“Halo boot liután ami-nia fiar”

1. Tanbasá mak fiar importante tebes? (Haree foto iha leten.)

DALA ruma ita husu hanesan neʼe ka lae, ‘Iha tempu terus boot, Jeová sei salva haʼu ka lae?’ Apóstolu Paulo hatete katak, tenke iha fiar mak ita bele hetan salvasaun. Tanba nia dehan: “Se fiar la iha, ita la bele halo Maromak nia laran kontente.” (Ebreu 11:6) Neʼe rona hanesan fasil tebes, maibé tuir loloos laʼós ema hotu iha fiar. (2 Tesalónika 3:2) Tan neʼe mak eskritura rua iha parágrafu neʼe ajuda ita haree katak importante tebes atu hametin ita-nia fiar.

2, 3. (a) Oinsá mak apóstolu Pedro hatudu katak fiar mak hahalok neʼebé importante tebes? (b) Ita sei koʼalia kona-ba pergunta saida deʼit?

² Terus boot besik ona atu mai, no se ita hakarak atu hetan salvasaun, importante tebes ba ita atu iha fiar. Tan neʼe mak apóstolu Pedro dehan: “Imi-nia fiar neʼebé hetan ona koko bele halo imi hetan hahiʼi no glória no respeitu iha tempu neʼebé Jesus Kristu hatudu sai ninia an.” (Lee 1 Pedro 1:7.) Loos duni, ita hakarak hakaʼas an atu hametin liután ita-nia fiar, tanba ema neʼebé iha fiar mak bele simu kolen husi ita-nia Liurai, Jesus Kristu, bainhira nia mai. (Ebreu 10:39) Tan neʼe mak ita tenke halo hanesan ema neʼebé husu ba Jesus: “Ajuda haʼu atu iha fiar liután!” (Marcos 9:24) Ka halo tuir apóstolu sira bainhira sira dehan: “Halo boot liután ami-nia fiar.”—Lucas 17:5.

³ Maibé, oinsá mak ita bele haburas ita-nia fiar? Oinsá mak ita bele hatudu katak ita iha fiar? No oinsá mak ita bele fiar katak Jeová sei hatán ita bainhira ita husu atu halo boot liután ita-nia fiar? Lisaun neʼe sei koʼalia kona-ba pergunta sira-neʼe.

HABURAS FIAR BA MAROMAK

4. Sesé deʼit nia ezemplu mak bele ajuda hametin ita-nia fiar?

⁴ Ita bele aprende kona-ba fiar husi ema sira neʼebé temi iha Bíblia laran, tanba eskritura hatete katak “buat hotu neʼebé hakerek ona horiuluk kedas, hakerek hodi hanorin ita”. (Roma 15:4) Bainhira ita lee istória kona-ba Abraão, Sara, Isaac, Jacob, Moisés, Rahab, Jideaun, Barak, no seluk tan, sira-nia ezemplu bele ajuda ita atu haree didiʼak fali ita rasik nia fiar. (Ebreu 11:32-35) No kuandu ita lee esperiénsia husi livru sira kona-ba irmaun-irmán sira-nia moris, neʼe book duni ita atu hametin liután ita rasik nia fiar.a (Haree nota iha kraik.)

5. Oinsá mak Elias hatudu katak nia iha fiar neʼebé boot ba Jeová, no ita bele husu saida ba ita-nia an?

⁵ Porezemplu, mai ita koʼalia toʼok buat lima neʼebé profeta Elias halo neʼebé hatudu katak nia iha duni fiar ba Jeová. (1) Bainhira nia bá hasoru Liurai Akabe atu hatete ba nia katak Jeová sei la fó udan, ho fiar nia dehan: “Hodi Jeová Maromak Izraél neʼebé moris neʼebé haʼu serbí, se haʼu-nia liafuan la sai, mahon-been ka udan mós sei la tun durante tinan sira-neʼe nia laran!” (1 Reis [Raja-Raja] 17:1) (2) Elias iha fiar katak iha tempu neʼebé udan la tun, Jeová sei tau matan ba nia no sira seluk nia presiza. (1 Reis [Raja-Raja] 17:4, 5, 13, 14) (3) Elias mós iha fiar katak Jeová bele halo feto-faluk nia oan-mane ida moris hiʼas fali. (1 Reis [Raja-Raja] 17:21) (4) Nia laiha duvida katak Jeová sei haruka ahi tun husi lalehan atu han ninia sakrifísiu iha foho Karmel leten. (1 Reis [Raja-Raja] 18:24, 37) (5) Toʼo fali tempu bainhira Jeová atu halo udan tun, maski sinál ida mós seidauk iha katak atu udan, ho fiar Elias hatete uluk ba Akabe: “Saʼe bá, han no hemu bá; tanba udan boot nia lian mai ona.” (1 Reis [Raja-Raja] 18:41) Haree tiha kona-ba Elias nia fiar, karik diʼak atu husu ba ita-nia an, ‘Ha’u iha fiar neʼebé boot hanesan Elias nian ka lae?’

