Jesus mate iha Gólgota

Ulun-naʼin amlulik sira lori Jesus ba Governadór Pilatos nia uma. Pilatos husu sira: ‘Imi duun nia kona-ba saida?’ Sira hatán: ‘Nia dehan katak nia mak liurai.’ Pilatos husu ba Jesus: ‘Ó mak ema Judeu nia Liurai ka?’ Jesus hatán: ‘Haʼu-nia Ukun laʼós parte husi mundu neʼe.’

Tuirmai Pilatos haruka ema lori Jesus ba Herodes neʼebé ukun Galileia atu haree se nia bele hetan sala ruma husi Jesus. Maibé Herodes la hetan sala ida no haruka fali Jesus ba Pilatos. Tuirmai Pilatos hatete ba povu: ‘Haʼu no Herodes la hetan sala ida husi mane neʼe. Haʼu sei husik nia livre.’ Maibé povu hakilar: ‘Oho nia! Oho nia!’ Tropa sira baku Jesus ho xikote, tafui kabeen, no basa nia. Sira tau koroa ai-tarak ba Jesus nia ulun no goza nia: ‘Loron diʼak, ema Judeu nia Liurai.’ Pilatos dehan tan ba povu: ‘Haʼu la hetan sala ida husi mane neʼe.’ Maibé sira hakilar: ‘Oho nia iha ai-riin!’ Tan neʼe, Pilatos entrega Jesus atu hetan kastigu-mate.

Tropa sira lori Jesus ba fatin ida naran Gólgota, prega nia ba ai-riin, no hiʼit saʼe ai-riin neʼe. Jesus halo orasaun: ‘Aman, perdua sira bá, tanba sira la hatene buat neʼebé sira halo.’ Ema goza Jesus: ‘Se ó mak Maromak nia Oan, tun husi ai-riin neʼe! Salva ó-nia an bá.’

Kriminozu ida neʼebé tara iha Jesus nia sorin hatete: ‘Hanoin-hetan haʼu kuandu Ita tama iha Ita-nia Ukun.’ Jesus promete ba nia: ‘Ó sei hamutuk ho haʼu iha Paraízu.’ Iha meiudia, rai tomak sai nakukun ba oras tolu. Jesus nia dixípulu balu inklui Jesus nia inan Maria hamriik besik ai-riin. Jesus husu João atu tau matan ba Maria hanesan ninia inan rasik.

Ikusliu Jesus dehan: ‘Buat hotu kumpre ona!’ Nia hakruʼuk tun no iis kotu. Iha tempu neʼe kedas mosu rai-nakdoko makaʼas. Kortina neʼebé tara iha templu entre Fatin Santu no Fatin Santu Liu Hotu naklees fahe ba rua. Xefe tropa ida dehan: ‘Nia mak Maromak nia Oan duni.’