“Kaer metin ba imi-nia fiar”

1. (a) Iha kalan tasi boot iha Tasi Galileia nian, Pedro halo saida? (Haree dezeñu iha leten.) (b) Tanbasá mak Pedro mout?

IHA kalan neʼebé tasi siʼak, apóstolu Pedro ho dixípulu seluk tenke hean ró makaʼas hasoru anin boot iha tasi klaran atu hakur ba Tasi Galileia sorin. Derrepente sira haree Jesus laʼo hela iha tasi leten. Pedro bolu Jesus atu hakarak laʼo iha tasi leten bá Jesus. Bainhira Jesus bolu nia bá, milagre ida akontese, Pedro tun husi ró no laʼo bá Jesus iha tasi leten. Maibé laʼo tiha lakleur, Pedro komesa mout, tanbasá? Tanba nia hateke ba anin no laloran boot no buat sira-neʼe halo nia komesa sai taʼuk. Ho ida-neʼe, Pedro bolu makaʼas ba Jesus atu ajuda nia, no Jesus kaer kedas Pedro nia liman hodi hatete ba nia: “Ó neʼebé fiar kiʼik, tansá ó laran-rua?”—Mateus 14:24-32.

2. Ita sei koʼalia kona-ba saida?

² Mai ita koʼalia hamutuk kona-ba fiar liuhusi Pedro nia esperiénsia neʼe: (1) Foufoun, oinsá mak Pedro iha fiar ba Maromak nia ajuda?, (2) saida mak halo ninia fiar neineik-neineik sai lakon?, no (3) saida mak ajuda nia hetan fali ninia fiar? Pontu sira-neʼe bele ajuda ita atu haree oinsá mak ita bele ‘kaer metin ba ita-nia fiar’.—1 Korinto 16:13.

TAU FIAR BA MAROMAK NIA AJUDA

3. Saida mak ajuda Pedro tun husi ró, no ita halo ona saida mak hanesan ho buat neʼebé Pedro halo?

³ Bainhira Jesus bolu Pedro, ho fiar neʼebé metin Pedro tun husi ró no laʼo ba Jesus husi bee leten. Pedro fiar katak Maromak sei ajuda nia hanesan Maromak ajuda daudauk Jesus hodi laʼo iha bee leten. Hanesan neʼe mós bainhira Jesus konvida ita, tanba fiar mak ita hakarak laʼo tuir ninia ain-fatin no dedika ita-nia an ba Jeová hodi hakarak hetan batizmu. Ita tenke iha duni fiar katak Maromak Jeová no Jesus sei ajuda ita.—João 14:1; lee 1 Pedro 2:21.

4, 5. Tanbasá fiar mak buat folin-boot ida?

⁴ Fiar mak buat neʼebé folin boot duni. Tanba fiar mak Pedro bele laʼo iha bee leten, no tanba fiar mak ita bele halo buat neʼebé baibain ema la bele halo. (Mateus 21:21, 22) Porezemplu, ita barak mak halo ona mudansa boot ba ita-nia moris no la hatudu tan hahalok uluk nian, no neʼe halo ema hakfodak tanba ita la hanesan uluk ona. Ita bele halo mudansa sira-neʼe tanba Jeová nia ajuda no tanba ita-nia fiar ba nia. (Lee Koloso 3:5-10.) Tanba fiar mak ita dedika ita-nia an ba Jeová hodi sai ninia belun, no ho Jeová nia kbiit deʼit mak ita bele halo ida-neʼe.—Éfeso 2:8.

⁵ Fiar mak fó ita kbiit. Porezemplu, ho fiar mak ita bele kontra hasoru Diabu nia ataka, inimigu neʼebé forsa liu ema. (Éfeso 6:16) No tanba fiar ba Jeová mak ita la hanoin demais kona-ba ita-nia problema sira. Jeová promete ona katak se ita tau uluk ninia Ukun iha ita-nia moris, nia sei tau matan ba ita-nia presiza loroloron nian. (Mateus 6:30-34) No mós tanba fiar mak ita sei simu prezente furak ida neʼebé ema la bele fó, neʼe mak moris rohan-laek.—João 3:16.

PREOKUPA LIU HO BUAT SELUK BELE HALAKON FIAR

6, 7. (a) Ita bele kompara anin no laloran neʼebé halo Pedro mout hanesan ho saida? (b) Tanbasá mak ita presiza hatene katak ita-nia fiar bele sai fraku?

