Aprende husi Jesus nia loron 40 ikus iha rai

1-2. Saida mak akontese bainhira Jesus nia dixípulu naʼin-rua laʼo ba Emaus?

IHA loron 16 Nisan 33 EC, Jesus nia dixípulu sira sente triste, taʼuk, no la hatene atu halo saida. Dixípulu naʼin-rua sai husi Jeruzalein hodi bá Emaus, neʼebé dook maizumenus kilómetru 11. Sira laran-kraik tebes tanba sira-nia mestre Jesus foin mate. Sira-nia esperansa ba buat neʼebé Mesias sei halo haree hanesan lakon ona. Maibé buat neʼebé sira la espera akontese.

² Mane oin-foun ida hakbesik ba sira no laʼo hamutuk ho sira. Dixípulu sira-neʼe konta ba mane neʼe kona-ba buat neʼebé akontese ba Jesus. Tuirmai mane neʼe komesa koʼalia kona-ba buat neʼebé sira sei nunka haluha. Nia uza Eskritura sira “hahú husi Moisés no Profeta sira hotu nia liafuan” atu esplika tanbasá Mesias tenke hasoru susar no mate. Toʼo tiha Emaus, dixípulu sira rekoñese katak mane neʼe mak Jesus neʼebé moris hiʼas ona! Ita bele imajina sira sente kontente tanba hatene katak Mesias moris hiʼas ona!—Lc 24:​13-35.

3-4. Akontesimentu sira iha Jesus nia loron 40 ikus iha rai fó impaktu saida ba dixípulu sira? Iha lisaun neʼe, ita sei aprende saida? (Apóstolu 1:3)

³ Jesus mosu dala barak ba ninia dixípulu sira durante ninia loron 40 ikus iha rai.a (Lee Apóstolu 1:3.) Durante tempu neʼebá, Jesus nia dixípulu sira neʼebé triste sai kontente fali no aten-brani atu haklaken no hanorin liafuan diʼak kona-ba Maromak nia Ukun.

⁴ Ita bele hetan benefísiu hodi aprende kona-ba buat neʼebé akontese kuandu Jesus moris hiʼas ona. Iha lisaun neʼe, ita sei haree oinsá Jesus uza ninia tempu atu (1) anima dixípulu sira, (2) ajuda sira komprende Eskritura sira, no (3) treinu sira kaer knaar neʼebé boot liu. Iha situasaun ida-idak, ita sei haree oinsá ita bele banati-tuir Jesus nia ezemplu.

ANIMA EMA SELUK

5. Tanbasá mak Jesus nia dixípulu sira presiza hetan anima?

⁵ Jesus nia dixípulu sira presiza hetan anima. Tanbasá? Sira balu husik ona sira-nia hela-fatin, família, no serbisu atu bele laʼo tuir Jesus. (Mt 19:27) Sira balu ema trata aat tanba hili atu sai Jesus nia dixípulu. (João 9:22) Sira halo sakrifísiu oioin tanba fiar katak Jesus mak Mesias neʼebé promete nanis ona. (Mt 16:16) Maibé bainhira ema oho Jesus, sira hanoin katak sira-nia esperansa lakon ona.

6. Depois moris hiʼas, saida mak Jesus halo?

⁶ Jesus komprende katak normál ba dixípulu sira atu sente triste, no nia hatene katak sira triste laʼós tanba sira-nia fiar mak fraku. Iha loron neʼebé nia moris hiʼas, nia komesa kedas anima ninia belun sira. Porezemplu, nia mosu ba Maria Madalena neʼebé tanis hela iha rate. (João 20:​11, 16) Nia mós mosu ba dixípulu naʼin-rua hanesan temi iha parágrafu antes neʼe. No nia mosu ba apóstolu Pedro. (Lc 24:34) Ita bele aprende saida husi Jesus nia ezemplu? Haree toʼok saida mak akontese kuandu nia mosu ba Maria Madalena.

7. Tuir João 20:​11-16, iha dadeer-saan 16 Nisan, Jesus haree Maria halo saida, no saida mak Jesus halo? (Haree mós dezeñu.)

