Ajuda estudante deside atu serbí Jeová

1-2. (a) Tanbasá mak estudante Bíblia balu dada an atu serbí Jeová? (b) Iha lisaun neʼe, ita sei aprende kona-ba saida?

ANTES Ita tama ba lia-loos, Ita dada an atu serbí Jeová ka lae? Karik Ita taʼuk katak Ita-nia kolega serbisu, belun, ka família sei kontra Ita. Ka karik Ita sente susar demais atu moris tuir Jeová nia matadalan sira. Se nuneʼe, Ita bele komprende Ita-nia estudante Bíblia nia sentimentu bainhira sira dada an atu serbí Jeová.

² Jesus rekoñese katak sentimentu hanesan neʼe bele hanetik ema atu serbí Jeová. (Mt 13:​20-22) Maibé Jesus kontinua ajuda ema neʼebé dada an atu sai ninia dixípulu. Nia ajuda ema hanesan neʼe hodi (1) rekoñese susar neʼebé hanetik sira atu laʼo ba oin, (2) haburas sira-nia domin ba Jeová, (3) tau uluk Jeová iha sira-nia moris, no (4) tahan hasoru susar sira. Oinsá mak Ita bele banati-tuir Jesus nia ezemplu bainhira uza livru Moris Haksolok ba Nafatin hodi ajuda estudante deside atu serbí Jeová?

AJUDA ESTUDANTE ATU REKOÑESE SUSAR NEʼEBÉ HANETIK SIRA ATU LAʼO BA OIN

3. Karik saida mak hanetik Nicodemos atu sai Jesus nia dixípulu?

³ Nicodemos mak ema Judeu nia ukun-naʼin ida. Maibé iha buat ida neʼebé halo susar ba nia atu sai Jesus nia dixípulu. Bainhira Jesus haklaken ba maizumenus fulan neen, Nicodemos rekoñese katak Maromak mak haruka Jesus mai mundu. (João 3:​1, 2) Maibé tanba “taʼuk ema Judeu sira”, Nicodemos deside atu hasoru Jesus subasubar iha kalan. (João 7:13; 12:42) Karik nia hanoin katak nia sei lakon ninia pozisaun ka rikusoin se nia sai Jesus nia dixípulu.a

4. Oinsá mak Jesus ajuda Nicodemos atu komprende buat neʼebé Nicodemos presiza halo?

⁴ Nicodemos hatene didiʼak Ukun-Fuan, maibé nia presiza ajuda atu hatene loloos kona-ba saida mak Jeová hakarak ba nia. Oinsá mak Jesus ajuda nia? Jesus prontu atu uza ninia tempu atu koʼalia ho Nicodemos iha kalan. Jesus fó sai ho klaru kona-ba buat neʼebé Nicodemos presiza halo atu bele sai dixípulu. Neʼe mak arrepende ninia sala, hetan batizmu iha bee, no hatudu fiar ba Maromak nia Oan-Mane.—João 3:​5, 14-21.

5. Oinsá mak Ita bele ajuda estudante atu rekoñese buat neʼebé hanetik nia atu laʼo ba oin?

⁵ Maski estudante ida hatene didiʼak Bíblia, maibé karik Ita presiza ajuda nia atu rekoñese buat neʼebé hanetik nia atu laʼo ba oin. Karik ninia família neʼebé kontra ka serbisu mak hanetik nia atu kumpre ninia planu espirituál. Se nuneʼe, buka tempu atu ajuda nia. Ita bele konvida nia atu hemu kafé ka laʼo halimar. Neʼe bele halo fasil ba nia atu fó sai ninia sentimentu ka susar ruma. Anima estudante atu halo mudansa neʼebé nia presiza, laʼós atu halo Ita kontente, maibé atu hatudu ninia domin ba Jeová.

6. Oinsá mak Ita bele ajuda estudante atu iha forsa hodi aplika buat neʼebé nia aprende? (1 Korinto 16:13)

⁶ Bainhira estudante Bíblia fiar metin katak Jeová sei ajuda nia atu moris tuir Bíblia nia matadalan, neʼe sei fó forsa ba nia atu aplika buat neʼebé nia aprende. (Lee 1 Korinto 16:13.) Ita-nia knaar nuʼudar mestre Bíblia bele kompara ho profesór iha eskola. Profesór neʼebé diʼak hanorin ho pasiénsia no ajuda alunu atu iha konfiansa. Nuneʼe mós, mestre Bíblia neʼebé diʼak laʼós deʼit hanorin buat neʼebé Maromak hakarak ita atu halo, maibé mós ajuda estudante atu iha konfiansa katak Jeová bele ajuda nia atu halo mudansa iha sira-nia moris. Oinsá mak Ita bele sai mestre neʼebé diʼak?

