Jesus mosu fali ba ninia dixípulu sira

Tempu balu depois Jesus mosu ba apóstolu sira, Pedro deside atu bá kaer ikan iha Tasi Galileia. Tomé, Tiago, João no mós dixípulu sira seluk bá hamutuk ho nia. Sira buka ikan durante kalan tomak, maibé la hetan ikan ida.

Iha dadeer-saan, sira haree mane ida hamriik iha tasi-ibun. Mane neʼe husu ba sira: ‘Imi hetan ikan ka?’ Sira hatán: ‘Lae!’ Tuirmai mane neʼe dehan: ‘Soe rede iha ró nia sorin loos.’ Bainhira sira halo nuneʼe, sira-nia rede sai nakonu ho ikan toʼo sira labele dada sai rede neʼe. João rekoñese kedas katak mane neʼe mak Jesus, no dehan: ‘Neʼe mak Naʼi!’ Pedro haksoit kedas ba tasi no nani toʼo tasi-ibun. Dixípulu sira seluk tuir nia ho ró.

Bainhira sira toʼo iha tasi-ibun, sira haree paun no ikan neʼebé tunu hela. Jesus husu sira atu lori sira-nia ikan balu. Tuirmai Jesus dehan: ‘Mai ita matabixu lai.’

Depois matabixu hotu tiha, Jesus husu Pedro: ‘Ó hadomi haʼu liu fali kaer ikan ka lae?’ Pedro dehan: ‘Sin, Naʼi, Ita hatene katak haʼu hadomi Ita.’ Jesus dehan: ‘Fó-han ba haʼu-nia bibi-oan sira.’ Dala ida tan Jesus husu: ‘Pedro, ó hadomi haʼu ka lae?’ Pedro hatán: ‘Naʼi, Ita hatene katak haʼu hadomi Ita.’ Jesus dehan: ‘Tau matan ba haʼu-nia bibi-oan sira.’ Jesus husu dala ida tan. Pedro sai triste tebes. Nia dehan: ‘Naʼi, Ita hatene buat hotu. Ita hatene katak haʼu hadomi Ita.’ Jesus dehan: ‘Fó-han ba haʼu-nia bibi-oan sira.’ Tuirmai Jesus dehan ba Pedro: ‘Kontinua laʼo tuir haʼu.’