⁷ Lee João 20:​11-16. Iha dadeer-saan 16 Nisan, feto balu bá Jesus nia rate. (Lc 24:​1, 10) Mai ita fokus ba feto ida naran Maria Madalena. Bainhira toʼo iha rate, nia haree rate neʼe mamuk. Nia halai hodi bá fó-hatene Pedro no João. Mane naʼin-rua neʼe halai kedas ba rate no Maria mós halai tuir sira. Bainhira haree katak rate neʼe mamuk, Pedro no João fila fali ba uma. Maibé Maria nafatin iha rate, no tanis. Nia la hatene katak Jesus haree hela nia. Jesus haree feto fiar-naʼin neʼe nia matan-been, no neʼe book tebes Jesus nia laran. Tan neʼe, nia mosu ba Maria no halo buat ruma neʼebé hametin tebes Maria. Jesus koʼalia ba Maria no fó knaar importante ba nia atu fó-hatene dixípulu sira katak Jesus moris hiʼas ona.—João 20:​17, 18.

8. Oinsá ita bele banati-tuir Jesus?

⁸ Oinsá ita bele banati-tuir Jesus? Ita bele banati-tuir Jesus hodi anima irmaun-irmán sira atu kontinua serbí Jeová. Hanesan Jesus, ita mós presiza koko atu komprende sira-nia situasaun no fó kmaan ba sira. Haree toʼok esperiénsia husi irmán ida naran Jocelyn, neʼebé ninia alin-feto mate tanba asidente. Nia dehan: “Ba fulan barak, haʼu sente triste tebetebes.” Iha tempu neʼebá, irmaun ida ho ninia feen konvida nia bá sira-nia uma, rona ba nia ho didiʼak, no hametin ninia fiar katak nia folin-boot ba Jeová. Jocelyn hatete: “Haʼu sente hanesan Jeová uza sira atu dada haʼu husi tasi laran no saʼe ba ró leten. Sira ajuda haʼu atu kontinua serbí Jeová.” Ita mós bele anima ema seluk hodi rona didiʼak bainhira sira fó sai sira-nia sentimentu, no hametin sira atu kontinua serbí Jeová.—Rom 12:15.

AJUDA EMA KOMPRENDE MAROMAK NIA LIAFUAN

9. Dixípulu sira hasoru susar saida, no oinsá Jesus ajuda sira?

⁹ Jesus nia dixípulu sira simu Maromak nia Liafuan no hakaʼas an atu aplika iha sira-nia moris. (João 17:6) Maski nuneʼe, sira konfuzaun tanbasá Jesus tenke mate nuʼudar kriminozu. Jesus hatene katak dixípulu sira iha fiar no hadomi Jeová, maibé sira seidauk komprende didiʼak Eskritura sira. (Lc 9:​44, 45; João 20:9) Tan neʼe nia ajuda sira atu komprende kona-ba Eskritura sira. Haree toʼok oinsá mak nia halo nuneʼe ba dixípulu naʼin-rua iha dalan atu bá Emaus.

10. Oinsá Jesus hametin ninia dixípulu sira-nia fiar katak nia mak Mesias? (Lucas 24:​18-27)

¹⁰ Lee Lucas 24:​18-27. Jesus la fó-hatene kedas ba dixípulu naʼin-rua neʼe kona-ba nia mak sé. Maibé nia husu pergunta balu. Tanbasá? Karik nia hakarak sira atu fó sai sira-nia hanoin no sentimentu. No sira halo nuneʼe. Sira fó-hatene nia katak sira hakarak tebes atu Jesus halo ema Izraél livre husi Roma nia ukun. Bainhira sira fó sai tiha sira-nia hanoin, Jesus uza Eskritura atu ajuda sira komprende saida mak akontese ona.b Tuirmai iha kalan, Jesus uza tempu atu ajuda dixípulu seluk komprende profesia kona-ba nia. (Lc 24:​33-48) Saida mak ita bele aprende?

