LISAUN 15
Sé mak Jesus?
Jesus mak ema ida neʼebé iha naran-boot. Maibé ema barak la koñese didiʼak nia, no ema balu iha ideia oioin kona-ba loloos sé mak Jesus. Saida mak Bíblia hanorin kona-ba Jesus?
1. Sé mak Jesus?
Jesus mak espíritu ida neʼebé forsa boot no hela iha lalehan. Jeová mak kria nia antes kria buat sira seluk. Tan razaun neʼe mak Bíblia temi nia nuʼudar “oan primeiru husi kriasaun hotu”. (Koloso 1:15) Bíblia temi Jesus nuʼudar Maromak nia “Oan-Mane mesak” tanba só Jesus deʼit mak Maromak kria rasik. (João 3:16) Jesus serbisu hamutuk ho ninia Aman Jeová atu kria buat seluk hotu. (Lee Provérbios 8:30.) Toʼo agora Jesus kontinua iha relasaun besik ho Jeová. Bíblia bolu nia nuʼudar “Liafuan” tanba nia serbí ho laran-metin nuʼudar ida neʼebé hatoʼo Maromak nia liafuan, mensajen no matadalan.—João 1:14.
2. Tanbasá Jesus mai iha mundu?
Maizumenus tinan 2.000 liubá, Jeová uza ninia espíritu santu atu halo milagre hodi muda Jesus nia moris husi lalehan ba feto virjen ida nia knotak, feto neʼe naran Maria. Liuhusi dalan neʼe mak Jesus bele moris mai nuʼudar ema. (Lee Lucas 1:34, 35.) Jesus mai iha mundu atu sai Mesias ka Kristu neʼebé promete nanis ona atu salva ema.a Jesus kumpre Bíblia nia profesia hotu kona-ba Mesias, tan neʼe ema barak bele rekoñese katak Jesus mak “Kristu, Maromak moris nia Oan-Mane”.—Mateus 16:16.
3. Agora Jesus iha neʼebé?
Bainhira Jesus nia moris nuʼudar ema remata, nia hetan moris-hiʼas nuʼudar espíritu ida no fila fali ba lalehan. Iha lalehan, “Maromak foti nia ba pozisaun neʼebé aas liu”. (Filipe 2:9) Agora Jesus iha autoridade no pozisaun neʼebé boot tebes, só Jeová deʼit mak boot liu fali nia.
KEʼE KLEʼAN
Buka-hatene liután kona-ba sé loos mak Jesus no tanbasá importante tebes atu aprende kona-ba nia.
4. Jesus laʼós Maromak Kbiit Boot Liu Hotu
Bíblia hanorin katak maski Jesus iha kbiit boot tebes nuʼudar kriatura espíritu ida iha lalehan, maibé nia tenke hakruʼuk ba ninia Aman Maromak Jeová. Tanbasá ita bele dehan nuneʼe? Loke VÍDEO atu haree saida mak Bíblia hanorin kona-ba oinsá mak Jesus la hanesan ho Maromak Kbiit Boot Liu Hotu.
Eskritura tuirmai sei ajuda ita komprende kona-ba diferensa entre Jeová no Jesus. Lee eskritura ida-idak, depois koʼalia hamutuk kona-ba pergunta tuirmai.
Lee Lucas 1:30-32.
Saida mak anju hatete kona-ba relasaun entre Jesus no Jeová, “Maromak neʼebé Aas Liu Hotu”?
Lee Mateus 3:16, 17.
Depois Jesus hetan tiha batizmu, lian husi lalehan dehan saida?
Tuir Ita-nia hanoin, neʼe sé-nia lian?
Lee João 14:28.
Ida-neʼebé mak boot liu no iha autoridade liu, aman ka oan?
Kuandu Jesus bolu Jeová nuʼudar ninia Aman, neʼe katak sá?
Lee João 12:49.
Jesus haree ninia an hanesan deʼit ho ninia Aman ka lae? Ita rasik hanoin oinsá?
5. Saida mak hatudu katak Jesus mak Mesias?
Bíblia fó sai profesia barak neʼebé bele ajuda ema hatene kona-ba sé mak Mesias neʼebé Maromak hili atu salva ita. Loke VÍDEO atu aprende kona-ba profesia balu neʼebé Jesus kumpre bainhira nia iha rai.
Lee Bíblia nia profesia sira-neʼe, depois koʼalia hamutuk kona-ba pergunta tuirmai:
Lee Miqueias 5:2 atu haree kona-ba Mesias sei moris iha neʼebé.b
Profesia neʼe kumpre iha Jesus ka lae?—Mateus 2:1.
Lee Salmo 34:20 no Zacarias 12:10 atu haree profesia kona-ba Mesias nia mate.
Profesia sira-neʼe sai loos duni ka lae?—João 19:33-37.
Tuir Ita-nia hanoin, Jesus mak kontrola buat hotu atu nia rasik mak kumpre profesia sira-neʼe ka lae?
Profesia sira neʼebé kumpre ona halo ita hanoin oinsá kona-ba Jesus?
6. Ita hetan benefísiu tanba aprende kona-ba Jesus
Bíblia dehan katak importante tebes atu aprende kona-ba Jesus no buat neʼebé mak Maromak hakarak nia atu halo. Lee João 14:6 no 17:3, depois koʼalia hamutuk kona-ba pergunta tuirmai:
Tanbasá importante tebes atu aprende kona-ba Jesus?
Jesus loke dalan ba ita atu bele sai Maromak nia belun. Nia hanorin lia-loos kona-ba Jeová, no liuhusi nia, ita bele hetan moris ba nafatin
EMA BALU DEHAN: “Testemuña ba Jeová la fiar Jesus.”
Ita sei hatán oinsá?
PONTU IMPORTANTE
Jesus mak espíritu ida neʼebé iha forsa boot. Nia mak Maromak nia Oan-Mane no Mesias.
Rezumu
Tanbasá Bíblia bolu Jesus nuʼudar “oan primeiru husi kriasaun hotu”?
Antes mai iha mundu, saida mak Jesus halo?
Saida deʼit mak hatudu katak Jesus mak Mesias?
BUKA-HATENE LIUTÁN
Aprende liután kona-ba oinsá mak ita hatene katak Jesus mak Mesias.
“Profesia kona-ba Mesias hatudu duni katak Jesus mak Mesias ka lae?” (Informasaun iha jw.org/tdt)
Bíblia hanorin katak Maromak sai aman ba Jesus hanesan ema sai aman ida ba oan ka lae?
“Tanbasá Bíblia bolu Jesus nuʼudar Maromak nia Oan-Mane?” (Informasaun iha jw.org/tdt)
Haree tanbasá Bíblia la hanorin kona-ba doutrina Trindade.
“Jesus mak Maromak ka lae?” (Informasaun husi Livru Haklaken)
Haree oinsá feto ida nia moris troka bainhira nia aprende tiha saida mak Bíblia hanorin kona-ba Jesus.
“Feto Judeu ida esplika tanbasá nia analiza ninia fiar” (Informasaun husi Matan-moris bá!)
a Lisaun 26 no 27 sei koʼalia kona-ba tanbasá ita ema presiza hetan salvasaun no oinsá mak Jesus salva ita.
b Haree Apéndise 2 atu hatene profesia neʼebé fó sai ho klaru kona-ba bainhira mak Jesus sai nuʼudar Mesias.