Jesus kura ema iha loron Sábadu

Ema Farizeu odi Jesus no buka razaun atu kaer nia. Sira hatete katak Jesus labele kura ema iha loron Sábadu, tanba neʼe loron atu deskansa. Iha loron Sábadu ida, Jesus haree mane ida neʼebé moris mai matan-delek ona neʼebé husu ezmola iha dalan. Jesus hatete ba dixípulu sira: ‘Haree bá oinsá Maromak nia kbiit sei ajuda nia.’ Jesus kahur ninia kabeen ho rai, no tuirmai kose ba mane neʼe nia matan. Jesus dehan: ‘Bá no fase ó-nia matan iha kolan Siloé.’ Mane neʼe halo tuir no ikusmai nia bele haree ba dala primeiru iha ninia moris.

Ema hakfodak loos no dehan: ‘Nia mak ema neʼebé sempre husu ezmola, loos ka lae? Ka neʼe mak ema seluk neʼebé haree hanesan nia?’ Mane neʼe dehan: ‘Neʼe mak haʼu!’ Sira husu tan: ‘Oinsá ó bele haree fali?’ Kuandu nia konta kona-ba buat neʼebé akontese, sira lori nia ba ema Farizeu.

Mane neʼe dehan ba ema Farizeu sira: ‘Jesus kose tahu iha haʼu-nia matan no haruka haʼu fase. Haʼu halo tuir no agora haʼu bele haree ona.’ Ema Farizeu dehan: ‘Se Jesus kura ó iha loron Sábadu, neʼe katak ninia forsa la mai husi Maromak.’ Maibé ema seluk dehan: ‘Se ninia forsa la mai husi Maromak, nia la iha kbiit atu kura ema.’

Ema Farizeu bolu ninia inan-aman no husu: ‘Oinsá mak agora nia bele haree?’ Ninia inan-aman sente taʼuk tanba ema Farizeu hatete katak ema neʼebé tau fiar ba Jesus sei hasai husi sinagoga. Entaun sira dehan: ‘Ami la hatene. Husu ba nia.’ Ema Farizeu kontinua husu pergunta toʼo mane neʼe dehan: ‘Haʼu fó-hatene ona ba imi. Tanbasá imi nafatin husu?’ Ema Farizeu sai hirus no duni sai nia ba liʼur.

Jesus buka mane neʼe no husu: ‘Ó tau fiar ba Mesias ka lae?’ Mane neʼe dehan: ‘Se haʼu hatene nia, haʼu sei tau fiar.’ Jesus dehan: ‘Haʼu mak Mesias.’ Jesus laran-diʼak duni, loos ka lae? Nia laʼós deʼit kura mane neʼe, maibé mós ajuda mane neʼe atu iha fiar.