ITA BELE HALO SAIDA HODI HABURAS FIAR?

6. Atu haburas fiar, ita presiza saida husi Jeová?

⁶ Fiar la bele mosu derrepente deʼit tuir ita-nia hakarak, tanba fiar mak hahalok ida husi espíritu santu. (Galásia 5:22) Tan neʼe mak diʼak atu halo tuir Jesus nia konsellu hodi halo orasaun dala barak atu husu espíritu santu, tanba Jesus hatete katak Aman “sei fó duni espíritu santu ba sira neʼebé husu ba nia”.—Lucas 11:13.

7. Esplika toʼok oinsá atu haburas fiar.

⁷ Bainhira ita iha ona fiar, ita tenke haburas beibeik fiar neʼe. Buat ida karik, fiar neʼe hanesan ho ahi. Bainhira ita sunu ai no ai neʼe lakan ona, lalais deʼit ahi neʼe lakan boot tebes. Maibé se ita husik deʼit ahi neʼe lakan nuneʼe, no ita la halo buat ida, neineik-neineik ai neʼe sei sai anar no ahi-klaak mós sei mate. Maibé, se ita mak aumenta beibeik ai ba ahi neʼe, ahi-klaak mós sei lakan ba nafatin. Hanesan neʼe mós ho fiar. Se ita lakohi ita-nia fiar atu mate, ita tenke lee no estuda beibeik Maromak nia Liafuan. Halo nuneʼe bele haburas ita-nia domin ba Bíblia no ba Maromak Jeová. Tanba buat sira-neʼe mak ita-nia fiar nia hun.

8. Saida mak bele ajuda ita atu haburas no iha nafatin fiar neʼebé boot?

⁸ Saida tan mak ita bele halo atu haburas no iha nafatin fiar neʼebé boot? Ita-nia estuda la bele toʼo no para deʼit iha tempu neʼebé ita hetan ona batizmu. (Ebreu 6:1, 2) Buka-hatene nafatin profesia saida deʼit mak sai loos ona, tanba halo nuneʼe bele aumenta liután ita-nia fiar. Ita mós bele haree toʼok ita-nia hahalok sira tuir Bíblia ka lae hodi ita bele hatene ita-nia fiar metin ka la metin.—Lee Tiago 1:25; 2:24, 26.

9, 10. Oinsá mak buat sira-neʼe bele haburas fiar: (a) ransu neʼebé diʼak? (b) reuniaun sira? (c) haklaken?

⁹ Apóstolu Paulo hatete katak ita bele “fó laran-manas ba malu liuhusi ita-nia fiar”. (Roma 1:12) Bainhira ita ransu ho ita-nia irmaun-irmán sira, liuliu sira-nia fiar neʼebé mak “hetan ona koko”, ita bele hametin liután ita ida-idak nia fiar. (Tiago 1:3) Ransu neʼebé ladiʼak sei estraga fiar, maibé ransu diʼak haburas fiar. (1 Korinto 15:33) Tan neʼe mak Bíblia fó konsellu ita, “keta haluha atu halibur an hamutuk” iha reuniaun hodi “fó laran-manas ba malu”. (Lee Ebreu 10:24, 25.) Razaun ida tan mak tanba diskursu sira husi ita-nia reuniaun bele ajuda haboot ita-nia fiar. Neʼe mak buat neʼebé apóstolu Paulo hatete, nia dehan: “Fiar mai husi buat neʼebé ema rona.” (Roma 10:17) Tan neʼe husu ba ita-nia an, ‘Reuniaun mak buat neʼebé la bele falta iha haʼu-nia moris ka lae?’