11-12. (a) Saida mak ita bele aprende husi dalan neʼebé Jesus hanorin lia-loos? (Haree mós foto.) (b) Oinsá mak Nortey nia mestre ajuda nia?

¹¹ Oinsá ita bele banati-tuir Jesus? Bainhira hanorin estudante Bíblia, husu pergunta neʼebé bele book nia atu fó sai ninia hanoin no sentimentu. (Prov 20:5) Kuandu Ita komprende ona ninia hanoin, hatudu ba nia oinsá atu hetan eskritura neʼebé bele aplika iha ninia situasaun. Duké fó-hatene nia buat neʼebé nia tenke halo, anima nia atu hanoin kona-ba buat neʼebé nia lee no oinsá atu aplika ida-neʼe. Haree toʼok esperiénsia husi irmaun ida iha rai-Gana naran Nortey.

¹² Bainhira Nortey tinan 16, nia komesa estuda Bíblia, maibé lakleur ninia família kontra. Saida mak ajuda nia atu kontinua estuda? Ninia mestre uza eskritura iha Mateus kapítulu 10 atu esplika katak ema Kristaun neʼebé loos sei hasoru susar. Nortey hatete: “Tan neʼe, bainhira haʼu hasoru susar, haʼu fiar metin katak haʼu hetan ona lia-loos.” Mestre neʼe mós ajuda nia komprende Mateus 10:16 atu bele matan-moris kona-ba situasaun neʼebé bele kria problema, no oinsá nia bele esplika ninia fiar ho respeitu. Depois hetan tiha batizmu, Nortey hakarak serbí nuʼudar pioneiru, maibé ninia apá hakarak nia atu tama universidade. Mestre neʼe la fó-hatene saida mak Nortey presiza halo, maibé husu pergunta balu no ajuda nia komprende Bíblia nia prinsípiu. Rezultadu mak saida? Nortey deside atu serbí nuʼudar pioneiru. Ninia apá duni nia husi uma. Nortey sente oinsá? Nia hatete: “Haʼu fiar metin katak haʼu halo desizaun neʼebé loos.” Bainhira ita uza tempu atu ajuda ema komprende Eskritura sira, ita bele ajuda sira atu sai ema Kristaun neʼebé iha abut metin.—Éf 3:​16-19.

TREINU MANE SIRA ATU SAI “NUʼUDAR PREZENTE”

13. Jesus halo saida atu ninia Aman nia serbisu bele kontinua laʼo ba oin? (Éfeso 4:8)

¹³ Bainhira iha rai, Jesus ho perfeitu halaʼo knaar neʼebé nia simu husi ninia Aman. (João 17:4) Maibé Jesus la hanoin katak nia deʼit mak bele halo knaar neʼebé husi Jeová. Durante tinan tolu ho balu neʼebé nia haklaken iha rai, nia mós treinu ninia dixípulu sira. Antes fila ba lalehan, Jesus tau fiar ba ninia dixípulu sira, maski sira balu seidauk toʼo tinan 30. Nia fó sira responsabilidade atu tau matan ba Jeová nia bibi no atu dirije serbisu haklaken no hanorin. (Lee Éfeso 4:8.) Oinsá mak Jesus uza ninia loron 40 ikus atu treinu dixípulu sira neʼebé laran-metin no badinas hodi bele kumpre kritéria atu sai “nuʼudar prezente”?

14. Saida deʼit mak Jesus hanorin ba dixípulu sira durante loron 40 ikus iha rai? (Haree mós dezeñu.)

¹⁴ Jesus mós fó konsellu ho domin ba dixípulu sira hodi tuir sira-nia presiza. Porezemplu, nia nota katak sira balu sei duvida hela, tan neʼe nia fó konsellu ba sira. (Lc 24:​25-27; João 20:27) Nia fó-hanoin sira atu fokus tau matan ba Jeová nia povu duké buka osan. (João 21:15) Nia mós hanorin sira atu la kompara buat neʼebé sira halo ba Jeová ho buat neʼebé ema seluk halo. (João 21:​20-22) Nia mós korrije sira-nia ideia balu neʼebé sala kona-ba Maromak nia Ukun no ajuda sira atu fokus ba serbisu haklaken. (Após 1:​6-8) Saida mak katuas sira bele aprende husi Jesus?

