Jesus moris hiʼas

Depois Jesus mate, mane riku ida naran José husu lisensa ba Pilatos atu hatún Jesus nia mate-isin husi ai-riin. José falun Jesus ho hena-liñu neʼebé diʼak no tau buat morin oioin. Tuirmai nia hatoba Jesus iha rate foun no taka rate neʼe ho fatuk boot ida. Ulun-naʼin amlulik sira dehan ba Pilatos: ‘Ami taʼuk Jesus nia dixípulu balu sei naʼok ninia mate-isin no dehan katak nia moris hiʼas fali.’ Tan neʼe, Pilatos dehan: ‘Taka metin rate neʼe no tau guarda iha neʼebá.’

Liutiha loron tolu, iha dadeer feto balu bá Jesus nia rate no haree katak fatuk neʼebé taka rate duir sai tiha ona. Iha rate laran, anju ida dehan ba sira: ‘Keta taʼuk. Jesus moris hiʼas ona. Fó-hatene dixípulu sira atu bá hasoru nia iha Galileia.’

Maibé Maria Madalena bá tiha ona atu hasoru Pedro ho João. Nia dehan ba sira: ‘Ema ruma foti Jesus nia mate-isin!’ Tuirmai, Pedro no João halai ba rate. Sira haree katak rate mamuk no fila fali ba sira-nia uma.

Bainhira Maria fila fali ba rate, nia haree anju naʼin-rua iha laran. Maria dehan ba sira: ‘Haʼu la hatene ema lori Jesus bá neʼebé.’ Tuirmai, Maria haree mane ida no hanoin katak nia mak tau matan jardín. Maria dehan: ‘Señór, fó-hatene mai haʼu, Ita tau Jesus iha neʼebé?’ Maibé mane neʼe dehan: ‘Maria!’ Maria hatene kedas katak mane neʼe mak Jesus. Maria dehan: ‘Mestre!’ Nia kaer metin Jesus. Jesus dehan ba nia: ‘Bá fó-hatene haʼu-nia maun-alin sira katak ó haree ona haʼu.’ Maria bá hasoru kedas dixípulu sira no dehan katak nia haree ona Jesus.

Iha loron neʼebá, dixípulu naʼin-rua laʼo husi Jeruzalein ba Emaus. Mane ida hakbesik ba sira iha dalan no husu: ‘Imi koʼalia kona-ba saida?’ Sira hatán: ‘Ita seidauk rona ka? Loron tolu liubá, ulun-naʼin amlulik sira fó kastigu-mate ba Jesus. Maibé feto balu dehan katak nia moris hiʼas ona!’ Mane neʼe husu: ‘Imi la fiar profeta sira ka? Profeta sira dehan katak Kristu sei mate no moris hiʼas.’ Mane neʼe kontinua esplika Eskritura ba sira. Bainhira sira toʼo iha Emaus, dixípulu sira husu mane neʼe atu hela ho sira. Kuandu sira han hamutuk, mane neʼe halo orasaun no sira rekoñese katak neʼe mak Jesus. Tuirmai Jesus lakon kedas.

Dixípulu naʼin-rua neʼe bá lalais Jeruzalein atu hasoru apóstolu sira no konta buat neʼebé akontese. Bainhira sira halibur iha uma-laran, Jesus mosu ba sira. Foufoun, apóstolu sira la fiar katak neʼe mak Jesus. Tan neʼe Jesus dehan: ‘Haree haʼu-nia liman. Kaer haʼu. Eskritura hakerek ona katak Kristu sei moris hiʼas husi mate.’