Guarda komarka sai Kristaun

Iha Filipe, iha atan-feto ida neʼebé anju aat domina. Anju aat halo feto neʼe bele siʼik futuru, tan neʼe ninia naʼi sira hetan osan barak. Bainhira Paulo no Silas toʼo iha Filipe, feto neʼe laʼo tuir sira ba loron barak. Anju aat book feto neʼe atu hakilar: ‘Mane sira-neʼe mak Maromak Aas Liu Hotu nia atan.’ Ikusmai, Paulo dehan ba anju aat neʼe: ‘Hodi Jesus nia naran, sai husi feto neʼe!’ Anju aat neʼe sai kedas.

Kuandu feto neʼe nia naʼi sira haree katak sira labele hetan tan osan, sira sai hirus tebes. Sira kaer Paulo no Silas no lori ba ulun-naʼin sira iha tribunál, hodi dehan: ‘Mane sira-neʼe kontra lei no halo sidade runguranga!’ Ulun-naʼin sira-neʼe haruka ema baku Paulo no Silas, no hatama ba komarka. Tuirmai guarda hatama sira ba sela neʼebé kleʼan no nakukun tebes, depois xave metin sira-nia ain.

Paulo no Silas kanta hodi hahiʼi Jeová no ema iha komarka laran bele rona sira. Iha kalan-boot, derrepente rai nakdoko makaʼas. Neʼe halo komarka nia odamatan hotu nakloke, no korrente neʼebé kesi hela dadur sira mós namkore. Guarda komarka nian halai lalais atu haree no nota katak odamatan hotu nakloke. Nia hanoin dadur sira halai hotu, tan neʼe nia losu ninia surik atu oho an.

Maibé Paulo hakilar: ‘Keta oho an! Ami hotu iha neʼe!’ Guarda komarka nian halai tama ba laran no hakneʼak iha Paulo no Silas nia oin. Nia husu ba sira: ‘Saida mak haʼu tenke halo atu hetan salvasaun?’ Sira hatán: ‘Ó no ó-nia família presiza tau fiar ba Jesus.’ Tuirmai Paulo no Silas hanorin Jeová nia liafuan ba sira, no guarda neʼe ho ninia família tomak hetan batizmu.