LISAUN 8

Hanorin ho ai-knanoik no ezemplu

Mateus 13:34, 35

SAIDA MAK ITA PRESIZA HALO: Hafurak dalan neʼebé Ita hanorin ho ai-knanoik no ezemplu neʼebé simples atu book rona-naʼin no hanorin pontu importante.

OINSÁ ATU HALO IDA-NEʼE:

Hili ezemplu no ai-knanoik neʼebé simples. Hanesan ho Jesus, uza buat kiʼik atu esplika kona-ba buat neʼebé boot, no buat fasil atu esplika buat neʼebé susar. Keta fó sai informasaun barak liu hodi halo ezemplu neʼe sai komplikadu. Ita-nia ezemplu no ai-knanoik tenke liga ho buat neʼebé Ita hanorin hodi nuneʼe rona-naʼin bele komprende kedas.

Haree didiʼak. Haree ba mundu no kriasaun sira, lee Ita-nia livru sira no rona ba irmaun-irmán neʼebé hanorin ho matenek. Diʼak mós atu hakerek ai-knanoik ka ezemplu sira neʼebé Ita bele uza atu hafurak liután Ita-nia hanorin. Rai ai-knanoik sira-neʼe hamutuk iha fatin ida.
Hanoin kona-ba Ita-nia rona-naʼin. Hili ezemplu neʼebé kona duni rona-naʼin nia moris, hanesan atividade neʼebé sira halo ka buat neʼebé sira gosta. Keta uza ezemplu ka ai-knanoik neʼebé bele hamoe no hakanek rona-naʼin nia laran.
Hanorin pontu importante. Uza ezemplu no ai-knanoik atu hanorin deʼit pontu importante. Ita hakarak rona-naʼin hanoin-hetan ezemplu ka ai-knanoik neʼebé Ita uza, no mós pontu importante neʼebé Ita hanorin.