Moris ho buat neʼebé ita iha dalan atu halo nuneʼe
HANOIN toʼok, Ita iha bidón ida no Ita tenke halo bidón neʼe nakonu nafatin ho bee. Oinsá mak Ita bele halo ida-neʼe? Ita presiza hatama fali bee neʼebé uza tiha, hodi bidón neʼe bele nakonu nafatin.
Tuir loloos, ida-neʼe hanesan deʼit ho osan neʼebé Ita uza atu moris. Osan neʼebé Ita simu mak hanesan bee neʼebé tama ba bidón. No osan neʼebé Ita gasta mak hanesan bee neʼebé sai husi bidón. Maibé buat neʼebé susar liu mak atu la gasta osan barak liu fali osan neʼebé Ita simu.
Maski ideia neʼe simples deʼit, maibé susar atu halo tuir no hetan susesu. Ema barak bele halo sira-nia moris kontente liu, se sira hakaʼas an atu halo tuir ideia simples neʼe. Maibé oinsá? No iha neʼebé mak ita bele hetan matadalan neʼebé diʼak? Informasaun husi Bíblia bele ajuda ita. Mai ita haree saida mak Bíblia hatete kona-ba neʼe.
Bíblia nia matadalan neʼebé bele ajuda
Bíblia fó sai matadalan barak kona-ba oinsá ita bele uza osan iha dalan neʼebé matenek. Ita sei koʼalia kona-ba matadalan balu deʼit, maibé haree toʼok, karik matadalan sira-neʼe mós bele ajuda Ita atu moris ho buat neʼebé Ita iha.
Halo planu kona-ba osan. Hodi tau matan ba Ita-nia osan ho didiʼak, Ita presiza hatene osan hira mak Ita simu, no osan hira mak Ita presiza atu uza. Bíblia hatete: “Ema badinas nia planu sira sei hetan rezultadu neʼebé diʼak, maibé ema sira-neʼebé ansi sei kuran buat neʼebé sira presiza.” (Provérbios [Amsal] 21:5) Nuneʼe, ema balu uza envelope sira atu rai osan ketaketak. Iha envelope ida-idak sira tau osan neʼebé sira sei uza ba buat oioin hanesan “Ai-han”, “Aluga uma”, ka “Roupa”. Se Ita uza dalan neʼe ka dalan seluk atu halo planu kona-ba osan, buat neʼebé importante liu mak hatene osan hira mak Ita sei uza. Hanesan neʼe Ita hola uluk buat neʼebé Ita presiza, laʼós buat neʼebé Ita hakarak.
Keta kaan sasán. Ema barak iha rai kiak sira kaan buat neʼebé ema seluk husi rai riku iha. Ema ida-idak bele hetan tentasaun atu buka no hetan buat neʼebé sira-nia viziñu iha. Ida-neʼe bele sai hanesan lasu ida. Tanba karik viziñu empresta osan atu hola sasán sira-neʼe. Tanbasá mak ita hakarak halo tuir ema seluk nia hahalok neʼebé beik, hodi lori susar ba ita-nia an? Bíblia fó avizu tuirmai: “Mane neʼebé buka rikusoin, mane neʼe kaan-teen, hodi la hatene katak ninia hakarak aat kaer toman nia.”—Provérbios 28:22, The Jerusalem Bible.
Halo Ita-nia moris simples. Jesus fó konsellu ba nia dixípulu sira atu nafatin iha matan neʼebé “diʼak”, ka simples. (Mateus 6:22) Kuandu Ita iha osan atu hola modo ka foos deʼit, la matenek atu husik Ita-nia matan kaan hahán neʼebé karun iha restaurante. Ida-neʼe bele hamosu problema no susar kona-ba osan. Tuir relatóriu husi Banku Dezenvolvimentu Aziátiku, ema maizumenus porsentu 33 iha rai-Filipinas, no porsentu 50 liu iha rai-Índia moris ho osan neʼebé kiʼik liu buat neʼebé ema presiza atu moris, neʼe maizumenus $1,35 loron-loron. Kuandu ema iha osan uitoan deʼit, diʼak liu atu uza ba buat neʼebé nia presiza liu. Maibé, matadalan neʼe mós diʼak ba ema neʼebé hela iha rai riku no bele ajuda sira sees an husi problema kona-ba osan.
Kontente hodi hetan buat neʼebé Ita presiza. Matadalan neʼe atu hanesan ho matadalan kona-ba halo Ita-nia moris simples. Bíblia fó konsellu kona-ba neʼe iha 1 Timoteo 6:8: “Maibé wainhira ita iha ai-han no hatais, ita haksolok ona ho sira-neʼe.” Maski ema balu iha osan uitoan, sira kontente liu fali ema seluk; sira kontente ho buat neʼebé sira iha, neʼe laʼós deʼit sasán ruma, maibé domin ba família no kolega sira.—Provérbios 15:17.
Sees an husi tusan. Liafuan iha Bíblia sai loos duni: “Ema riku mak ida neʼebé ukun ba ema kiak, ida neʼebé husu-empresta sai atan ba ema neʼebé fó-empresta!” (Provérbios 22:7) Maski dala ruma ita presiza empresta osan, ema neʼebé husu-empresta tan deʼit sira hakarak sosa buat ruma dala barak lori susar neʼebé todan ba sira-nia an. Nuneʼe, matenek atu kuidadu tebetebes kona-ba husu-empresta ka debe osan!—2 Reis (Raja-Raja) 4:1; Mateus 18:25.