AJUDA ESTUDANTE ATU HABURAS DOMIN BA JEOVÁ

7. Oinsá mak Jesus ajuda rona-naʼin sira atu haburas sira-nia domin ba Jeová?

⁷ Jesus hatene katak domin ba Jeová mak book ninia dixípulu sira atu aplika buat neʼebé sira aprende. Tan neʼe, nia hanorin beibeik buat neʼebé sei ajuda dixípulu sira atu haburas sira-nia domin ba sira-nia Aman iha lalehan. Porezemplu, Jesus kompara Jeová ho aman neʼebé fó buat diʼak ba ninia oan. (Mt 7:​9-11) Karik ema balu neʼebé rona ba Jesus la sente domin husi sira-nia aman. Imajina toʼok sira-nia sentimentu bainhira Jesus konta ai-knanoik kona-ba aman neʼebé domin simu fali oan neʼebé halo ona hahalok aat. Neʼe ajuda sira atu bele haree oinsá Jeová hadomi tebes ninia oan sira iha rai.—Lc 15:​20-24.

8. Oinsá mak Ita bele ajuda estudante atu haburas domin ba Jeová?

⁸ Ita mós bele ajuda estudante atu haburas domin ba Jeová hodi koʼalia beibeik kona-ba Jeová nia hahalok furak sira. Kada estuda, ajuda estudante atu halo ligasaun entre buat neʼebé nia aprende ho Jeová nia domin. Bainhira koʼalia kona-ba Jesus nia sakrifísiu, ajuda estudante atu hanoin oinsá neʼe kona ninia an rasik. (Rom 5:8; 1 João 4:10) Kuandu estudante hanoin fali kona-ba oinsá Jeová hadomi nia, neʼe bele book nia atu hadomi Jeová liután.—Gal 2:20.

9. Saida mak ajuda Michael atu serbí Jeová?

⁹ Hanoin toʼok kona-ba Michael husi Indonézia nia esperiénsia. Nia hatene ona lia-loos husi kiʼik kedas, maibé seidauk batizmu. Bainhira tinan 18, nia bá nasaun seluk atu serbisu nuʼudar xofér. Tuirmai nia kaben iha Indonézia, maibé nia kontinua serbisu iha rai seluk no dook husi família. Ikusmai ninia feen no oan-feto komesa estuda Bíblia no laʼo ba oin. Bainhira Michael nia amá mate, nia fila fali ba Indonézia atu tau matan ba ninia apá, no ikusmai nia komesa estuda Bíblia. Kuandu nia estuda iha parte “Keʼe Kleʼan” husi lisaun 27 iha livru Moris Haksolok ba Nafatin, neʼe kona tebes nia. Nuʼudar nia hanoin kona-ba Jeová nia sentimentu bainhira haree Jesus terus, Michael komesa tanis. Neʼe halo nia hafolin liután Jesus nia sakrifísiu no book nia atu halo mudansa no hetan batizmu.

AJUDA ESTUDANTE ATU TAU ULUK JEOVÁ IHA NINIA MORIS

10. Oinsá mak Jesus ajuda dixípulu sira atu tau uluk serbisu haklaken? (Lucas 5:​5-11) (Haree mós dezeñu.)

¹⁰ Jesus nia dixípulu balu rekoñese kedas katak Jesus mak Mesias, maibé sira presiza ajuda atu tau uluk serbisu haklaken iha sira-nia moris. Pedro no André sai ona Jesus nia dixípulu ba tempu balu bainhira Jesus konvida sira atu uza sira-nia tempu tomak hodi laʼo tuir nia. (Mt 4:​18, 19) Iha tempu neʼebá, sira okupadu ho serbisu nuʼudar peskadór hamutuk ho Tiago no João, no negósiu neʼe laʼo ho diʼak. (Mc 1:​16-20) Bainhira Pedro no André ‘husik sira-nia rede’ hodi laʼo tuir Jesus, karik sira mós hanoin kona-ba oinsá atu tau matan ba sira-nia família. Tanbasá sira tau uluk serbisu haklaken? Livru Lucas konta katak Jesus halo milagre neʼebé hametin sira-nia fiar katak Jeová iha kbiit atu tau matan ba sira.—Lee Lucas 5:​5-11.

