HANORIN EMA
LISAUN 10
Keta rende an
Prinsípiu: “Ami deside atu fahe ba imi laʼós deʼit liafuan diʼak kona-ba Maromak, maibé mós fó ami-nia moris hodi ajuda imi, tanba ami hadomi tebetebes imi.”—1 Tes 2:8.
Saida mak Jesus halo
1. Haree VÍDEO, ka lee João 3:1, 2. Depois haree toʼok pergunta tuirmai:
Tuir Ita-nia hanoin, tanbasá mak Nicodemos vizita Jesus iha kalan?—Haree João 12:42, 43.
Oinsá mak Jesus hatudu katak nia la rende an atu ajuda Nicodemos sai ninia dixípulu?
Ita aprende saida husi Jesus?
2. Ita hatudu ita-nia domin ba ema hodi la rende an atu ajuda sira sai Jesus nia dixípulu.
Halo tuir Jesus nia ezemplu
3. Estuda iha oras no fatin neʼebé diʼak ba estudante Bíblia. Karik nia hili loron ka oras neʼebé espesífiku. Karik nia kontente liu atu estuda iha ninia serbisu-fatin, ninia uma, ka fatin públiku. Se bele, troka Ita-nia oráriu hodi tuir estudante nia hakarak.
4. Estuda beibeik. Se Ita la konsege estuda ho Ita-nia estudante iha tempu neʼebé Ita marka ona, hanoin kona-ba pergunta sira tuirmai neʼe duké kansela deʼit:
Haʼu bele estuda fali iha tempu seluk iha semana neʼe ka lae?
Haʼu bele estuda liuhusi telefone ka vídeo konferénsia ka lae?
Haʼu bele husu ema seluk atu dirije estuda neʼe ka lae?
5. Halo orasaun atu iha hanoin neʼebé pozitivu. Husu Jeová ajuda Ita atu kontinua estuda ho Ita-nia estudante maski susar ba nia atu estuda beibeik no aplika buat neʼebé nia aprende. (Flp 2:13) Karik Ita-nia estudante iha hahalok diʼak barak. Husu Jeová atu ajuda Ita tau fokus ba ninia hahalok diʼak sira-neʼe.