⁶ Ita bele kompara anin no laloran neʼebé halo Pedro mout mak hanesan ho susar no tentasaun neʼebé ita hasoru ohin loron. Maibé, ho Jeová nia ajuda, maski anin no laloran boot mós ita bele hamriik metin hasoru sira. Karik ita sei hanoin-hetan laʼós tasi siʼak ka anin mak halo Pedro mout, maibé Bíblia hatete katak: “Kuandu nia haree anin-boot, nia sai taʼuk.” (Mateus 14:30) Pedro lakon ninia fiar tanba ninia matan la hateke metin ba Jesus. Hanesan neʼe mós ho ita, se ita mak preokupa liu ho ita-nia problema sira, neʼe bele hamenus ita-nia fiar katak Jeová sei apoia ita.

⁷ Ita presiza hatene katak ita-nia fiar bele sai fraku, tanba Bíblia hatete katak lakon fiar mak “sala neʼebé bele kaer metin ita”. (Ebreu 12:1) Hanesan buat neʼebé akontese ba Pedro hatudu katak se ita preokupa liu ba buat neʼebé halo ita sees husi Jeová, neʼe bele halo ita-nia fiar sai fraku lalais. Entaun, oinsá mak ita hatene katak ita-nia fiar iha ona perigu? Pergunta sira tuirmai sei ajuda ita atu hatene didiʼak kona-ba ita-nia an.

8. Saida mak bele halo ita ladún fiar tan ba Maromak nia promete sira hanesan uluk?

⁸ Haʼu agora ladún fiar ona ba Maromak nia promesa sira hanesan uluk ka lae? Porezemplu, Maromak promete katak nia sei halakon mundu aat neʼe. Maibé ita husik mundu nia solok atu dada ita-nia atensaun hodi ita ladún fiar ona ba Maromak nia promete ka lae? Se ida-neʼe akontese, karik ita bele la fiar tan katak mundu nia rohan besik ona atu mai. (Habacuque [Habakuk] 2:3) Ezemplu seluk tan, Maromak promete katak nia sei uza Jesus nia sakrifísiu atu fó perdua ba ita-nia sala. Maibé se ita la husik atu hanoin beibeik kona-ba ita-nia sala neʼebé uluk ita halo, neʼe bele halo ita sai laran-rua katak Jeová hamoos duni ona ita-nia sala sira. (Apóstolu 3:19) Se ida-neʼe akontese, ita sei la haksolok tan atu serbí Jeová no la bá haklaken tan.

9. Saida mak bele akontese se ita hanoin deʼit atu halo buat neʼebé ita rasik gosta?

⁹ Haʼu sei badinas atu serbí Jeová hanesan uluk ka lae? Apóstolu Paulo hatete katak badinas serbisu ba Jeová bele ajuda ita atu ‘kaer metin ba ita-nia esperansa toʼo rohan’. Maibé, oinsá se ita komesa hanoin atu halo deʼit buat neʼebé ita rasik gosta, hanesan atu buka serbisu boot hodi hanetik ita-nia tempu atu halaʼo ita-nia adorasaun ba Jeová? Buat sira-neʼe bele halo ita-nia fiar sai fraku, no maski ita-nia situasaun moris permite ita atu halo buat barak iha Maromak nia serbisu, karik ita sei sai baruk atu halo serbisu sira-neʼe hodi serbí Jeová.—Ebreu 6:10-12.

10. Oinsá mak fó perdua ba ema seluk hatudu katak ita iha fiar ba Jeová?

¹⁰ Haʼu sente susar atu fó perdua ka lae? Bainhira ema ida hakanek ita, neʼe bele halo ita hanoin liu kona-ba ita rasik nia sentimentu no karik ita mós hakarak bá atu hirus ema neʼe, ka ita deside katak ita lakohi koʼalia tan ho ema neʼe. Maibé, duké halo hanesan neʼe, diʼak atu fó perdua ba nia, tanba neʼe hatudu katak ita iha fiar ba Jeová. Tanbasá mak ita hatete hanesan neʼe? Tanba bainhira ema ida halo sala hasoru ita, ema neʼe debe buat ida husi ita, neʼe hanesan ho ita-nia sala neʼebé halo ita debe Maromak Jeová. (Lucas 11:4) Tan neʼe mak bainhira ita fó perdua ba ema, neʼe hanesan ita fiar katak Jeová sei fó bensaun ba ita-nia hahalok diʼak neʼe, bensaun neʼe folin boot liu fali atu husu ema neʼe selu ninia tusan ba ita. Atu bele fó perdua ba ema, presiza duni fiar, Jesus nia dixípulu sira mós rekoñese kona-ba neʼe. Tan neʼe mak bainhira Jesus hatete ba sira atu presiza fó perdua beibeik ba ema, sira husu ba nia: “Halo boot liután ami-nia fiar.”—Lucas 17:1-5.