11. Oinsá mak Ita bele uza Ita-nia esperiénsia atu hametin estudante nia fiar?

¹¹ Ita labele halo milagre hanesan Jesus, maibé ita bele fahe esperiénsia kona-ba oinsá Jeová apoia ema neʼebé tau uluk Nia iha sira-nia moris. Porezemplu, Ita hanoin-hetan ka lae oinsá Jeová ajuda Ita bainhira komesa tuir reuniaun? Karik Ita presiza esplika ba Ita-nia patraun tanbasá Ita labele halo serbisu liu oras se neʼe hanetik Ita atu tuir reuniaun. Nuʼudar Ita fahe Ita-nia esperiénsia ba estudante, esplika kona-ba oinsá Ita-nia fiar sai metin tanba haree Jeová apoia Ita-nia desizaun atu tau uluk adorasaun ba nia.

12. (a) Tanbasá diʼak atu konvida irmaun-irmán oioin atu tuir Ita-nia estuda? (b) Oinsá mak Ita bele uza vídeo atu hanorin estudante iha dalan neʼebé diʼak? Fó toʼok ezemplu.

¹² Ita-nia estudante mós sei hetan benefísiu bainhira rona ba esperiénsia husi irmaun-irmán sira neʼebé halo mudansa atu tau uluk Jeová. Tan neʼe, konvida irmaun-irmán husi situasaun oioin atu tuir Ita-nia estuda. Husu sira esplika oinsá sira hatene lia-loos no saida mak sira halo atu tau uluk Jeová iha sira-nia moris. No mós, haree vídeo sira ho Ita-nia estudante husi parte “Keʼe kleʼan” ka “Buka-hatene liután” iha livru Moris Haksolok ba Nafatin. Porezemplu, bainhira estuda lisaun 37, Ita bele haree vídeo Jeová sei tau matan ba ita-nia presiza, no koʼalia hamutuk kona-ba saida mak bele ajuda nia atu tau uluk Jeová iha ninia moris.

AJUDA ESTUDANTE ATU TAHAN HASORU SUSAR

13. Oinsá mak Jesus prepara dixípulu sira ba susar neʼebé sira sei hasoru?

¹³ Jesus hatete beibeik ba dixípulu sira katak sira sei hasoru susar husi ema neʼebé kontra, inklui família rasik. (Mt 5:11; 10:​22, 36) Lakleur antes Jesus mate, nia fó avizu ba dixípulu sira katak ema sei oho sira tanba sira-nia fiar. (Mt 24:9; João 15:20; 16:2) Nia mós haruka sira atu matan-moris bainhira haklaken. Porezemplu, nia fó-hatene sira atu la haksesuk malu ho ema neʼebé kontra, no kuidadu kona-ba sira-nia liafuan no hahalok, atu nuneʼe sira bele kontinua haklaken.

14. Oinsá mak ita bele ajuda estudante atu prepara an ba susar neʼebé nia sei hasoru? (2 Timóteo 3:12)

¹⁴ Ita bele ajuda estudante atu prepara an ba susar neʼebé karik nia sei hasoru husi kolega serbisu, belun, no família. (Lee 2 Timóteo 3:12.) Karik kolega serbisu sei goza nia tanba moris tuir Bíblia nia hanorin. Ka karik família balu sei kritika ninia fiar neʼebé bazeia ba Bíblia. Keta demora atu ajuda nia prepara an ba susar neʼebé nia sei hasoru, atu nia bele hatene oinsá atu hatán ba ema neʼebé kontra.

15. Saida deʼit mak bele ajuda estudante atu tahan hasoru susar husi família?

¹⁵ Kuandu Ita-nia estudante hasoru família neʼebé kontra, anima nia atu hanoin tanbasá mak família neʼe hirus. Karik sira hanoin katak Testemuña ba Jeová hanorin lia-bosok ba nia, ka sira iha hanoin negativu kona-ba Testemuña. Jesus rasik mós hasoru susar husi ninia família. (Mc 3:21; João 7:5) Tan neʼe, anima estudante atu hatudu pasiénsia no laran-diʼak ba ema seluk, inklui ninia família.

16. Oinsá ita bele ajuda estudante atu fahe ninia fiar iha dalan neʼebé matenek?

¹⁶ Maski família balu hatudu interese ba lia-loos, estudante neʼebé matenek sei kuidadu atu la esplika kedas buat hotu neʼebé nia hatene. Se nia la kuidadu, karik ninia família sei la kontente no lakohi koʼalia tan kona-ba ninia fiar. Tan neʼe, anima estudante atu fahe ninia fiar iha dalan neʼebé halo ema hakarak atu hatene liután. (Kol 4:6) Karik nia bele husu ninia família atu loke jw.org. Neʼe sei halo sira atu buka-hatene liután kona-ba Testemuña ba Jeová.

17. Oinsá Ita bele treinu estudante atu hatán ba pergunta neʼebé ema husu kona-ba Testemuña ba Jeová? (Haree mós dezeñu.)

