Dalan tolu atu hanorin ho didiʼak
1. Tanbasá mak ita hakarak hanorin ho didiʼak?
1 Ema kristaun hotu iha knaar atu hanorin. Kuandu ita vizita ema ba dala primeiru, halo vizita fali, ka fó estuda ba ema, iha tempu sira-neʼe ita fahe informasaun ba sira. Informasaun neʼebé ita fahe ba ema espesiál tebes tanba neʼe ajuda sira atu komprende kona-ba “sagrada eskritura”, no atu “hetan maksoin”. (2 Tim 3:15) Ida-neʼe mak knaar espesiál duni. Mai ita koʼalia kona-ba dalan tolu neʼebé bele ajuda ita atu hanorin ho didiʼak.
2. Oinsá mak ita bele hanorin ho simples?
2 Hanorin ho simples: Kuandu ita komprende didiʼak ona informasaun ruma husi Bíblia, dala ruma ita haluha katak karik neʼe susar ba ema seluk atu komprende. Tan neʼe, kuandu ita fó estuda ba ema, lalika koʼalia barak kona-ba buat hotu-hotu. Duké halo ida-neʼe, koʼalia deʼit kona-ba parte neʼebé importante liu. Atu hanorin ho didiʼak ita la presiza koʼalia barak. (Prov 10:19) Dala ruma, diʼak atu lee deʼit eskritura sira neʼebé importante liu. Depois lee tiha eskritura, esplika deʼit kona-ba parte neʼebé ita koʼalia daudaun. Kuandu Jesus hatoʼo ninia diskursu iha foho, neʼebé temi iha Mateus kapítulu 5 toʼo 7, nia hanorin lia-loos sira neʼebé importante tebes, maibé nia halo ida-neʼe iha dalan neʼebé simples, no nia hili didiʼak ninia liafuan.
3. Oinsá mak ai-knanoik no dezeñu bele ajuda ita atu hanorin ho didiʼak? Ai-knanoik no dezeñu hanesan saida mak diʼak atu uza?
3 Ai-knanoik no dezeñu sira: Ai-knanoik no dezeñu sira bele ajuda ema atu hanoin, bele book sira-nia sentimentu, no ajuda sira atu hanoin-hetan buat neʼebé sira aprende. Atu uza ai-knanoik neʼebé diʼak, ita lalika hanoin katak ita presiza konta istória neʼebé kapás liu. Jesus mós uza ai-knanoik neʼebé badak no fasil atu komprende. (Mt 7:3-5; 18:2-4) Dezeñu simples neʼebé ita halo iha surat-tahan mós bele ajuda. Se ita prepara didiʼak, ita bele hanoin kona-ba ai-knanoik no dezeñu sira neʼebé bele book ema nia laran.
4. Oinsá mak ita bele uza pergunta sira ho didiʼak?
4 Uza pergunta sira: Pergunta sira bele book ita-nia estudante atu hanoin. Tan neʼe, kuandu ita husu pergunta ba ita-nia estudante, diʼak atu hein uitoan antes fó resposta. Se ita mak fó resposta lalais, ita la bele hatene buat neʼebé ita-nia estudante komprende. Se nia fó resposta neʼebé sala, diʼak liu atu lori nia ba resposta neʼebé loos hodi husu pergunta tan. (Mt 17:24-27) Klaru katak ita laʼós mestre-mestra neʼebé perfeitu. Tan neʼe, Bíblia fó laran-manas ba ita atu ‘tau matan didiʼak ba buat neʼebé ita hanorin’. Se ita halo nuneʼe, ita bele hetan rezultadu diʼak no ajuda sira neʼebé rona ba ita.—1 Tim 4:16.