Rai osan antes atu hola. Maski ema barak sente ida-neʼe la jeitu, rai osan antes atu hola buat ruma mak dalan neʼebé matenek liu atu sees an husi problema kona-ba osan. Ida-neʼe ajuda ema barak atu la monu ba lasu kona-ba debe osan, no selu osan-funan neʼebé boot tanba tuir loloos ida-neʼe aumenta deʼit folin ba sasán neʼebé sira sosa. Bíblia esplika katak nehek mak animál neʼebé “matenek” tanba iha “tempu koʼa nian nia mós rai didiʼak hahán” atu uza ba futuru.—Provérbios 6:6-8; 30:24, 25.
Aprende husi ema seluk
Karik ita bele hanoin katak matadalan sira-neʼe husi Bíblia mak diʼak, maibé ida-neʼe ajuda duni ema atu moris simples ka lae? Mai ita haree ba ema balu sira-nia esperiénsia neʼebé halo tuir Bíblia nia konsellu hodi hasoru problema kona-ba osan no hetan susesu.
Aman ida, naran Diosdado, ho oan naʼin-haat, hatete katak krize ekonomia foin lalais halo susar liu ba nia atu tau matan ba família nia presiza. Maibé, nia sente katak halo planu kona-ba osan mak importante duni. Nia hatete: “Haʼu halo planu kona-ba centavos ida-idak neʼebé haʼu manán.” Nia hatutan tan: “Haʼu halo lista kona-ba osan neʼebé haʼu gasta.” Mane ida naran Danilo mós halo hanesan neʼe. Nia ho nia feen hetan susar bainhira sira-nia bisnis kiʼik la laʼo ho diʼak. Maski nuneʼe sira konsege hola buat neʼebé sira presiza hodi halo planu didiʼak ho osan neʼebé sira iha. Danilo hatete: “Ami hatene kona-ba osan hira mak tama fulan-fulan, no osan hira mak ami gasta ba ami-nia presiza. Hodi hatene kona-ba neʼe, ami koʼalia hamutuk kona-ba osan hira mak ami bele gasta.”
Hodi halo tuir nafatin sira-nia planu kona-ba osan, ema balu haree katak sira presiza hamenus osan neʼebé sira uza ba buat ruma. Feto-faluk ida ho naran Myrna, neʼebé haboot daudauk oan naʼin-tolu, hatete: “Duké uza bís ka taksi atu tuir reuniaun kristaun sira, haʼu no oan sira laʼo deʼit.” Myrna hakaʼas an atu ajuda oan sira atu moris simples no hanorin sira tansá ida-neʼe importante. Nia hatutan tan: “Haʼu hakaʼas an atu halo tuir matadalan husi Bíblia iha 1 Timoteo 6:8-10, neʼebé hatudu katak importante atu sai kontente ho buat neʼebé ita iha.”
Aman ida, naran Gerald, ho oan naʼin-rua mós halo buat neʼebé hanesan. Nia hatete: “Bainhira halaʼo estudu Bíblia nuʼudar família, ami koʼalia hamutuk kona-ba esperiénsia husi maluk kristaun neʼebé hanoin uluk ba buat neʼebé importante liu, neʼe mak sira-nia relasaun diʼak ho Maromak Jeová. Rezultadu mak diʼak tebetebes, tanba ami-nia oan la husu demais buat neʼebé ladún importante.”
Klosan ida, naran Janet, halo serbisu voluntáriu ba tempu-tomak atu hanorin Bíblia iha rai-Filipinas. Foin daudauk neʼe nia lakon ninia serbisu, maibé nia tahan nafatin maski iha problema kona-ba osan. Nia hatete: “Haʼu bele halo ida-neʼe tanba haʼu halo planu didiʼak kona-ba osan neʼebé haʼu iha.” Nia hatutan: “Duké kompras iha loja neʼebé karun, haʼu bá loja neʼebé faʼan sasán neʼebé baratu liu. Tansá haʼu tenke selu osan boot, se haʼu bele hetan sasán baratu deʼit? Haʼu sempre hanoin didiʼak antes haʼu hola buat ruma.” Janet hatene katak matenek atu rai osan antes hola sasán. Nia hatete: “Se haʼu iha osan restu, maski uitoan deʼit, haʼu rai didiʼak osan neʼe, no kuandu haʼu presiza buat ruma derrepente deʼit, haʼu iha ona osan.”
Ita bele moris ho buat neʼebé Ita iha
Maski Bíblia mak livru neʼebé liuliu ajuda ita atu habesik ba Maromak, maibé ninia matadalan sira mós bele ajuda ita uza ho matenek buat neʼebé ita iha. (Provérbios 2:6; Mateus 6:25-34) Hodi halo tuir matadalan neʼebé Ita foin lee, no hodi aprende husi ema seluk neʼebé moris tuir matadalan sira-neʼe, Ita mós bele moris ho buat neʼebé Ita iha. Hodi halo nuneʼe, Ita bele sees an husi problema sira-neʼebé halo ema barak ohin loron laran-susar.
[Dezeñu iha pájina 20]
‘Ami koʼalia hamutuk kona-ba osan hira mak ami bele gasta’
[Dezeñu iha pájina 21]
‘Duké uza bís ka taksi atu tuir reuniaun kristaun sira, ami laʼo deʼit’
[Dezeñu iha pájina 21]
‘Haʼu sempre hanoin didiʼak antes haʼu hola buat ruma’