Ema husi nasaun seluk sai Kristaun

Apóstolu sira halo tuir Jesus nia mandamentu atu haklaken liafuan diʼak iha mundu tomak. Iha tinan 47 EC, ema Kristaun iha Antiokia husu Paulo no Barnabé atu halo viajen hodi haklaken. Sira naʼin-rua haklaken iha provínsia Ázia Menór (agora Turkia) hanesan Derbe, Listra, no Ikónio.

Paulo no Barnabé haklaken ba ema hotu, ema riku, kiak, joven ka idade. Ema barak ikusmai fiar Kristu. Bainhira Paulo no Barnabé haklaken ba governadór Xipre naran Sérgio Paulo, matan-dook ida koko atu hanetik sira. Paulo dehan ba nia: ‘Jeová sei kastigu ó.’ Matan-dook neʼe sai matan-delek kedas. Haree tiha ida-neʼe, Governadór Sérgio Paulo sai fiar-naʼin.

Paulo no Barnabé haklaken husi uma ba uma, iha merkadu, iha dalan, no iha sinagoga. Bainhira sira kura mane ida neʼebé isin-matek iha Listra, ema hanoin katak sira mak maromak no hakarak adora sira. Maibé Paulo no Barnabé dehan: ‘Adora deʼit Maromak! Ami mak ema deʼit.’ Tuirmai ema Judeu balu book ema sira-neʼe atu kontra hasoru Paulo. Sira tuda Paulo, dada nia ba sidade liʼur, no husik hela nia tanba sira hanoin katak nia mate ona. Maibé Paulo la mate. Paulo nia maluk sira ajuda nia no lori nia ba sidade. Liutiha tempu balu, Paulo fila ba Antiokia.

Iha tinan 49 EC, Paulo halo viajen seluk tan. Nia vizita ema Kristaun iha Ázia Menór, tuirmai nia haklaken iha fatin dook iha Europa. Nia bá Atenas, Éfeso, Filipe, Tesalónika, no fatin seluk. Silas, Lucas no joven mane ida naran Timóteo mós halo viajen ho Paulo. Sira serbisu hamutuk atu harii no hametin kongregasaun. Paulo hela iha Korinto ba tinan ida ho balu atu hametin maluk Kristaun sira-nia fiar. Paulo haklaken, hanorin, no hakerek karta ba kongregasaun barak. Nia mós serbisu atu halo tenda. Tuirmai Paulo fila ba Antiokia.

Iha tinan 52 EC, Paulo halo viajen terseiru atu haklaken. Foufoun nia bá Ázia Menór, tuirmai bá Filipe no Korinto. Paulo hela iha Éfeso durante tinan balu hodi hanorin, kura ema, no ajuda kongregasaun. Loron-loron nia mós hatoʼo diskursu iha eskola ida. Ema barak rona ba nia no troka sira-nia hahalok. Ikusliu, depois haklaken ona iha área barak, Paulo bá Jeruzalein.