11. Oinsá mak ita bele lakon oportunidade atu aprende husi konsellu sira?

¹¹ Haʼu hirus ba konsellu neʼebé haʼu simu ka lae? Diʼak ba ita atu haree oinsá mak ita bele aplika konsellu sira duké buka sala husi konsellu sira ka husi ema neʼebé fó konsellu. (Provérbios [Amsal] 19:20) Se ita mak buka sala deʼit, ita rasik mak sei lakon oportunidade diʼak atu hatene Jeová nia hanoin.

12. Se ema ida mak sempre muramura ba sira neʼebé Jeová uza atu tau matan ba ninia povu, neʼe hatudu saida?

¹² Haʼu muramura hasoru irmaun sira neʼebé tau matan ba kongregasaun ka lae? Bainhira espiaun naʼin-sanulu lori fila liafuan neʼebé negativu, ema Izraél sira hanoin liu kona-ba sira-nia liafuan no hahú hodi muramura ba Moisés no Aarão. Hodi nuneʼe mak Jeová husu ba Moisés: “Sira atu la fiar haʼu toʼo bainhira?” (Números [Bilangan] 14:2-4, 11) Loos duni, tanba Jeová mak hili Moisés ho Aarão, tan neʼe bainhira ema Izraél muramura ba sira, sira hatudu katak sira la fiar Jeová. Hanesan neʼe mós ho ita, se ita sempre muramura ba sira neʼebé Jeová uza atu tau matan ba ninia povu, tuir loloos neʼe hatudu katak ita-nia fiar komesa sai fraku ona.

13. Tanbasá mak ita la presiza sai laran-tun se ita haree ita-nia fiar iha fraku ruma?

¹³ Bainhira ita koʼalia tiha pergunta sira iha leten, karik ita hetan fraku ruma husi ita-nia fiar, maibé lalika laran-tun. Apóstolu Pedro mós iha taʼuk no laran-rua. Dala ruma, Jesus mós presiza korrije apóstolu sira seluk tanba sira-nia fiar kiʼik. (Mateus 16:8) Maibé, husi buat neʼebé akontese ba Pedro, ita bele aprende lisaun importante ida, neʼe mak buat neʼebé nia halo bainhira ninia fiar sai fraku no komesa mout ba bee laran.

HAREE DIDIʼAK BA JESUS ATU HAMETIN ITA-NIA FIAR

14, 15. (a) Pedro halo saida bainhira nia komesa mout? (b) Ita la bele hateke Jesus ho matan, entaun oinsá mak ita hateke ba nia?

¹⁴ Bainhira Pedro mout tun daudaun ba tasi, nia bele koko atu nani fali bá ró, tanba nia hatene nani. (João 21:7) Maibé nia la halo hanesan neʼe, nia hateke fali ba Jesus no husu Jesus atu ajuda nia. Se ita mak haree katak ita-nia fiar sai fraku ona, diʼak atu halo tuir Pedro nia ezemplu neʼe. Ita bele halo saida?

¹⁵ Hanesan Pedro hateke fali ba Jesus, ita mós tenke “hateke didiʼak ba Jesus, Ida neʼebé halo kompletu ita-nia fiar no ita-nia Naʼi-Ulun ba fiar”. (Lee Ebreu 12:2, 3.) Ita la bele hateke ba Jesus ho matan hanesan Pedro, maibé ita bele hateke ba nia liuhusi aprende ninia hanorin, hahalok, no koko atu halo tuir. Neʼe bele ajuda ita hametin fali ita-nia fiar. Agora mai ita haree toʼok oinsá mak ita bele halo tuir Jesus nia ezemplu sira.

16. Dalan saida atu estuda Bíblia mak bele hametin ita-nia fiar?

¹⁶ Hametin ita-nia fiar ba Bíblia. Jesus fiar katak Bíblia mak Maromak nia Liafuan. No nia mós fiar katak Bíblia mak fó matadalan diʼak liu iha moris. (João 17:17) Ita bele halo tuir Jesus nia ezemplu neʼe hodi lee Bíblia loroloron, estuda, no hanoin didiʼak kona-ba buat neʼebé ita estuda. Diʼak mós atu halo riset kona-ba tópiku neʼebé karik ita duvida hela. Porezemplu, estuda no halo riset kona-ba evidénsia husi eskritura sira neʼebé hatudu katak mundu nia rohan besik liu ona, no buka-hatene Bíblia nia profesia sira neʼebé mak sai loos ona. Neʼe bele hametin liután ita-nia fiar. Tau fiar ba Bíblia nia matadalan sira liuhusi lee kona-ba ema nia moris iha ita-nia livru sira, oinsá mak Bíblia troka sira-nia moris.a (Haree nota iha kraik.)—1 Tesalónika 2:13.

