LISAUN 14
Oinsá ita bele halaʼo adorasaun neʼebé Maromak simu?
Hanesan ita aprende ona iha lisaun antes neʼe, laʼós relijiaun hotu mak Maromak simu. Maibé, ita bele duni adora ita-nia Kriadór iha dalan neʼebé nia simu. Saida mak “adorasaun [ka, relijiaun]” neʼebé Maromak simu? (Tiago 1:27, nota-rodapé) Haree toʼok saida mak Bíblia hanorin.
1. Ita-nia adorasaun tenke bazeia ba saida?
Ita-nia adorasaun tenke bazeia ba Bíblia. Jesus dehan ba Maromak: “Ita-nia liafuan mak lia-loos.” (João 17:17) Relijiaun balu la simu hanorin neʼebé mai husi Maromak nia Liafuan Bíblia. Sira troka ida-neʼe ho ema nia hanorin no tradisaun. Jeová la simu sira neʼebé ‘la halo tuir ninia mandamentu’. (Lee Marcos 7:9.) Maibé se ita kaer metin ba Bíblia nia hanorin no halo tuir ninia matadalan sira, ita bele halo Jeová nia laran kontente.
2. Ita tenke adora Jeová iha dalan oinsá?
Jeová mak ita-nia Kriadór, tan neʼe nia deʼit mak merese simu ita-nia adorasaun. (Apokalipse 4:11) Ita tenke hadomi nia no adora nia mesak deʼit, no laʼós hodi uza estátua, imajen, ka símbolu ruma.—Lee Isaias 42:8.
Ita-nia adorasaun ba Maromak Jeová tenkesér “santu” no iha dalan neʼebé “Maromak simu”. (Roma 12:1) Neʼe katak ita presiza moris tuir ninia morál sira. Porezemplu, ema neʼebé hadomi Jeová, presiza hadomi no halo tuir ninia ukun-fuan kona-ba kaben. No sira hadook an husi hahalok neʼebé bele estraga sira-nia moris, hanesan fuma, uza droga, hemu lanu ka mama malus.a
3. Tanbasá ita presiza adora Jeová hamutuk ho maluk fiar-naʼin sira?
Ita-nia reuniaun semana-semana fó ita oportunidade atu “hahiʼi Jeová . . . iha kongregasaun”. (Salmo 111:1, 2) Dalan ida mak liuhusi kanta hodi fó hahiʼi ba Maromak. (Lee Salmo 104:33.) Jeová husu ita atu tuir reuniaun sira tanba nia hadomi ita no nia hatene katak reuniaun sira-neʼe bele ajuda ita atu moris haksolok ba nafatin. Bainhira ita tuir reuniaun sira hodi fó korajen ba malu, ita sei hetan benefísiu.
KEʼE KLEʼAN
Buka-hatene tanbasá Jeová la gosta ita uza estátua no imajen atu adora nia. Aprende kona-ba dalan importante oioin atu ita bele hahiʼi Maromak.
4. Ita labele uza imajen ka estátua sira iha ita-nia adorasaun
Tanbasá mak ita hatene katak uza imajen ka estátua sei la halo kontente Maromak? Loke VÍDEO, depois koʼalia hamutuk kona-ba pergunta tuirmai.
Saida mak akontese bainhira Maromak nia povu balu iha tempu uluk koko atu adora Jeová hodi uza estátua?
Ema balu uza imajen ka estátua tanba sira hakarak sente besik ho Maromak. Maibé tuir loloos, neʼe sei halo Maromak besik ka dook husi ita? Lee Éxodo 20:4-6 no Salmo 106:35, 36, depois koʼalia hamutuk kona-ba pergunta tuirmai:
Sasán, estátua ka imajen saida mak baibain Ita haree ema uza iha sira-nia adorasaun?
Jeová sente oinsá kona-ba uza imajen ka estátua?
Ita rasik sente oinsá kona-ba uza imajen ka estátua?
5. Adora deʼit Jeová sei halo ita livre husi hanorin falsu sira
Haree oinsá mak adora Jeová iha dalan neʼebé loos bele halo ita livre husi hanorin falsu sira. Loke VÍDEO.
Lee Salmo 91:14, depois koʼalia hamutuk kona-ba pergunta tuirmai:
Jeová promete saida se ita hatudu katak ita hadomi nia hodi adora nia mesak deʼit?
6. Ita adora Maromak liuhusi reuniaun sira
Ita hahiʼi Jeová no hametin malu liuhusi kanta no fó komentáriu iha reuniaun sira. Lee Salmo 22:22, depois koʼalia hamutuk kona-ba pergunta tuirmai:
Ita gosta rona komentáriu iha reuniaun sira ka lae?
Ita hakarak prepara no fó komentáriu ka lae?
7. Jeová kontente bainhira ita fahe buat neʼebé ita aprende ba ema seluk
Ita iha oportunidade barak atu fahe lia-loos husi Bíblia ba ema seluk. Lee Salmo 9:1 no 34:1, depois koʼalia hamutuk kona-ba pergunta tuirmai:
Saida mak Ita aprende ona husi Bíblia neʼebé Ita hakarak atu fahe ba ema seluk?
EMA BALU DEHAN: “Ema ida-idak bele adora Maromak tuir sira rasik nia fiar.”
Ita hanoin oinsá?
PONTU IMPORTANTE
Ita halo kontente ita-nia Kriadór kuandu ita adora nia mesak deʼit, fó hahiʼi ba nia iha reuniaun sira, no fahe buat neʼebé ita aprende ona ba ema seluk.
Rezumu
Atu Maromak simu ita-nia adorasaun, ita-nia adorasaun tenke bazeia ba saida?
Tanbasá ita tenke adora deʼit Jeová?
Tanbasá ita presiza adora Maromak hamutuk ho ema seluk neʼebé hakarak halo Maromak kontente?
BUKA-HATENE LIUTÁN
Lee istória “Haʼu la adora tan estátua sira”, no haree oinsá mak feto ida la adora tan estátua.
“Bíblia troka ema nia moris” (Informasaun husi Livru Haklaken)
Aprende kona-ba saida deʼit mak bele ajuda Ita atu bele hatoʼo komentáriu iha reuniaun sira.
“Hahiʼi Jeová iha kongregasaun laran” (Livru Haklaken, Janeiru 2019)
Haree oinsá mane joven ida hetan benefísiu husi reuniaun sira maski la fasil ba nia atu tuir reuniaun.
Ema barak fiar katak krús reprezenta relijiaun Kristaun, neʼe katak ita bele uza krús iha ita-nia adorasaun ka lae?
“Tansá mak Testemuña ba Jeová la uza krús iha sira-nia adorasaun?” (Informasaun iha jw.org/tdt)
a Ita sei koʼalia kona-ba tópiku sira-neʼe iha lisaun seluk tuirmai.