LISAUN 17

Jesus nia hahalok mak hanesan saida?

Edisaun print

Bainhira ita aprende kona-ba Jesus nia hanorin no hahalok bainhira nia iha rai, ita sei haree Jesus nia hahalok furak sira neʼebé bele book ita atu habelun ho Jeová no Jesus. Jesus nia hahalok balu mak hanesan saida? Oinsá mak ita bele halo tuir Jesus iha ita-nia moris?

1. Iha dalan oinsá mak Jesus hanesan ho ninia Aman?

Iha lalehan, durante tinan barak tebes Jesus haree buat neʼebé ninia Aman halo no aprende husi ninia Aman. Tan neʼe Jesus nia hanoin, sentimentu no hahalok hanesan ho ninia Aman. (Lee João 5:19.) Tuir loloos Jesus haleno ninia Aman iha dalan neʼebé perfeitu, tan neʼe mak nia dehan: “Ema neʼebé haree ona haʼu, haree ona mós Aman.” (João 14:9) Nuʼudar Ita aprende kona-ba Jesus mak ema oinsá, Ita mós bele koñese Jeová diʼak liután. Porezemplu, kuandu Ita aprende oinsá Jesus hanoin ema, Ita mós bele hatene oinsá Jeová sente kona-ba Ita.

2. Oinsá mak Jesus hatudu katak nia hadomi Jeová?

Jesus hatete: “Haʼu halo tuir daudaun buat neʼebé Aman haruka haʼu atu halo, hodi nuneʼe mundu bele hatene katak haʼu hadomi Aman.” (João 14:31) Jesus hatudu ninia domin boot ba ninia Aman hodi halo tuir nia maski dala ruma susar atu halo nuneʼe. Jesus mós gosta atu koʼalia kona-ba ninia Aman no ajuda ema seluk atu hakbesik liután no sai belun ho ninia Aman.—João 14:23.

3. Oinsá mak Jesus hatudu katak nia hadomi ema?

Bíblia dehan katak ‘buat neʼebé Jesus gosta liu mak ema’. (Provérbios 8:31) Nia hatudu ninia domin hodi anima no ajuda ema seluk. Milagre sira neʼebé nia halo laʼós atu hatudu deʼit ninia forsa maibé mós ninia laran-sadiʼa. (Marcos 1:40-42) Jesus hatudu laran-diʼak ba ema no la todan ba sorin. Ninia liafuan sira halo ninia rona-naʼin neʼebé laran-moos sente kmaan no iha esperansa. Jesus prontu hasoru susar no mate tanba nia hadomi ema hotu. Maibé nia hadomi liu ema neʼebé halo tuir ninia hanorin sira.—Lee João 15:13, 14.

KEʼE KLEʼAN

Aprende liután kona-ba Jesus nia hahalok sira, no oinsá ita mós bele hatudu domin no laran-luak hanesan nia.

4. Jesus hadomi ninia Aman

Jesus nia ezemplu hanorin ita kona-ba oinsá atu hatudu ita-nia domin ba Maromak. Lee Lucas 6:12 no João 15:10; 17:26. Depois lee tiha eskritura ida-idak, koʼalia hamutuk kona-ba pergunta tuirmai:

Oinsá mak ita bele halo tuir Jesus nia ezemplu no hatudu katak ita hadomi Jeová?

Jesus halo orasaun. — Jesus hadomi ninia Aman iha lalehan no sempre koʼalia ba nia liuhusi orasaun

5. Jesus hanoin ema

Jesus hanoin uluk ema seluk nia diʼak duké buka diʼak ba ninia an rasik. Porezemplu, maski nia sente kole, nia nafatin uza ninia tempu no forsa atu ajuda ema seluk. Lee Marcos 6:30-44, depois koʼalia hamutuk kona-ba pergunta tuirmai:

Iha istória neʼe, oinsá Jesus hatudu katak nia hanoin ema?—Haree versíkulu 31, 34, 41, no 42.
Saida mak motiva Jesus atu ajuda ema?—Haree versíkulu 34.
Tanba Jesus haleno Jeová nia hahalok sira, istória neʼe hanorin saida kona-ba Jeová?
Iha dalan saida deʼit mak ita bele halo tuir Jesus nia hahalok hanoin ema?

Jesus halo milagre hodi uza paun fuan lima no ikan kiʼik rua atu fó hahán ba ema rihun ba rihun. Dixípulu sira fahe hahán sira-neʼe ba mane, feto no labarik sira.

6. Jesus hatudu laran-luak ba ema seluk

Maski Jesus la iha buat barak, maibé nia fahe buat neʼebé nia iha ho ema seluk. Nia mós hanorin ita atu hatudu laran-luak ba ema seluk. Lee Apóstolu 20:35, depois koʼalia hamutuk kona-ba pergunta tuirmai:

Tuir Jesus nia liafuan, oinsá mak ita bele sente kontente?

Loke VÍDEO, depois koʼalia hamutuk kona-ba pergunta tuirmai.

VÍDEO: “Kontente liu atu fó”—Vídeo badak (4:00)

Iha dalan saida deʼit mak ita bele fó ba ema seluk, maski ita la iha buat barak?

Ita hatene ka lae?

Bíblia hanorin ita atu halo orasaun ba Jeová liuhusi Jesus nia naran. (Lee João 16:23, 24.) Kuandu ita halo nuneʼe, ita hatudu katak ita rekoñese buat neʼebé Jesus halo ona hodi loke dalan ba ita atu sai Jeová nia belun.

EMA BALU DEHAN: “Maromak la interese ho ita-nia terus.”

Tanba Jesus haleno ninia Aman nia hahalok, oinsá neʼe fó prova katak Jeová hanoin ita?

PONTU IMPORTANTE

Jesus hadomi Jeová no ema. Tanba Jesus iha hahalok hanesan ho ninia Aman, bainhira ita koñese diʼak liután Jesus, neʼe katak ita mós sei koñese diʼak liután Jeová.