15-16. (a) Iha dalan saida deʼit mak katuas sira bele banati-tuir Jesus? Esplika toʼok. (b) Oinsá mak Patrick hetan benefísiu liuhusi konsellu?

¹⁵ Oinsá katuas sira bele banati-tuir Jesus? Sira presiza treinu no ajuda irmaun sira, inklui sira neʼebé sei joven atu bele kaer responsabilidade.c Katuas sira labele hanoin katak ema neʼebé sira treinu tenke sai perfeitu. Sira presiza fó konsellu ho domin, atu nuneʼe irmaun joven sira bele hetan esperiénsia no komprende tanbasá sira presiza haraik an, prontu atu serbí ema seluk, no laran-metin.—1 Tim 3:1; 2 Tim 2:2; 1 Ped 5:5.

¹⁶ Haree toʼok oinsá irmaun ida naran Patrick hetan benefísiu liuhusi konsellu. Nuʼudar joven, nia toman atu koʼalia la ho respeitu no la hatudu laran-diʼak ba ema seluk, inklui irmán sira. Katuas ida neʼebé maduru nota Patrick nia hahalok no koʼalia nakloke ba nia ho domin. Patrick hatete: “Haʼu kontente tanba nia halo nuneʼe. Uluk haʼu sente laran-kraik bainhira haree ema seluk simu priviléjiu neʼebé haʼu hakarak. Maibé konsellu husi katuas neʼe ajuda haʼu atu fokus hodi serbí irmaun-irmán sira ho haraik an duké buka pozisaun ka priviléjiu ruma iha kongregasaun.” Ikusmai, Patrick hetan knaar nuʼudar katuas kongregasaun bainhira nia tinan 23.—Prov 27:9.

17. Oinsá mak Jesus tau fiar ba dixípulu sira?

¹⁷ Jesus fó ba ninia dixípulu sira responsabilidade laʼós deʼit atu haklaken, maibé mós atu hanorin. (Mt 28:20) Karik dixípulu sira sente katak sira la iha matenek atu halaʼo knaar neʼe. Maibé Jesus fiar katak sira bele, no haruka sira atu halo ida-neʼe. Jesus tau fiar ba sira hodi hatete: “Hanesan Aman haruka haʼu mai, haʼu mós sei haruka imi.”—João 20:21.

18. Oinsá katuas sira bele banati-tuir Jesus?

¹⁸ Oinsá katuas sira bele banati-tuir Jesus? Katuas neʼebé iha esperiénsia treinu irmaun sira hodi fó knaar oioin ba sira. (Flp 2:​19-22) Porezemplu, katuas sira bele husu joven sira atu hamoos no tau matan ba Reuniaun-Fatin. Bainhira katuas sira fó knaar ruma ba irmaun sira, sira treinu irmaun sira-neʼe oinsá atu halaʼo sira-nia knaar no tuirmai tau fiar ba sira. Matthew neʼebé foin sai katuas kongregasaun hatete katak nia hafolin duni katuas sira neʼebé treinu nia atu tau matan ba knaar ida no tau fiar ba nia atu halo ida-neʼe. Nia hatete: “Bainhira haʼu halo buat ruma neʼebé la loos, sira ajuda haʼu atu aprende husi ida-neʼe, no oinsá atu halo iha dalan neʼebé diʼak liu.”d

19. Ita presiza deside metin atu halo saida?

¹⁹ Jesus uza ninia loron 40 ikus iha rai atu anima, hanorin, no treinu ema seluk. Mai ita deside metin atu banati-tuir ho didiʼak ninia ezemplu. (1 Ped 2:21) Nia sei ajuda ita atu halo ida-neʼe, tanba nia promete: “Haʼu sei hamutuk nafatin ho imi toʼo mundu neʼe nia rohan.”—Mt 28:20.