¹⁰ Bainhira ita bá haklaken, ita ajuda ema atu iha fiar, maibé ita mós haburas ita rasik nia fiar. Tanba iha haklaken ita aprende oinsá atu tau fiar tomak ba Jeová hodi koʼalia ho aten-brani. Neʼe mak buat neʼebé ema iha apóstolu sira-nia tempu halo.—Apóstolu 4:17-20; 13:46.

11. Oinsá mak Josué no Caleb iha fiar neʼebé boot, no oinsá mak ita bele iha fiar hanesan sira?

¹¹ Bainhira ita haree oinsá mak Jeová ajuda ita iha moris no hatán ita-nia orasaun, ita-nia fiar mós sai boot liután. Neʼe mak buat neʼebé akontese ba Josué no Caleb. Sira hatudu fiar ba Jeová bainhira sira bá hafuhu rai neʼebé Maromak promete. Ikusmai iha sira-nia moris, sira mós haree oinsá Jeová ajuda sira, neʼe halo sira-nia fiar sai boot liután. Tan neʼe mak Josué koʼalia ba ema Izraél sira katak: “Husi liafuan diʼak hotu neʼebé Jeová imi-nia Maromak promete ba imi, la iha ida mak la sai loos.” No nia hatutan tan: “Taʼuk ba Jeová no serbí nia ho laran-metin no lia-loos . . . Ba haʼu no haʼu-nia umakain, ami sei serbí Jeová.” (Josué [Yosua] 23:14; 24:14, 15) Bainhira ita haree oinsá Jeová ajuda ita iha moris, ita-nia fiar mós sei sai boot liután.—Salmo (Mazmur) 34:8.

HATUDU SAI ITA-NIA FIAR

12. Tiago hatete katak fiar mai husi saida?

¹² Oinsá mak ita bele hatudu sai katak ita iha fiar neʼebé moris? Dixípulu Tiago hatán: “Haʼu sei hatudu ba ó haʼu-nia fiar liuhusi hahalok.” (Tiago 2:18) Liuhusi ita-nia hahalok mak ita hatudu sai katak ita iha fiar neʼebé loos. Mai ita haree ezemplu balu.

13. Tanbasá mak haklaken dalan neʼebé ita hatudu katak ita iha fiar?

¹³ Haklaken mak dalan neʼebé diʼak tebes atu hatudu sai ita-nia fiar. Tanbasá? Tanba bainhira ita bá haklaken, ita hatudu katak ita fiar mundu nia rohan besik ona no “nia sei la tarde!” (Habacuque [Habakuk] 2:3) Atu hatene ita iha fiar neʼebé metin ka lae, diʼak atu husu ba ita-nia an, ‘Ba haʼu, haklaken mak importante ka lae? Haʼu hakaʼas an ka lae atu buka dalan hodi ajuda ema seluk hatene kona-ba Maromak? Haʼu buka oportunidade atu aumenta liután haʼu-nia serbisu haklaken ka lae?’ (2 Korinto 13:5) Loos duni, liuhusi haklaken mak dalan neʼebé importante tebes atu hatudu katak ita-nia fiar mai husi laran.—Lee Roma 10:10.

14, 15. (a) Oinsá mak ita bele hatudu katak ita iha fiar iha moris loroloron nian? (b) Konta toʼok esperiénsia ida kona-ba hatudu fiar neʼebé boot.

¹⁴ Ita mós bele hatudu katak ita iha fiar liuhusi tahan hasoru problema loroloron nian. Bainhira ita hasoru susar hanesan moras, laran-tun, depresaun, kiak, ka problema boot seluk, ita fiar katak Jeová no Jesus sei fó “ajuda iha tempu neʼebé loos”. (Ebreu 4:16) Bainhira ita halo orasaun no husu Jeová atu ajuda ita, neʼe hatudu katak ita iha fiar. Jesus mós hatete katak ita bele halo orasaun kona-ba presiza loroloron nian, inklui mós ‘ai-han loroloron hodi tuir ita-nia presiza ba loron neʼe’. (Lucas 11:3) Bíblia nia ezemplu sira ajuda ita fiar katak Jeová bele duni atu tau matan ba ita. Porezemplu, iha tempu neʼebé udan la tun iha Izraél, Jeová tau matan ba Elias nia han no hemu. Bíblia hatete katak: “Iha dadeer manu-metan sira lori paun ho naan ba nia no iha kalan lori paun ho naan ba nia, no nia hemu bee husi mota.” (1 Reis [Raja-Raja] 17:3-6) Ita iha fiar duni ba Jeová katak nia mós bele tau matan ba ita-nia presiza.