¹⁷ Karik Ita bele uza série “Pergunta sira neʼebé baibain ema husu” husi jw.org atu ajuda Ita-nia estudante prepara resposta neʼebé simples atu hatán ba família ka kolega serbisu. (2 Tim 2:​24, 25) Kuandu remata estuda husi lisaun ida-idak iha livru Moris Haksolok ba Nafatin, koʼalia hamutuk parte “Ema balu dehan”. Anima estudante pratika oinsá atu esplika ho liafuan rasik kona-ba ninia fiar. Keta dada an atu fó sujestaun hodi nia bele koʼalia iha dalan neʼebé diʼak liután. Treinu hanesan neʼe sei ajuda nia atu defende ninia fiar ho konfiansa.

18. Oinsá mak Ita bele anima estudante atu sai haklaken-naʼin? (Mateus 10:27)

¹⁸ Jesus haruka dixípulu sira atu haklaken liafuan diʼak ba ema. (Lee Mateus 10:27.) Kuandu estudante komesa haklaken hamutuk ho kongregasaun, nia sei aprende atu sadere ba Jeová. Oinsá mak Ita bele ajuda estudante atu halo planu kona-ba neʼe? Bainhira kongregasaun fó avizu atu halaʼo kampaña espesiál, anima estudante atu hanoin kona-ba oinsá nia bele kumpre kritéria atu sai haklaken-naʼin. Fó-hatene nia katak baibain durante kampaña mak fasil liu atu haklaken. Nia mós bele hetan benefísiu hodi hola parte iha eskola teokrátiku iha reuniaun loron baileet. Nuʼudar nia hakaʼas an atu kumpre planu neʼe, nia sei aprende atu esplika ninia fiar ho konfiansa.

HATUDU KONFIANSA BA ITA-NIA ESTUDANTE

19. Oinsá mak Jesus hatudu konfiansa ba dixípulu sira, no oinsá mak ita bele banati-tuir nia?

¹⁹ Antes Jesus mate no saʼe ba lalehan, nia hatete ba dixípulu sira katak loron ida sira sei hamutuk fali ho nia. Sira la komprende katak Jesus koʼalia kona-ba sira sei bá lalehan. Maski nuneʼe, Jesus la fokus ba sira-nia dúvida, nia fokus liu ba sira-nia laran-metin. (João 14:​1-5, 8) Nia hatene katak sira presiza tempu atu komprende kona-ba buat balu, porezemplu esperansa atu bá lalehan. (João 16:12) Ita mós bele hatudu konfiansa ba estudante katak nia hakarak halo Jeová kontente.

20. Oinsá mak irmán Chifundo hatudu konfiansa ba ninia estudante?

²⁰ Ita hatudu konfiansa ba ita-nia estudante katak nia hakarak halo buat neʼebé loos. Hanoin toʼok ezemplu husi irmán Chifundo iha Malavi. Nia komesa estuda ho feto joven Katólika ida naran Alinafe. Depois remata sira-nia estuda iha lisaun 14 husi livru Moris Haksolok ba Nafatin, Chifundo husu Alinafe nia hanoin kona-ba uza imajen ka estátua. Alinafe hatán ho hirus: “Neʼe desizaun privadu!” Chifundo hanoin katak karik lakleur tan Alinafe lakohi estuda tan. Maibé Chifundo hatudu konfiansa katak lakleur tan Alinafe sei komprende. Liutiha fulan balu, Chifundo husu ba nia pergunta iha lisaun 34: “Toʼo agora, Ita hetan benefísiu saida deʼit tanba estuda Bíblia no aprende kona-ba Maromak Jeová?” Chifundo konta: “Alinafe temi pontu furak barak, no pontu ida mak Testemuña sira la halo buat neʼebé Bíblia bandu.” Lakleur depois neʼe, Alinafe para atu uza imajen no estátua, no ikusmai hetan batizmu.

21. Oinsá mak ita hametin estudante nia hakarak atu serbí Jeová?

²¹ Maski Jeová mak “Maromak neʼebé halo moris”, ita presiza halo ita-nia parte atu ajuda estudante laʼo ba oin. (1 Kor 3:7) La toʼo atu hanorin deʼit buat neʼebé Maromak hakarak nia atu halo. Ita presiza ajuda nia atu haburas domin ba Jeová. Ita mós anima nia atu hatudu domin hodi tau uluk Jeová iha ninia moris, no hanorin nia atu sadere ba Jeová bainhira hasoru susar. Hodi hatudu konfiansa ba ita-nia estudante, ita sei hametin ninia fiar katak nia mós bele moris tuir Jeová nia matadalan no deside metin atu serbí Jeová.