Hanorin ho simples
1. Atu ajuda ema aprende lia-loos, importante atu halo saida?
1 Kuandu ita ajuda ema atu aprende lia-loos, importante tebes atu hanorin ho simples. Hodi aprende no halo tuir Jesus, ita-nia Mestre Boot nia ezemplu, ita bele hanorin ema iha dalan diʼak liután.—2 Tim 4:2; Joao 13:13.
2. Oinsá mak ita bele hanorin ema ho diʼak? Hanorin iha dalan hanesan neʼe bele book ema atu halo saida?
2 Koʼalia ho simples: Iha diskursu neʼebé Jesus hatoʼo iha foho ida, nia hatoʼo lia-loos sira neʼebé kleʼan tebes hodi esplika iha dalan neʼebé simples deʼit. (Mt kap. 5-7) Ema-lubun neʼebé rona Jesus “hakfodak ho nia doutrina”. Jesus nia liafuan book guarda sira neʼebé atu bá kaer nia, no hatete: “Ema ida seidauk koʼalia hanesan ema neʼe!” (Mt 7:28, 29; Joao 7:46) Atu book ema atu simu lia-loos, ita la presiza uza liafuan neʼebé aas no susar atu komprende, ka uza ai-knanoik neʼebé naruk. Ita bele esplika ho klaru hodi uza liafuan neʼebé ita uza baibain.
3. Tansá mak dala ruma ita fó informasaun barak demais ba rona-naʼin? Hodi halo saida mak ita bele halo tuir Jesus nia ezemplu?
3 Labele fó informasaun barak: Jesus hanoin nia rona-naʼin sira no la fó informasaun barak demais iha tempu ida deʼit. (Joao 16:12) Ita mós tenke haree didiʼak ema nia situasaun no prontu atu fó informasaun tuir sira ida-idak nia presiza, liuliu kuandu fó sasin ba ita-nia família, ema neʼebé foin hatudu interese, ka labarik sira. Maski ita haree katak sira gosta rona, ita tenke kuidadu atu la fó informasaun barak demais. Sira neʼebé laran-moos sei kontinua atu aprende liután kona-ba Maromak Jeová.—Joao 17:3; 1 Kor 3:6.
4. Tansá mak diʼak atu hanorin pontu importante deʼit no la koʼalia barak?
4 Hanorin pontu importante deʼit: Jesus la hanorin ema iha dalan neʼebé susar atu komprende hodi esplika pontu ida ho liafuan barak. Kuandu Jesus hatete: “Sira hotu neʼebé iha rate laran sei . . . saʼe”, nia la koʼalia barak kona-ba moris-hiʼas oin rua, tanba seidauk tempu ba ninia rona-naʼin atu komprende kona-ba neʼe. (Joao 5:28, 29) Kuandu ita estuda Bíblia ho ema, ita mós presiza hanorin pontu importante deʼit, no tenke kuidadu atu la koʼalia kona-ba informasaun seluseluk neʼebé la temi iha livru neʼebé estuda daudauk.
5. Bensaun saida mak ita bele simu kuandu ita hanorin ho simples?
5 Maromak Jeová hanorin buat hotu neʼebé ita presiza iha dalan neʼebé simples, no ita sente kontente tebes kona-ba neʼe! (Mt 11:25) Tan neʼe, mai ita hakaʼas an atu hanorin ho simples no haksolok ho rezultadu diʼak husi ita-nia serbisu haklaken no hanorin.