¹⁵ Ita iha fiar katak halo tuir Bíblia nia matadalan sira bele ajuda ita tau matan ba ita rasik nia família. Porezemplu, irmán ida husi rai-Ázia, nia naran Rebecca. Nia hatete katak Bíblia nia matadalan sira husi Mateus 6:33 no Provérbios (Amsal) 10:4 kona-ba tau uluk Maromak nia Ukun no serbisu ho badinas ajuda tebes ninia família. Nia dehan katak ninia laʼen sente ninia serbisu fó ameasa boot ba sira-nia adorasaun, entaun ninia laʼen rezigna an husi serbisu neʼe. Maibé sira presiza tau matan ba sira-nia oan naʼin-haat. Tuirmai Rebecca konta saida mak akontese: “Ami halo fali dose atu faʼan, no ami faʼan dose deʼit ba tinan barak, maibé ami bele sente katak Jeová nunka husik ami mesak, tanba ami nunka falta hahán ida iha ami-nia moris.” Ita mós hatudu ita-nia fiar katak Bíblia bele fó matadalan diʼak ba ita ka lae?

16. Se ita tau fiar ba Maromak, neʼe sei lori rezultadu saida?

¹⁶ Ita fiar katak halo tuir Jeová nia matadalan mak diʼak ba ita. Apóstolu Paulo temi fali profeta Habacuc nia liafuan hodi dehan: “Ema loos sei moris liuhusi fiar.” (Galásia 3:11; Habacuque [Habakuk] 2:4) Tan neʼe mak ita tenke tau fiar ba Jeová tanba nia bele duni ajuda ita. Apóstolu Paulo hatete katak “Maromak nia kbiit neʼebé book an iha ita-nia laran, Maromak bele halo barak liu fali buat hotu neʼebé ita husu no hanoin”. (Éfeso 3:20) Jeová nia atan sira sempre hakaʼas an atu halo ninia hakarak, maibé sira mós rekoñese katak sira iha fraku, tan neʼe sira tau fiar ba Jeová mak atu fó bensaun ba sira-nia hakaʼas an hotu. Ita kontente tebes tanba Maromak hamutuk ho ita loos ka lae?

JEOVÁ SEI FÓ FIAR

17. (a) Oinsá mak Jesus hatán ninia apóstolu sira? (b) Tanbasá mak ita bele fiar katak Jeová mós sei hatán ita-nia orasaun atu husu fiar husi nia?

¹⁷ Koʼalia tiha kona-ba fiar, karik ita rasik sente ita mós presiza husu buat neʼebé apóstolu sira husu: “Halo boot liután ami-nia fiar.” (Lucas 17:5) Jesus hatán duni apóstolu sira iha loron Pentekostes iha tinan 33 bainhira sira simu espíritu santu no kbiit neon hodi hatene Jeová nia hakarak. Neʼe hametin duni sira-nia fiar. Tan neʼe sira komesa hodi halaʼo serbisu haklaken iha fatin hotu-hotu iha sira-nia tempu. (Koloso 1:23) Ohin loron, Jeová sei hatán ita ka lae se ita husu fiar husi nia? Bíblia promete ba ita katak nia sei hatán duni se buat neʼebé ita husu mak “tuir ninia hakarak.”—1 João 5:14.

18. Jeová fó bensaun saida ba ema neʼebé haburas sira-nia fiar?

¹⁸ Jeová kontente tebes ho ema neʼebé tau fiar tomak ba nia. Se ita husu fiar husi Jeová, nia sei hatán ita-nia orasaun, no ita-nia fiar sei sai buras liután. Fiar bele halo ita sai ema neʼebé “merese atu simu Maromak nia ukun”.—2 Tesalónika 1:3, 5.