LISAUN 22
Oinsá mak Ita bele fahe liafuan diʼak ba ema seluk?
Nuʼudar Ita aprende lia-loos husi Bíblia, karik Ita hanoin: ‘Ema hotu presiza hatene kona-ba neʼe!’ Maibé karik Ita sente taʼuk uitoan atu fó-hatene ema seluk kona-ba buat neʼebé Ita aprende. Mai ita koʼalia hamutuk oinsá mak Ita bele kontra hasoru sentimentu taʼuk no bele sente kontente atu haklaken liafuan diʼak husi Bíblia.
1. Oinsá Ita bele fahe buat neʼebé Ita aprende ba ema neʼebé Ita koñese?
Jesus nia dixípulu sira dehan: “Ami labele para atu koʼalia kona-ba buat neʼebé ami haree no rona ona.” (Apóstolu 4:20) Sira hafolin tebes lia-loos tan neʼe sira hakarak atu fahe mós lia-loos neʼe ba ema seluk. Ita mós sente hanesan neʼe ka lae? Se nuneʼe, buka oportunidade atu fahe buat neʼebé Ita aprende ona ho respeitu ba Ita-nia família no kolega sira.—Lee Koloso 4:6.
Ezemplu balu oinsá atu hahú koʼalia ho ema
Bainhira ransu ho família, koʼalia ho sira kona-ba Bíblia hodi dehan: “Semana neʼe haʼu aprende buat ida neʼebé kapás.”
Fahe eskritura ida neʼebé bele fó kmaan ba kolega neʼebé moras ka sente laran-taridu.
Se kolega serbisu husu saida mak Ita halo iha semana neʼe, fó-hatene kona-ba buat neʼebé Ita aprende husi Ita-nia estudu Bíblia ka iha reuniaun sira.
Hatudu website jw.org ba Ita-nia kolega sira.
Husu ema seluk atu tuir Ita bainhira Ita estuda Bíblia, ka hatudu ba sira oinsá mak sira mós bele husu atu estuda Bíblia liuhusi jw.org/tdt.
2. Tanbasá diʼak atu haklaken hamutuk ho kongregasaun?
Jesus nia dixípulu sira la haklaken deʼit liafuan diʼak ba ema neʼebé sira koñese. Jesus “haruka sira naʼin rua-rua . . . tama ba sidade no fatin hotu” atu haklaken. (Lucas 10:1) Tanba serbisu haklaken organiza ho didiʼak, neʼe fó oportunidade ba ema barak liután atu rona ba liafuan diʼak. Haklaken hamutuk mós lori kontente ba dixípulu sira. (Lucas 10:17) Ita mós hakarak halo planu atu haklaken hamutuk ho kongregasaun ka lae?
KEʼE KLEʼAN
Aprende oinsá mak Ita bele kontra hasoru sentimentu taʼuk no bele sente kontente atu haklaken kona-ba liafuan diʼak.
3. Jeová sei hamutuk ho Ita
Ema balu neʼebé hakarak atu haklaken karik sente taʼuk kona-ba ema nia hanoin no reasaun.
Ita sente taʼuk uitoan atu haklaken kona-ba buat neʼebé Ita aprende ka lae? Tanbasá?
Loke VÍDEO, depois koʼalia hamutuk kona-ba pergunta tuirmai.
Oinsá mak joven sira-neʼe kontra hasoru sira-nia sentimentu taʼuk?
Lee Isaias 41:10, depois koʼalia hamutuk kona-ba pergunta tuirmai:
Se Ita sente taʼuk atu haklaken, tanbasá mak diʼak atu halo orasaun?
Ita hatene ka lae?
Testemuña ba Jeová barak foufoun hanoin katak sira nunka bele brani atu haklaken. Porezemplu mane ida naran Sergey, nia la fiar an no susar atu koʼalia ho ema seluk. Maibé depois aprende Bíblia, nia dehan: “Maski haʼu taʼuk tebes, haʼu koko atu koʼalia ba ema seluk. No haʼu hakfodak katak kuandu haʼu koʼalia ba ema seluk kona-ba Bíblia, ida-neʼe ajuda haʼu atu sente katak haʼu iha folin duni, no neʼe hametin haʼu-nia fiar katak haʼu hetan ona lia-loos.”
4. Hatudu respeitu
Bainhira koʼalia kona-ba liafuan diʼak, ita laʼós hanoin deʼit kona-ba saida mak ita sei koʼalia, maibé mós oinsá mak ita sei koʼalia. Lee 2 Timóteo 2:24 no 1 Pedro 3:15, depois koʼalia hamutuk kona-ba pergunta tuirmai:
Oinsá mak Ita bele aplika eskritura sira-neʼe bainhira koʼalia ho ema kona-ba Bíblia?
Ita-nia família ka kolega balu karik la konkorda ho Ita. Saida mak Ita bele halo no labele halo?
Tanbasá mak diʼak atu koʼalia ho respeitu duké fó-hatene deʼit ba ema kona-ba saida mak sira tenke halo?
5. Haklaken liafuan diʼak sei halo ita kontente
Jeová fó ba Jesus serbisu atu haklaken. Jesus sente oinsá kona-ba serbisu neʼe? Lee João 4:34, depois koʼalia hamutuk kona-ba pergunta tuirmai:
Han ai-han neʼebé gostu bele sustenta ita-nia moris no halo ita kontente. Tanbasá mak Jesus kompara halo tuir Maromak nia hakarak inklui haklaken liafuan diʼak mak hanesan han ai-han?
Tuir Ita-nia hanoin, tanbasá mak haklaken liafuan diʼak bele halo Ita kontente?
Sujestaun
Haree ezemplu husi reuniaun loron baileet nian kona-ba oinsá mak Ita bele hahú koʼalia ho ema.
Koʼalia ho ema neʼebé hanorin Ita kona-ba oinsá mak Ita bele sai estudante iha reuniaun loron baileet nian. Knaar sira neʼebé Ita simu sei ajuda Ita sai prontu atu koʼalia ho ema kona-ba buat neʼebé Ita aprende.
Uza parte “Ema balu dehan” ka “Karik ema sei husu” husi livru neʼe atu treinu oinsá Ita bele hatán ba pergunta neʼebé baibain ema husu.
KARIK EMA SEI HUSU: “Kleur la hetan ó, ó halo saida deʼit?”
Oinsá mak Ita bele uza oportunidade neʼe atu koʼalia kona-ba buat neʼebé Ita aprende ona husi Bíblia?
PONTU IMPORTANTE
Fahe liafuan diʼak ba ema seluk sei halo ita kontente, no atu halo ida-neʼe laʼós buat neʼebé susar liu.
Rezumu
Tanbasá diʼak atu fahe liafuan diʼak ba ema seluk?
Oinsá mak Ita bele halo ida-neʼe iha dalan neʼebé respeitu?
Oinsá mak Ita bele kontra hasoru sentimentu taʼuk bainhira haklaken?
BUKA-HATENE LIUTÁN
Aprende kona-ba dalan haat simples atu bele fahe liafuan diʼak hodi uza kartaun kontaktu jw.org.
Aprende kona-ba hahalok haat neʼebé bele ajuda Ita atu fahe liafuan diʼak.
Aprende ezemplu ida husi Bíblia neʼebé bele ajuda ita sai brani atu fahe liafuan diʼak, maski ita mak idade kiʼik.
Buka-hatene oinsá mak Ita bele koʼalia kona-ba Bíblia ho família neʼebé seidauk aprende kona-ba Jeová.
“Book ita-nia família nia laran atu simu lia-loos” (Livru Haklaken, 15 Marsu 2014)