Saida mak Jesus hanorin kona-ba nia an rasik?

“Jesus hatene duni kona-ba nia an, katak nia mak sé loos, nia mai husi neʼebé, tansá nia mai toʼo mundu, no saida mak sei akontese ba nia.”—HAKEREK-NAʼIN HERBERT LOCKYER.

ANTES ita bele simu no tau fiar ba buat neʼebé Jesus hanorin, ita presiza hatene buat ruma kona-ba nia. Sé mak Jesus? Nia mai husi neʼebé? Saida mak Jesus hakarak atu halo iha ninia moris? Iha Evanjellu Mateus, Marcos, Lucas, no Joao, ita bele hetan resposta husi Jesus nia liafuan rasik.

Jesus moris uluk ona antes nia mai toʼo rai Jesus koʼalia kona-ba glória neʼebé nia iha “molok mundu mosu mai”. (Joao 17:5) Mundu iha ona antes Adão moris, no nia moris maizumenus tinan 4.000 antes Jesus moris iha rai. Maibé, antes Maromak kria mundu Jesus iha ona. Se nuneʼe, uluk Jesus moris iha neʼebé? Jesus esplika: “Haʼu tun mai husi lalehan.”—Joao 6:38.

Maromak nia Oan-Mane Maromak Jeová iha oan barak iha lalehan, sira mak anju. Maibé Jesus mak úniku. Nia koʼalia kona-ba nia an nuʼudar “Maromak nia Oan-Mane mesak”. (Joao 3:18) Liafuan sira-neʼe katak Maromak Jeová rasik mak kria Jesus, no tuirmai, liuhusi Oan-Mane mesak neʼe, Maromak Jeová kria buat seluk hotu.—Koloso 1:16.

“Oan-Mane” Jesus uza liafuan neʼe dala barak kuandu nia koʼalia kona-ba nia an. (Mateus 8:20) Kuandu Jesus uza liafuan neʼe, nia koʼalia kona-ba nia an nuʼudar “ema nia oan”. Nuneʼe, Jesus hatudu katak kuandu nia iha mundu, nia laʼós anju neʼebé halo nia an haree hanesan ema. Jesus mak ema duni. Liuhusi espíritu santu, Maromak muda ninia Oan nia moris husi lalehan ba virjen ida nia knotak. Feto virjen neʼe naran Maria. Nuneʼe, Jesus moris nuʼudar ema perfeitu neʼebé la iha sala.—Mateus 1:18; Lucas 1:35; Joao 8:46.

Mesias neʼebé promete nanis ona Feto samaritana hatete ba Jesus: “Haʼu hatene katak Mesias, katak Kristu, sei mai.” Jesus hatán: “Haʼu rasik mak Mesias neʼebé koʼalia ho ó neʼe.” (Joao 4:25, 26) Liafuan “Mesias”, hanesan mós liafuan “Kristu”, katak “ema neʼebé hetan kose-mina”. Jesus hetan kose-mina, neʼe katak Maromak foti nia atu halo serbisu espesiál hodi Maromak nia promesa sira bele sai loos.

Jesus nia serbisu importante liu hotu Jesus rasik hatete: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.” (Lucas 4:43) Maski Jesus halo hahalok diʼak barak atu ajuda ema seluk, maibé haklaken kona-ba Maromak nia Reinu mak serbisu neʼebé importante liu iha nia moris. Ita sei koʼalia tan kona-ba saida mak nia hanorin kona-ba Reinu neʼe.

Klaru katak Jesus laʼós ema baibain.a Hanesan ita sei haree, Jesus moris iha lalehan antes nia mai toʼo rai, ida-neʼe ajuda nia atu hatoʼo liafuan neʼebé book ema nia laran. Nuneʼe, ita la hakfodak katak mensajen neʼebé Jesus haklaken kona duni ema rihun ba rihun nia moris iha mundu tomak.

[Nota–rodapé]