17. Maski Jesus hasoru terus no susar, tanbasá mak nia bele hamriik metin nafatin iha fiar, no oinsá mak ita bele halo tuir ninia ezemplu?

¹⁷ Hanoin beibeik kona-ba bensaun sira neʼebé Jeová promete ona. Maski Jesus hasoru terus no susar, nia bele hamriik metin nafatin iha fiar tanba ninia matan hateke metin ba “ksolok neʼebé tau ona iha nia oin”. (Ebreu 12:2) Nia nunka husik mundu atu dada ninia atensaun. (Mateus 4:8-10) Ita bele banati tuir Jesus nia ezemplu liuhusi hanoin kleʼan kona-ba promesa furak sira neʼebé Jeová promete ona ba ita. Imajina katak ita moris ona iha mundu foun ka halo lista ka dezeñu ida kona-ba buat sira neʼebé ita hakarak halo bainhira Jeová halakon tiha mundu aat neʼe. Halo lista ida kona-ba ema sira neʼebé ita hakarak hasoru bainhira sira hetan moris-hiʼas fali iha mundu foun no saida mak ita hakarak koʼalia ho sira. Bainhira hanoin kona-ba Jeová nia promesa sira, ita hakarak hanoin katak promesa sira-neʼe Jeová halo atu fó ba ita rasik.

18. Oinsá mak orasaun bele hametin ita-nia fiar?

¹⁸ Halo orasaun atu iha fiar boot liután. Jesus hanorin ninia dixípulu sira katak sira bele husu Jeová atu fó espíritu santu ba sira. (Lucas 11:9, 13) Bainhira ita halo orasaun, husu atu iha fiar neʼebé boot liután, tanba fiar mós hahalok ida husi espíritu santu. No diʼak mós atu koʼalia nakloke hodi husu Jeová atu ajuda ita halakon hahalok neʼebé mak bele estraga ita-nia fiar, porezemplu, hahalok hanesan susar atu fó perdua ba ema.

19. Ita tenke buka belun hanesan saida?

¹⁹ Ransu hamutuk ho ema neʼebé iha fiar. Jesus hili ninia belun ho kuidadu tebes. Ninia belun diʼak mak apóstolu sira neʼebé laran-metin no rona nia. (Lee João 15:14, 15.) Tan neʼe mak bainhira atu buka ema sai ita-nia kolega, buka mak sira neʼebé iha fiar no halo tuir Jesus. Belun neʼebé loos mak ema neʼebé la subar ba malu, maibé brani atu fó konsellu ka simu konsellu husi ita ho haraik-an.—Provérbios (Amsal) 27:9.

20. Tanbasá mak ajuda ema seluk hametin sira-nia fiar bele ajuda mós ita rasik?

²⁰ Ajuda ema hametin sira-nia fiar. Jesus ajuda ninia dixípulu sira hametin sira-nia fiar liuhusi ninia liafuan no hahalok. (Marcos 11:20-24) Ita mós tenke banati-tuir Jesus nia ezemplu, tanba ajuda ema seluk hametin sira-nia fiar mós bele hametin ita rasik nia fiar. (Provérbios [Amsal] 11:25) Bainhira ita bá haklaken ka hanorin ema, ajuda sira atu hatene katak Maromak iha duni, no nia hanoin ita, no katak Bíblia mak ninia Liafuan. Ita mós hakarak ajuda ita-nia irmaun-irmán sira atu hametin sira-nia fiar. Se iha irmaun ka irmán ida mak komesa hatudu fiar neʼebé fraku, hanesan sira komesa ibun-ibun kona-ba irmaun sira neʼebé tau matan ba Maromak nia povu, keta hasees an kedas husi sira. Buka dalan atu ajuda sira hodi sira-nia fiar bele sai metin fali. (Judas 22, 23) Se iha eskola mak ema koʼalia kona-ba evolusaun, defende ita-nia fiar ho aten-brani. Dala ruma liafuan neʼebé ita koʼalia sai bele book profesora ka kolega eskola seluk nia laran.

21. Jeová promete saida ba ita hotu kona-ba ita-nia fiar?

²¹ Liuhusi Jesus, Jeová ajuda apóstolu Pedro halakon ninia taʼuk no duvida sira. Ikusmai Pedro iha fali fiar neʼebé boot no ninia fiar fó ezemplu neʼebé diʼak ba ema seluk. Jeová mós sei ajuda ita atu hametin ita-nia fiar liuhusi Jesus. (Lee 1 Pedro 5:9, 10.) Tan neʼe mak ita-nia hakaʼas an atu hametin ita-nia fiar sei la sai saugati deʼit, tanba Jeová sei fó bensaun ba ita-nia hakaʼas-an.