandu Jesus no ninia apóstolu sira saʼe ró ba tasi sorin, Jesus toba iha ró nia parte kotuk. Bainhira nia toba hela, anin komesa huu makaʼas. Laloran boot baku ró no ró komesa nakonu ho tasi-been. Apóstolu sira fanu Jesus hodi hakilar: ‘Mestre, ita hotu besik atu mate! Ajuda ami!’ Jesus hadeer no koʼalia ba tasi: ‘Hakmatek bá!’ Anin para kedas no tasi sai kalma. Jesus husu ba apóstolu sira: ‘Imi-nia fiar iha neʼebé?’ Apóstolu sira koʼalia ba malu: ‘Anin no tasi mós halo tuir nia.’ Apóstolu sira aprende katak se sira tau fiar tomak ba Jesus, sira la presiza taʼuk ba buat ida.